BMT və Azərbaycan Dayanıqlı İnkişaf Məqsədlərinin milliləşdirilməsi və prioritetləşdirilməsini müzakirə edir

BMT-nin Azərbaycandakı nümayəndəliyi və Dayanıqlı İnkişaf üçün Milli Əlaqələndirmə Şurasının (DİMƏŞ) təşkil etdiyi konfransın məqsədi DİM-lər, hədəflər və göstəricilərin prioritetləşdirilməsi və onların yerli şəraitə uyğunlaşdırılmasında Azərbaycanın səylərini dəstəkləməkdir. Tədbir həmçinin Azərbaycanın 2019-cu ildə BMT-nin Yüksək Səviyyəli Siyasi Forumuna könüllü milli hesabatın hazırlanmasına da öz töhfəsini verəcək.

Konfransın işinə Azərbaycan Respublikasının baş nazirinin müavini və DİMƏŞ-in sədri Əli Əhmədov və BMT-nin Azərbaycandakı rezident əlaqələndiricisi Qulam İshaqzai həmsədrlik edəcək.

Qulam İshaqzai bildirib ki, “bu konfrans dayanıqlı inkişaf baxımından Azərbaycanda DİM-lərin təşviqi və icrası istiqamətində əldə olunmuş nailiyyətləri və mövcud problemləri müzakirə etmək üçün ən yaxşı yerli və beynəlxalq mütəxəssisləri, eləcə də hökumət orqanları, özəl sektor və vətəndaş cəmiyyəti təmsilçilərini bir araya gətirmək üçün əla fürsətdir”.

Onun fikrincə, “fərdi və ümumi ehtiyaclar və imkanlardan daha yaxşı xəbərdar olan yerli icmalar və iştirakçılar 2030-cu il Gündəliyinin icrasında ən vacib tərəfdaşlardır.”

İştirakçılar DİM-lərin milliləşdirilməsi və yerli şəraitə uyğunlaşdırılması üzrə müxtəlif ölkələrin qabaqcıl təcrübələrini, habelə DİM-lərin milliləşdirilməsində üzə çıxan mürəkkəb inkişaf problemlərinin aradan qaldırılması yollarını müzakirə edəcəklər.

Azərbaycan üçün DİM-lərin sürətləndirilməsi platformaları, DİM-lər üzrə məlumatların təmin olunması üçün milli mexanizmlər və DİM-lərin gender məsələlərinə diqqət yetirməklə həyata keçirilməsi məsələləri də müzakirə olunacaq.

Konfransın işi işçi qrupların müzakirələri ilə davam edəcək. Bakı prinsiplərinə uyğun olaraq, işçi qrupları Azərbaycan üçün üç əsas sürətləndirmə platformalarını nəzərdən keçirəcək: inklüziv əmək bazarı, gender bərabərliyinin artması və ictimai və sosial xidmətlərin artırılması.