BMT-nin Azərbaycandakı Rezident Əlaqələndiricisi cənab Qulam İshaqzainin Dayanıqlı İnkişaf üzrə Bakı Forumunda çıxışı

Cənab Əli Əhmədov! [Azərbaycan Respublikasının baş nazirinin müavini, Dayanıqlı İnkişaf üzrə Milli Əlaqələndirmə Şurasının sədri]

Xanım İnqa Ronda Kinq! [BMT-nin İqtisadi və Sosial Şurasının sədri]

Cənab Rəşid Xaliqov! [BMT-nin Baş Katibinin köməkçisi]

Cənab Şahin Mustafayev! [Azərbaycan Respublikasının İqtisadiyyat naziri]

Cənab Sahil Babayev! [Azərbaycan Respublikasının əmək və əhalinin sosial müdafiəsi naziri]

Cənab Rastislav Vrbenski!  [BMTİP-in Avropa və MDB üzrə Regional Bürosunun Direktor Müavini]

Hörmətli dövlət nümayəndələri!

BMT-ni təmsil edən hörmətli həmkarlarım!

Hörmətli xanımlar və cənablar!

BMT-nin Azərbaycandakı nümayəndəliyinin adından hər birinizi, xüsusilə də uzun məsafələr qət edərək bu önəmli foruma və gözəl Bakı şəhərinə təşrif buyuran hər kəsi salamlayıram!

Fürsətdən istifadə edərək baş nazirin müavini cənab Əli Əhmədov başda olmaqla, bu regional forumun təşkil olunmasında BMT-nin Ölkə üzrə İdarə Heyəti ilə əməkdaşlıq edən Dayanıqlı İnkişaf üzrə Milli Əlaqələndirmə Şurasına minnətdarlığımı bildirirəm!

Hörmətli iştirakçılar!

Öz sözlərimə hər birimizi BMT Günü münasibətilə təbrik etməklə başlamaq istəyirəm. Dünən – oktyabrın 24-ü 1945-ci ildə BMT-nin Nizamnaməsinin qəbul edilməsinin 73-cü ildönümünə təsadüf etdi.

Bu əlamətdar gün münasibətilə ünvanladığı müraciətində BMT-nin Baş katibi Antonio Quterreş bizləri yoxsulluğun aradan qaldırılması, iqlim dəyişikliyinə qarşı mübarizə, insan hüquqlarının təşviqi və sülh naminə səylərimizi davam etdirməkdən “əl çəkməməyə” səslədi.

Həmin müraciətdə o, BMT-nin “sarsılmış etimadı bərpa etmək, planetimizi sağaltmaq, heç kəsi kənarda qoymamaq və hər kəsin ləyaqətini qorumaq”  öhdəliyini bir daha təsdiq etdi.

73 il bundan əvvəl BMT-nin nizamnaməsi imzalandıqda onun bəyan olunan məqsədlərindən biri “sosial tərəqqini və azadlıqların geniş vüsət aldığı daha yaxşı həyat standartlarını təmin etmək” idi.

Ümumdünya İnsan Hüquqları Bəyannaməsi də məhz bu ruhda hazırlanmışdı. Bu il biz həm də bu mühüm tarixi sənədin qəbul olunmasının 70 illiyini qeyd edirik.

Minilliyin Bəyannaməsinin və 2030-cu il Gündəliyinin də hazırlanıb qəbul olunması məhz bu mühüm sənədlərdən irəli gəlir.

Hörmətli xanımlar və cənablar!

Tezliklə 2030-cu il Gündəliyinin və Dayanıqlı İnkişaf Məqsədlərinin qəbul olunmasının 4-cü ilini geridə qoyacağıq.

Təfərrüatlara varmadan aşağıdakı məsələləri diqqətinizə çatdırmaq istəyirəm:

1. Artıq sadəcə danışıq və təşviqat işləri ilə kifayətlənməyib, DİM-lərə nail olunması istiqamətində qətiyyətli və konkret tədbirlər görmək vaxtıdır. Bizim cəmi 12 ilimiz qalıb.
2. Bu fəaliyyət çərçivəsində dövlətlər 2030-cu il üzrə milli gələcəyə baxış strategiyalarını və yol xəritələrini hazırlamalı və DİM-ləri öz planlarına və büdcə çərçivələrinə inteqrasiya etməlidirlər.
3. Hökumətlər siyasət tədbirlərinin DİM-lərin icrasının sürətləndirilməsinə yatırım, innovasiya və genişlənmə imkanları ilə müşayiət olunmasına zəmin yaratmaq məqsədilə, biznes ictimaiyyəti, elm ictimaiyyəti, KİV və vətəndaş cəmiyyəti təşkilatları arasında 2030-cu il Gündəliyinin qəbulunu və mənimsənilməsini təşviq etmək üçün daha çox tədbirlər görməlidir.
4. DİM-lərin icrasını qiymətləndirmək və onların monitorinqini gücləndirmək üçün biz məlumatların təsnifləndirilməsi, təhlili və təqdim olunması da daxil olmaqla, DİM-lərlə əlaqəli məlumatların toplanması işini əhəmiyyətli dərəcədə yaxşılaşdırmalıyıq.

Bu baxımdan, biz  Azərbaycanın 2030-cu il Gündəliyinin milliləşdirilməsi və bu məqsədlərə nail olmaq üçün BMT-nin İdarə Heyəti ilə əməkdaşlıq sahəsində nümayiş etdirdiyi qətiyyəti və ciddi yanaşmanı təqdir edirik.

Azərbaycan Nyu-York şəhərində keçirilən Yüksək Səviyyəli Siyasi Foruma özünün birinci Könüllü Milli İcmalını təqdim etməklə, regionda bunu edən ilk ölkələrdən biri oldu və onun müvafiq siyasətlərini müəyyən etməsinə kömək etmək üçün BMT-nin rəhbərliyi altında MAPS (aktuallaşdırma, sürətləndirmə, siyasətə dəstək) missiyası həyata keçirildi. BMT-nin dəstəyilə hazırda ikinci Könüllü Milli İcmal hazırlanmaqdadır.

Azərbaycan, həmçinin DİM-lərin milliləşdirilməsi işləri üçün bir sıra prinsipləri – Bakı Prinsiplərini hazırlayan ilk ölkə oldu.

Sabah forumun sonunda Bakı Prinsiplərini qəbul edəcəyimizə ümid edirik.

Yekun olaraq, ümid edirəm ki, bu forum regionda 2030-cu il Gündəliyinə doğru irəliləyişin sürətləndirilməsi üçün yolların və vasitələrin tapılması ilə bağlı aramızda daha geniş müzakirələr aparmağa imkan verəcək, regional səviyyədə bilik və təcrübə mübadiləsinə təkan verəcəkdir.

Təşəkkür edirəm!