Azərbaycandakı komandamız

Cənab Alessandro Frakassetti 2018-ci ilin dekabr ayında BMT-nin İnkişaf Proqramının (BMTİP) Azərbaycan üzrə Rezident Nümayəndəsi təyin edilib. Bundan əvvəl o, BMTİP-in Azərbaycan, Şimali Makedoniya və Xorvatiyadakı nümayəndəliklərində Rezident Nümayəndənin müavini və Belarusda Rezident Nümayəndənin köməkçisi kimi fəaliyyət göstərib. O, həmçinin ATƏT-in Xorvatiyadakı ofisində mətbuat katibi, Bosniya və Herseqovinadakı ofisində Baş Seçki Müşaviri və Baş Siyasi Müşavir kimi çalışıb. Cənab Frakassetti Brüggedə yerləşən Avropa Kollecindən Aİ siyasəti və inzibatçılığı üzrə magistr dərəcəsi, Sasseks Universitetindən isə Beynəlxalq münasibətlər üzrə bakalavr dərəcəsi əldə edib.

Cənab Karvardin UNİCEF-in Azərbaycan Respublikasındakı Nümayəndəsi vəzifəsinə 2016-cı ilin oktyabr ayında təyin edilib. Bundan əvvəl, o, Nyu-York şəhərində UNİCEF-in Kommunikasiya üzrə direktor müavini kimi çalışıb. Daha əvvəl isə, cənab Karvardin 2009-cu ildə UNİCEF-in İndoneziyadakı Nümayəndəliyində və 2004-cü ildə isə UNİCEF-in Kabildəki Nümayəndəliyində Kommunikasiya rəhbəri kimi fəaliyyət göstərib. Cənab Karvardin 2002-ci ildə BMT-nin Baş Assambleyasının qlobal “Humanitar fəaliyyət hesabatı”nın hazırlanmasında Assambleyanın Uşaqlar üzrə Xüsusi Sessiyasına dəstək göstərib. Cənab Karvardin Liverpul Universitetindən İngilis dili və ədəbiyyatı üzrə bakalavr dərəcəsinə malikdir.

Dok. Fərid Babayev 2006-cı ildən BMT-nin Əhali Fondunun (UNFPA) Azərbaycandakı nümayəndəliyində Nümayəndə köməkçisi kimi xidmət göstərir. O, BMT-nin Rezident Əlaqələndiricisi və UNFPA-nın Nümayəndəsinin nəzarəti altında UNFPA tərəfindən maliyyələşdirilən proqramlar portfelinin ümumi əlaqələndirmə və idarəetməsinə məsuldur. Azərbaycan Tibb Universitetinin məzunu olan dok. Babayev Kembric Universitetinin Lüsi Kavendiş Kollecindən Biznes İdarəetməsi üzrə magistr dərəcəsinə və Azərbaycan Dövlət Həkimləri Təkmilləşdirmə İnstitutundan fəlsəfə doktoru dərəcəsinə malikdir. O, Azərbaycan, rus, ingilis və fransız dillərini sərbəst bilir. Ailəlidir, iki övladı var.

Dok. Hande Harmancı Ümumdünya Səhiyyə Təşkilatının (ÜST) Azərbaycandakı Nümayəndəsi və Ölkə Ofisinin Rəhbəri kimi fəaliyyətinə 2018-ci ilin avqust ayında başlayıb. Bu təyinatdan əvvəl, dok. Harmancı ÜST-nin mənzil-qərargahında səhiyyə sahəsində insan resursları, pandemiyaya hazırlıq, qrip və hepatit virusu kimi sahələrdə müxtəlif vəzifələrdə çalışıb. Daha əvvəl isə, o, İstanbulda yerləşən Marmara Universitetində ictimai səhiyyə və ictimai təbabət üzrə professor kimi çalışıb. Dok. Harmancı Hacettepe Universitetinin Tibb Fakültəsinin məzunudur və İctimai Səhiyyə Doktoru dərəcəsinə malikdir. O, həvəskar keramika ustasıdır.

Türkiyə vətəndaşı olan Mələk Çakmak Stenford Universitetindən kənd təsərrüfatı iqtisadiyyatı üzrə magistr dərəcəsinə malikdir. BMT-nin Ərzaq və Kənd Təsərrüfatı Təşkilatında (FAO) fəaliyyət göstərməyə başlamazdan əvvəl, o, müxtəlif milli və beynəlxalq təşkilatlarda elmi tədqiqatçı kimi çalışıb. O, FAO-dakı fəaliyyətinə 2003-cü ildə FAO-nun Türkiyədəki nümayəndəsinin köməkçisi kimi başlayıb. 2008-ci ildə o, FAO-nun Ankarada yerləşən Mərkəzi Asiya üzrə Subregional Ofisində FAO-nun Sahə Proqramlarına Dəstək və Monitorinq Müşaviri kimi fəaliyyətinə davam edib. Mələk Çakmak 2016-cı ildən etibarən FAO-nun Azərbaycandakı Tərəfdaşlıq və Əlaqələndirmə Ofisinin rəhbəri kimi fəaliyyət göstərir.

