BMT və Azərbaycan Hökuməti əməkdaşlıq çərçivəsinin icrasını müzakirə edib

İqtisadiyyat naziri Mikayıl Cabbarov və BMT-nin Azərbaycandakı rezident əlaqələndiricisi Qulam İshaqzainin sədrliyi ilə keçirilən iclasda BMT-nin idarə heyəti və hökumətdən 25-ə yaxın yüksək vəzifəli rəsmi şəxs iştirak edib.

İclas zamanı İstiqamətləndirici Komitə 2021 ili üçün birgə iş planlarını təsdiqləyib və UNSDCF-in maaliyyələşdirilməsi çərçivəsini nəzərdən keçirib. Görüş iştirakçıları əməkdaşlıq çərçivəsində nəzərdə tutulan işlərin vaxtında icra olunması üçün qarşıda duran çətinliklər və imkanları müzakirə edib.

‘Birgə iş planları UNSDCF-in mahiyyətinə uyğun tərtib olunub və əvvəlki illərdən fərqli olaraq üç əsas dəyişikliyi əks etdirir: burada BMT-nin vahid komanda kimi fəaliyyət göstərməsi, heç kimi kənarda qoyulmaması və Dayanıqlı İnkişaf Məqsədlərinə nail olmaq üçün Azərbaycanın səylərini dəstəkləməsinə daha çox diqqət ayrılır,’ cənab İshaqzai bildirib.

2021-2025-ci illəri əhatə edən UNSDCF BMT və Azərbaycan arasında əməkdaşlığa dair imzalanmış sayca 5-ci sənəddir. Bu sənəd əməkdaşlığın 4 prioritet sahəsini müəyyən edib: həssaslığı azaldan və dayanıqlığı təmin edən inklüziv artım; dövlət və sosial xidmətlərin daha yaxşı göstərilməsi üçün daha güclü institutlar; ətraf mühitin mühafizəsi və iqlim dəyişikliyi ilə mübarizə; habelə qadın və qızların səlahiyyətlərini artıran və gender bərabərliyinə əsaslanan cəmiyyətin qurulması.