BMT və ASAN radio Azərbaycanda DİM-ləri təşviq edir

Layihə “Qlobal məqsədlər” adlı 20 dəqiqəlik həftəlik verilişdən və DİM-lərin hər birinin mahiyyətini izah edən iki dəqiqəlik gündəlik buraxılışlardan ibarət olacaq.

“Qlobal məqsədlər” verilişi hər həftənin bazar ertəsi saat 18:20-də yayımlanacaq. Verilişdə BMT-nin Azərbaycandakı qurumlarının, dövlət orqanlarının, vətəndaş cəmiyyətinin, eləcə də donorların və benefisiarların nümayəndələrinə yer veriləcək. Onlar yerli dövlət orqanları və beynəlxalq təşkilatlar tərəfindən 2030-cu il Gündəliyinin icrası istiqamətində görülən tədbirlər barədə məlumat verəcəklər.

İki dəqiqəlik gündəlik buraxılışlarda isə məqsədlərin hər biri dinləyicilərə sadə dillə izah ediləcək və hər bir şəxsin bu məqsədlərə nail olmaq üçün necə töhfə verə biləcəyi barədə tövsiyələr səsləndiriləcək.

“ASAN Radio” dövlət radiosudur və 100 FM tezliyində yayımlanır. Radio Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərir və əsasən maarifləndirici verilişlərə üstünlük verir.