BMT-nin Azərbaycandakı rezident əlaqələndiricisi Vladanka Andreevanın BMT-nin Ərzaq və Kənd Təsərrüfatı Təşkilatı ilə AZƏRSUN arasında Anlaşma Memorandumunun imzalanması mərasimində çıxışı

Hörmətli tərəfdaşlar və dostlar,

Xanımlar və cənablar,

AZƏRSUN ilə BMT-nin Ərzaq və Kənd Təsərrüfatı Təşkilatı arasında bu mühüm Anlaşma Memorandumunun imzalanması ilə bağlı bu gün sizinlə burada olmaqdan böyük məmnunluq duyuram. Bu memorandum ilə yeni strateji tərəfdaşlığın əsası qoyulur. 

Hər bir ölkənin davamlı inkişafında ərzaq və kənd təsərrüfatının oynadığı mühüm rol hamımıza məlumdur. Azərbaycanda bu sektor böyüklüyünə görə iqtisadiyyatda neft və tikintidən sonra üçüncü yeri tutur. 

Azərbaycanda milyonlarla insan, xüsusən də kənd yerlərində, bilavasitə kənd təsərrüfatından  asılıdır. Və əlbəttə ki, bu sektorun dayanıqlı gələcəyi ən azından dolayısı ilə hər birimizdən asılıdır.

Keçən il Qida Sistemləri Sammitindəki çıxışında Antonio Quterreş sektorun transformasiyasının vacibliyini vurğulamışdı. 

BMT-nin Baş katibi qida sistemlərinin daha yaxşı dünya ilə bağlı təsəvvürümüzü reallaşdırmaq potensialına malik olduğunu bildirsə də bunun yalnız dayanıqlı  qida sistemlərilə mümkün olacağını vurğulayıb. 

Bu o deməkdir ki, insanları və planeti dəstəkləmək üçün ərzaq və kənd təsərrüfatı sektorunu inkişaf etdirmək lazımdır. 

Bu o deməkdir ki, qida sistemləri təkcə müəssisələrin və səhmdarların rifahına deyil, həm də fermerlərin, qida işçilərinin və bu sənayedən asılı olan hər kəsin maraqlarına xidmət etməlidir.

Hökumətin, eləcə də beynəlxalq və milli tərəfdaşların həyata keçirdiyi proqramlar və səylər sayəsində Azərbaycan artıq daha dayanıqlı ərzaq və kənd təsərrüfatı sektoruna doğru mühüm addımlar atıb.

Kənd təsərrüfatı məhsullarının emalı sənayesinin səmərəliliyinin, potensialının və müxtəlifliyinin təkmilləşdirilməsi və özəl sektorun daha yaxından cəlb olunması daxil olmaqla sistemlərin dayanıqlığını təmin edilməsi üçün hələ çox iş görülməlidir.

Böyük və ya kiçik, yerli və ya beynəlxalq səviyyəli olmasından asılı olmayaraq, özəl sektor ərzaq təhlükəsizliyi və kənd yerlərində yoxsulluq ilə qlobal mübarizədə əsas müttəfiqə çevrilib. 

Məhz buna görə də Dayanıqlı İnkişaf Məqsədlərinə nail olmaq üçün 2030 Gündəliyi bütün tərəfdaşlıq formalarından və resurslardan istifadə olunmasını qarşıya məqsəd qoyur. Belə ki, bu məqsədlərə yalnız daha yaxşı bir dünya qurmaq üçün birlikdə çalışaraq nail ola bilərik.

BMT-nin Ərzaq və Kənd Təsərrüfatı Təşkilatı özəl sektorla uzunmüddətli tərəfdaşlıq tarixinə malikdir və indi o, inkişaf çağırışlarına innovativ həllərin tapılmasında özəl sektorun sürətləndirici rolunu dərk edərək öz səylərini artırır. 

Ötən il BMT-nin Ərzaq və Kənd Təsərrüfatı Təşkilatı özəl sektor ilə qarşılıqlı fəaliyyət üçün yeni strategiyanın (2021-2025) tətbiqinə başlayıb. Bu strategiyada Təşkilatın inkişaf sahəsində özəl sektorla qarşılıqlı fəaliyyət ilə bağlı davamlı və daha güclü öhdəliyi müəyyən edilir.

İnnovasiyaların dəstəklənməsi və əhatə dairəsinin genişləndirilməsi, elm və sübuta əsaslanan təcrübənin səfərbər edilməsi, habelə hal-hazırda DİM-lərə nail olmağa mane olan bəzi əsas maliyyə boşluqlarını aradan qaldırılması üçün imkan və bacarıqlardan yararlanmaqda özəl sektorla tərəfdaşlıq çox vacibdir.

Özəl sektorla əməkdaşlıq kiçik fermerlərin, mikro, kiçik və orta müəssisələrin innovasiyaları sürətləndirmək üçün potensialının artırılmasında, o cümlədən sübuta əsaslanan qərarların qəbulu və DİM-lərə doğru irəliləyişin monitorinqi üçün dəyərli məlumatların yaradılması ilə mühüm rol oynaya bilər. 

Yalnız bu şəkildə bütün cəbhələrdə davamlı təcrübələri təşviq etməklə biz birgə dayanıqlı məqsədlərimizə nail ola bilərik.

Hörmətli həmkarlar,

Bu Anlaşma Memorandumu ilə BMT-nin Ərzaq və Kənd Təsərrüfatı Təşkilatı və AZƏRSUN başqaları üçün də gözəl nümunədir.

Məhz bu tip tərəfdaşlıqlar texnologiyanın inkişafı və uyğunlaşması, biliklərin ötürülməsi və innovasiyalar, iş yerlərinin yaradılması və alternativ gəlir mənbələri sahələrində daha çox sektorlararası səylər üçün imkanlar açır.

Mən çox şadam ki, AZƏRSUN və BMT-nin Ərzaq və Kənd Təsərrüfatı Təşkilatı birlikdə öyrənmə, həmçinin yeni yanaşmaların, texnologiyaların və innovasiyaların tətbiqində qarşılıqlı anlaşmaya nail olublar. 

Bu əməkdaşlıq təbii ehtiyatlardan daha səmərəli və dayanıqlı istifadənin təmin edilməsi, iqlim dəyişikliyinə uyğunlaşmağa və Azərbaycanda daha səmərəli, inklüziv, davamlı və dayanıqlı aqro-ərzaq sistemlərinin qəbul edilməsinə kömək edəcək.

Mən AZƏRSUN və BMT-nin Ərzaq və Kənd Təsərrüfatı Təşkilatını bu mühüm yola birlikdə qədəm qoyduqları üçün təbrik etmək istərdim.

Mən bu anlaşmanın ölkənin əhalisi, ekologiyası və ümumi rifahı üçün səmərəli nəticələrini səbirsizliklə gözləyirəm.

BMT-nin Azərbaycandakı Nümayəndəliyi adından burada olduğunuz üçün sizə təşəkkür edirəm və hər addımda sizi dəstəkləmək öhdəliyimizi bir daha bəyan edirəm.

Təşəkkür edirəm.