Azərbaycan tələbələri ADA Universitetində keçirilən BMT Modeli konfransında dünyanın təxirəsalınmaz problemlərini müzakirə ediblər

Konfransın açılış mərasimində 120-dən artıq hökumət və BMT rəsmiləri, eləcə də akademik dairələr, vətəndaş cəmiyyəti və mətbuat nümayəndələri bir araya gəlib.

Azərbaycanın xarici işlər naziri Ceyhun Bayramov: “Simulyasiya çalışmaları gənclər üçün lider olmaqdan əvvəl praktiki bacarıqlarının gücləndirilməsi istiqamətində əla təcrübədir. Xüsusilə də, son zamanlar dünyada baş verən hadisələr kontekstində iştirakçıların mürəkkəb qlobal problemləri çözmək üçün öz bilik və bacarıqlarını sınaması təqdirəlayiqdir”.

BMT-nin Rezident Əlaqələndiricisi Vladanka Andreeva: “BMT çoxdandır qəbul edib ki, gənclərin təxəyyülü, idealları və enerjisi onların yaşadıqları cəmiyyətlərdə davamlı inkişaf üçün çox əhəmiyyətlidir. Mən qlobal məsələlərin həllinə hazır olan gənclərdən ibarət bu cür həvəsli qrupu görməkdən çox məmnunam. Siz dəyişikliyin qüdrətli carçılarısınız və sizin səsiniz tam şəkildə eşidilməlidir. Biz çalışmalıyıq ki, gənclərin masa arxasında öz yeri olsun və onlar daha yaşıl, daha sağlam və daha təhlükəsiz dünyanın qurulması üçün həllərin hazırlanmasına kömək etsinlər”.

Konfransa 8 universitet və 7 orta məktəbdən qatılmış 70 tələbə və şagird BMT-nin Təhlükəsizlik Şurasının iclasını, BMT-nin İqlim Dəyişmələri Konfransını – ADACOP-u, eləcə də BMT-nin İqtisadi və Sosial Şurasının sessiyasını simulyasiya edəcək. Onlar kibertəhlükəsizlik, insanların məcburən didərgin düşməsi, iqlim dəyişmələri və ərzaq təhlükəsizliyi kimi qlobal təxirəsalınmaz məsələlər ətrafında müzakirələr aparacaqlar və qətnamələr qəbul edəcəklər.

Bugünkü tədbir BMT-Azərbaycan tərəfdaşlığının 30-cu ildönümünə həsr olunmuş və bu ilin martın 2-dən başlayan birillik kampaniya çərçivəsində təşkil olunub. Məhz 1992-ci il martın 2-də Azərbaycan BMT Baş Assambleyasının 46/230 saylı qətnaməsi ilə təşkilata üzv olub. İki ay sonra, mayın 6-da, Azərbaycan BMT-də daimi nümayəndəliyini açıb. BMT-nin Azərbaycandakı ilk ofisi isə 1992-ci ilin noyabrında fəaliyyətə başlayıb. Beləliklə, 2022-ci ildə iki mühüm ildönümü qeyd olunur: Azərbaycanın BMT-yə üzvlüyünün və BMT-nin Azərbaycanda fəaliyyətə başlamasının 30-cu ildönümü.