BMT-nin Rezident Əlaqələndiricisi Qulam İshaqzainin Beynəlxalq Könüllülər günü tədbirindəki çıxışı

Hörmətli xanımlar və cənablar!

BMT-ni təmsil edən hörmətli həmkarlar və hörmətli nümayəndələr!

Fəlakətlər baş verdikdən sonra onlara ilk reaksiyanı kim verir?

Piyadalar əleyhinə minaların qadağan olunması, ətraf mühit, iqlim dəyişikliyi, heyvan hüquqları, mülki hüquqlar, anti-aparteid, anti-müharibə və digər irimiqyaslı qlobal hərəkatların arxasında kimlər durur?

Çətinliyi olan qonşusuna ilk növbədə kim kömək edər?

Könüllülər!

Bu gün onların fəallığını, dəyərlərini, fədakarlıqlarını, cəmiyyətlərə və bütövlükdə dünyaya verdikləri töhfəni qeyd etdiyimiz gündür!

Bu gün Bakıda Beynəlxalq Könüllülər Gününün qeyd edilməsində sizə qoşulmaqdan həqiqətən də böyük məmnunluq hissi duyuram. İcazənizlə, bu əlamətdar gündə Azərbaycanlı könüllüləri xüsusi olaraq salamlayıram!

2001-ci ildə  könüllülər günü ilk dəfə beynəlxalq şəkildə qeyd olunarkən, keçmiş Baş Katib Kofi Annan müraciətində bunları söyləyib: “Könüllülüyün özəyində xidmət və həmrəylik amalları və birlikdə dünyanı daha yaxşı bir yerə çevirə biləcəyimizə olan inam dayanır”.

Onun könüllülüklə bağlı müraciəti könüllülərin inkişaf sektorunda hamımız üçün həqiqi ilham qaynağı olmasını, BMT-nin bütövlükdə xidmət, həmrəylik və gələcək nəsillər üçün daha yaxşı planet qoymaq amalına əsaslandığını ən yüksək səviyyədə ifadə edirdi.

Bu gün Azərbaycanda ölkə üçün daha yaxşı gələcək naminə yorulmadan səy göstərən bütün könüllülərə Azərbaycandakı BMT sistemi adından ən dərin minnətdarlığımı ifadə edirəm!

Ölkədə könüllülüyə dəyər verən, onu stimullaşdıran və dəstəkləyən bütün milli və beynəlxalq qurumlara da təşəkkür edirəm!

Əziz könüllülər!

Builki Beynəlxalq Könüllülər Günü sadəcə könüllülüyün qeyd edilməsinə deyil, həmçinin Dayanıqlı İnkişaf Məqsədlərinə nailolma istiqamətində çalışan  könüllülərin əməyinin vurğulanmasına yönəlir.

Milli könüllülər hamımız üçün daha dayanıqlı gələcəyin qurulmasına yönələn fəaliyyətin bir hissəsi olmaq üçün sərhədsiz potensiala malikdirlər.

Azərbaycanda BMT-nin Könüllülər Proqramı könüllülüyün miqyasını, əhatə dairəsini və 2030-cu il Gündəliyinə təsirini artırmaq üçün hökumət, özəl sektor, QHT-lər və beynəlxalq təşkilatlar arasında könüllülərin cəlb olunmasını stimullaşdırır.

Bir milyard nəfərdən artıq şəxs dünyanın müxtəlif yerlərində könüllülüklə məşğul olur və onların birgə fəaliyyəti 109 milyon nəfər tam ştatlı işçilərdən ibarət işçi qüvvəsinin fəaliyyətinə bərabərdir.

Könüllülərin fəaliyyəti sadəcə iqtisadiyyata əhəmiyyətli töhfə verməklə (qlobal ÜDM-in təqribən 2.5%-i həcmində) kifayətlənmir, həmçinin digər investisiyaların səmərəliliyinin və effektivliyinin artırılmasına da köməkdir ki, bu da dayanıqlılıq üçün mükəmməl töhfə sayılır.

Zati-aliləri! Hörmətli xanımlar və cənablar!

Fürsətdən istifadə edərək, Azərbaycan Hökumətinin və digər maraqlı tərəflərin könüllülüyün potensialının dəyərləndirilməsində göstərdikləri əvəzsiz səyləri qeyd etmək istərdim.

Bu səylərin nəticələrindən biri 20093-cu ildə qəbul edilmiş “Könüllü fəaliyyət haqqında” Qanundur. Bu qanun Azərbaycan könüllülərinin hüquqlarını müəyyən etmiş, Hökumətin və könüllülüyə dəstək göstərən və könüllülərdən istifadə edən qurumların vəzifələrini vurğulamışdır.

Bu qanunun qəbulu sadəcə qurumlar və onların könüllüləri üçün normativ-hüquqi bazanı yaxşılaşdırdığına görə deyil, həmçinin Hökumətin bu siyasət və qanunvericilik məsələlərini uğurla təşviq etdiyini göstərdiyinə görə müsbət hadisədir.

Son səkkiz ildə biz minlərlə könüllünün səfərbər olunduğu yerli və beynəlxalq mədəniyyət və idman tədbirləri çərçivəsində könüllülük fəaliyyətində böyük irəliləyişlərin şahidi olduq. Bu onu göstərir ki, nazirliklər və agentliklər milli prioritetlərin yerinə yetirilməsində vətəndaş yanaşmalarının yaratdığı əlavə dəyəri təsdiq edirlər.

Bu il Azərbaycan, həmçinin “2030-cu ilədək Dayanıqlı İnkişaf sahəsində Gündəlik” üçün könüllülük üzrə Milli Vəziyyət Təhlilinin rəsmi şəkildə təqdim edilməsi vasitəsilə könüllülərin rolunu vurğulayıb. Təhlilin nəticələri 2020-ci ildə qlobal iclasda BMT-nin Baş Katibinin hesabatına daxil ediləcək.

Azərbaycan MDB ölkələri arasında bu hesabatı göndərən ilk ölkə oldu.

Zati-aliləri! Hörmətli xanımlar və cənablar!

Könüllülər böyük təsvirin mühüm bir parçasıdır.

Azərbaycan Hökumətinin və onun tərəfdaşlarının davamlı dəstəyi və yatırımı ilə birgə, könüllülük cəmiyyətin gücləndirilməsi və DİM-lərə nailolma üçün səylərin artırılması istiqamətində daha da irəliləyə bilər.

Bu tədbir Azərbaycanda könüllülərin və onların töhfəsinin təsdiq olunduğu və qiymətləndirildiyi tədbirlərdən sadəcə biridir. BMT-nin Azərbaycandakı nümayəndəliyi bu mühüm hərəkatın dəstəklənməsində bütün tərəfdaşlarla əməkdaşlıq etməyə hazırdır.

Mən, həmçinin bu tədbirin təşkilində göstərdikləri dəstəyə görə bütün tərəfdaşlarımıza və tədbirə ev sahibliyi etdiyinə görə ADA Universitetinə təşəkkür etmək istərdim.

Çıxışıma Aristotelin bu ifadəsi ilə yekun vurmaq istərdim: “Həyatın mənası digərlərinə xidmət etmək və yaxşılıq etməkdir”.

Təşəkkürlər.