Olqa Kulayeva Beynəlxalq Əmək Təşkilatının (BƏT) Şərqi Avropa və Mərkəzi Asiya üzrə Layiqli Əmək Qrupu və Ölkə Ofisinin direktoru vəzifəsinə 1 noyabr 2016-cı il tarixində təyin edilib. 2010-cu ilin fevral ayında o, BƏT-in Şərqi Avropa və Mərkəzi Asiya üzrə Layiqli Əmək Qrupu və Ölkə Ofisində Baş Məşğulluq Mütəxəssisi kimi fəaliyyət göstərməyə başlayıb. Xanım Koulaeva Moskva Dövlət Universitetinin İqtisadiyyat Fakültəsinin məzunudur və İqtisad üzrə fəlsəfə doktoru elmi dərəcəsinə malikdir. O, ingilis və isveç dillərini sərbəst bilir. 2002-2005-ci illərdə İsveçin Milli Əmək Bazarı Şurasında və İsveç Dövlət Məşğulluq Xidmətində maliyyə meneceri və layihə direktoru vəzifəsində çalışıb.

Cənab Ambroso BMT-nin Qaçqınlar üzrə Ali Komissarının (BMTQAK) Azərbaycandakı nümayəndəsi vəzifəsinə 2018-ci ilin iyul ayında təyin edilib. O, 30 ildən artıq müddətdə əsas etibarilə BMTQAK-da humanitar sahədə fəaliyyət göstərib. Belə ki, o, Uqanda İran, Cibuti, Efiopiya, Azərbaycan (1995-1997), Somali, Belçika, Tanzaniya və BMTQAK-ın Cenevrədəki mənzil-qərargahında müxtəlif rəhbər vəzifələrdə çalışıb. Cənab Ambroso Milanda böyüyüb və İtaliya vətəndaşıdır. O, London Universitetində yerləşən London Universitet Kollecindən Antropologiya üzrə bakalavr və Coğrafiya üzrə fəlsəfə doktoru dərəcəsinə malikdir.

Cənab Hüseynov media, kommunikasiya və siyasi məsələlər sahəsində 20 ildən artıq iş təcrübəsinə malikdir. O, BMT-dəki fəaliyyətinə 2017-ci ildə Qlobal Kommunikasiyalar Departamentinin Azərbaycan təmsilçisi kimi başlayıb. Bundan əvvəl, o, ATƏT-in Vyanada yerləşən Katibliyində Media Müşaviri, ATƏT-in Bakıdakı nümayəndəliyində İnformasiya Xidmətinin rəhbəri, İsrailin Azərbaycandakı səfirliyinin Mətbuat şöbəsinin direktoru, habelə müxtəlif milli KİV-lərdə aparıcı, redaktor və müxbir kimi çalışıb. O, Siyasi elmlər üzrə fəlsəfə doktoru dərəcəsinə malikdir.

Cənab Georgiyev beynəlxalq və milli səviyyələrdə 21 ildən artıq iş təcrübəsinə malikdir və sonuncu dəfə Amman, Nayrobi və Skopyedə Beynəlxalq Miqrasiya Təşkilatının (BMqT) satınalma və aktivlərin idarəolunması üzrə eksperti kimi çalışıb. Bundan əvvəl, o, BMqT-nin Manila İnzibati Mərkəzindəki (Filippin) Qlobal Satınalma və Təchizat Birliyinin rəhbəri kimi və İndoneziyada Satınalma və Maddi-Texniki Təchizat Müşaviri kimi fəaliyyət göstərib. Cənab Georgiyev Şimali Makedoniyanın vətəndaşıdır. O, İqtisadi elmlər üzrə magistr dərəcəsinə malikdir və Akkreditə olunmuş Satınalma və Təchizat İnstitutundan Dövlət Satınalması üzrə beynəlxalq sertifikat əldə edib.

Dok. Şkolnikov 2011-ci ilin iyul ayından etibarən BMT-nin İnsan Hüquqları üzrə Ali Komissarlığının Cənubi Qafqaz üzrə Baş İnsan Hüquqları Müşaviri vəzifəsində çalışır. Bundan əvvəl, o, Avropanın bir sıra vətəndaş cəmiyyəti təşkilatlarında müxtəlif vəzifələrdə çalışıb. O, Varşavada ATƏT-in Demokratik Təsisatlar və İnsan Hüquqları Bürosunda Demokratikləşdirmə şöbəsinin rəhbəri və Miqrasiya və hərəkət azadlığı üzrə müşaviri kimi fəaliyyət göstərib. Dok. Şkolnikov ABŞ-ın Kaliforniya ştatının Santa Monika şəhərində yerləşən “RAND” Korporasiyasında Rezident Elmi-Tədqiqat Məsləhətçisi vəzifəsində də çalışıb. O, Santa Monikada “RAND” Siyasi Tədqiqatlar üzrə Ali Məktəbində Dövlət siyasətinin təhlili üzrə fəlsəfə doktoru və magistr dərəcələrini əldə edib.