BMT Baş katibinin Ümumdünya Əhali Günü münasibətilə müraciəti

Bu, müxtəlifliyimizi qeyd etmək, ümumbəşəri dəyərlərimizi tanımaq, habelə ömür müddətini uzadan, ana və uşaq ölüm sayını kəskin şəkildə azaldan səhiyyə sahəsindəki nailiyyətlərlə qürur duymaq üçün bir fürsətdir.

Eyni zamanda, bu gün, planetimizin qayğısına qalmaq üçün ortaq məsuliyyətimizi və bir-birimiz qarşısında götürdüyümüz amma hələ də yerinə yetirə bilmədiyimiz öhdəlikləri xatırladır.

COVİD-19, iqlim böhranı, müharibələr və münaqişələr, fövqəladə humanitar vəziyyətlər, aclıq və yoxsulluq dünyamızın təhlükə altında olduğunu göstərir.

Biz hələ gender bərabərsizliyinin geniş yayıldığı dünyada yaşayırıq və biz əsas səhiyyə xidmətləri sahəsində də daxil olmaqla, qadın hüquqlarına qarşı yeni həmlələrin şahidi oluruq. Hamiləlik və doğumla bağlı fəsadlar hələ də 15-19 yaşlı qızlar arasında baş verən ölüm hallarının əsas səbəbidir.

Dünya əhalisinin səkkiz milyarda çatması kəmiyyət baxımdan ciddi hadisədir. Lakin bizim diqqətimiz mərkəzində hər zaman insanlar olmalıdır.

Qurmağa çalışdığımız dünyada 8 milyard insanın olması ləyaqətli və dolğun həyat sürmək üçün 8 milyard imkan anlamına gəlir. 

Ortaq dəyərlərimiz əsasında fəaliyyət göstərəndə ümumi gələcəyimizə töhfə vermiş oluruq.

Gəlin planetimizin bizim və gələcək nəsillərin ehtiyaclarını qarşılaması üçün daha böyük bərabərlik və həmrəylik istiqamətində birlikdə çalışaq.

Gəlin insan hüquqlarını və bütün fərdlərin dünyaya uşaq gətirib-gətirməməsi və bunu nə zaman edəcəyi ilə bağlı düşünülmüş qərar vermək imkanlarını qoruyaq.

Gəlin, heç kimi kənarda qoymadan, səkkiz milyard insan üçün dayanıqlı və inklüziv gələcək qurmaq məqsədilə Dayanıqlı İnkişaf üçün 2030-cu il Gündəliyini tam şəkildə həyata keçirmək vədimizi bir daha bəyan edək.