BMT-nin Rezident Əlaqələndiricisi xanım Vladanka Andreevanın BMT Model Konfransının açılış tədbirində çıxışı

Birləşmiş Millətlər Təşkilatının model üzrə konfransı üçün salamlama nitqi

BMT-nin Azərbaycandakı rezident əlaqələndiricisi xanım Vladanka Andreeva, 

Azərbaycan Respublikasının Xarici İşlər Naziri cənab Ceyhun Bayramov;

Hörmətli tələbələr və professorlar,

BMT-dən olan həmkarlar,

Bu il biz iki mühüm hadisəni: Azərbaycanın BMT-yə üzvlüyünün 30 illiyini və BMT-nin Azərbaycanda fəaliyyətinin 30 illiyini qeyd edirik.

Biz bu mühüm mərhələlərin qeyd olunduğu ili, martın 2-də, Azərbaycanın Birləşmiş Millətlər Təşkilatı ailəsinə üzv olduğu gün, Bakının mərkəzində fotosərginin, bir sıra konfrans və görüşlərin təşkili ilə başladıq. 

BMT Model konfransı həmin bayram tədbirlərinin davamıdır.

Mən bütün tərəfdaşlarımıza - Xarici İşlər Nazirliyinə, ADA Universitetinə, ADA BMT Modeli Klubuna (ADAMUN) - BMT-Azərbaycan tərəfdaşlığının 30-cu ildönümünə həsr olunmuş bu tədbirin təşkil edilməsində bizim heyətlə sıx əməkdaşlıq etdiklərinə görə təşəkkür etmək istərdim.

Birləşmiş Millətlər Təşkilatında bundan uzun müddət əvvəl qəbul edilmişdir ki, gənclərin təxəyyülü, idealları və enerjisi onların yaşadıqları cəmiyyətlərin gələcək inkişafı üçün həyati əhəmiyyət kəsb edir, və mən bu gün qlobal problemlərin həllində qlobal əməkdaşlığın gücünə inanan 15 universitet və liseydən 80 tələbəni, həvəsli gəncləri burada görməkdən çox məmnunam.

Siz dəyişikliklərin həyata keçirilməsində güclü qüvvəsiniz və sizin səsiniz tam eşidilməlidir.

Biz gənclərə danışıqlar masası arxasında yer verməli və onları daha yaşıl, sağlam və təhlükəsiz dünya üçün həllərin hazırlanmasına ruhlandırmalıyıq. 

BMT-nin Azərbaycandakı ilk qadın rezident əlaqələndiricisi kimi mən bugünkü BMT Model konfransının xanım baş katibi Leyla Məmmədzadəni salamlamaqdan çox məmnunam. Gender bərabərsizliyi və onun geniş miqyaslı nəticələri dayanıqlı inkişafla bağlı istənilən müzakirənin əsasını təşkil edir. Yalnız kişilər və qadınlar arasında bərabərliyə nail olduqdan sonra biz Dayanıqlı İnkişaf Məqsədlərinə çatmaq üçün sağlam zəmin yarada biləcəyimizə ümid edə bilərik. 

Bu üçgünlük tədbir çərçivəsində transformativ həllər tapmaq üçün inkluziv və şəbəkələşmiş çoxtərəfli yanaşma tələb edən kibertəhlükəsizlikdən tutmuş iqlim dəyişikliyinə, ərzaq təhlükəsizliyinə və insanların məcburi köçkünlüyünə qədər bir sıra qlobal problemlər nəzərdən keçiriləcəkdir. 

Son dövrdə bütün dünyada yoxsulluq və aclıq artmaqdadır.

Qeyri-bərabərlik artır. 

İnamsızlığın və dezinformasiyanın artması insanları qütbləşdirir və cəmiyyətləri iflic edir. Geosiyasi parçalanmalar beynəlxalq əməkdaşlığa zərər vurur.

İnsan hüquqları pozulur.

Millətçilik və ksenofobiya artmaqdadır.

İqlim dəyişikliyi bizdən daha sürətlə gedir.

Bu problemlər xüsusilə gənclərə təsir edir.

Yer kürəsində 1,8 milyard gənc var - dünyanın indiyə qədər gördüyü ən böyük gənc nəsli. Onların yarıdan çoxu münaqişə zonalarında yaşayır - hər gün birbaşa zorakılıqla üzləşir, qida, su və dərman əldə etmək üçün mübarizə aparır. 

Bütün gənclərin dörddə birindən çoxu hələ də minimum savad və təhsil imkanlarından məhrumdur, həmçinin 73 milyon gənc işsizdir. 

Müasir gənclik bunlara layiq deyil, bu bizim istədiyimiz gələcək deyil.

Məhz bu səbəbdən biz hamımız hərəkətə keçməliyik.

Və biz bu gedişi dəyişdirə bilərik.

Bizim planlarımız var: 2030 Gündəliyi və onun 17 Dayanıqlı İnkişaf Məqsədi.

Beynəlxalq sülhün və təhlükəsizliyin təşviqi 2030 Gündəliyinin əsas komponentlərindən biridir. 

Göydən bombaların yağdığı şəraitdə 17 DİM-dən heç birinə nail ola bilmərik.

İnsanlar qorxu içində evlərini tərk edirlərsə, sosial və ya iqtisadi tərəqqiyə nail ola bilməzlər.

Və inkişaf döyüş meydanlarında kök sala bilməz.

İnkişafın özü bu halların qarşısının alınması üçün dəyərli vasitə ola bilər.

Çünki hər bir DİM-in mərkəzində münaqişənin kök səbəbini aradan qaldırılması şansı mövcuddur. 

2030 Gündəliyinin həyata keçirilməsində məqsədimiz məhz sizin üçün yeni bir gələcək inşa etməkdir.

Buna görə də yaşayacağınız dünyanın formalaşmasında iştirak etməyinizə ehtiyacımız var.

Vaxt gələcək, bizim çoxumuz təqaüdə çıxacağıq, lakin siz bu məqsədlərə nail olmağı asanlaşdıracaq və ya çətinləşdirəcək seçimlər və qərarlar qəbul etməyə davam edəcəksiniz.

Bu BMT Modeli konfransı sizin üçün əla məşq meydançasıdır.

Bu sizə açıq fikirli və çevik olmaqda kömək edəcək.

Kritik təhlillər aparın, ssenarilər qurun, fərqli nöqteyi-nəzərləri, hətta qarşı çıxdığınız fikirləri də başa düşməyə çalışın və bütün tərəflərə fayda verəcək konstruktiv həlləri təşviq edin. Bu bacarıqların inkişaf etdirilməsi sizi təkcə liderlik rollarına deyil, həm də həyata hazırlayacaq. 

Ümid edirəm ki, qarşıdakı üç gün ərzində mövcud vəziyyətə meydan oxuyan və dəyişikliklərə çağıran geniş müzakirələrin şahidi olacağıq.

Birləşmiş Millətlər Təşkilatı sizin müttəfiqiniz olaraq qalır, çünki biz kollektiv olaraq hamı üçün dayanıqlı, inkluziv və çevik bir dünya qurmağa çalışırıq. 

Təşəkkür edirəm.