BMT və Azərbaycan 2021-2025-ci illər üçün yeni Əməkdaşlığa dair Çərçivə sənədini imzalayıb

Bu gün Birləşmiş Millətlər Təşkilatının (BMT) ölkə üzrə idarə heyəti və Azərbaycan Hökuməti 2021 - 2025-ci illər üçün BMT-nin Dayanıqlı İnkişaf üzrə Əməkdaşlığa dair Çərçivə (UNSDCF) sənədini imzalayıblar.

Azərbaycan Respublikasının İqtisadiyyat naziri Mikayıl Cabbarov və BMT-nin Azərbaycandakı Rezident Əlaqələndiricisi Qulam İshaqzai, Hökumət, vətəndaş cəmiyyəti və özəl sektoru təmsil edən maraqlı tərəflərin iştirak etdiyi 18 aylıq məsləhətləşmənin nəticəsi olan sənədə imza atıblar.

Əməkdaşlığa dair Çərçivə sənədi tərəfdaşlıq üçün dörd prioritet sahəni müəyyən edir: həssaslığı azaldan və dayanıqlığı təmin edən inklüziv artım; dövlət və sosial xidmətlərin daha yaxşı göstərilməsi üçün daha güclü institutlar; ətraf mühitin mühafizəsi və iqlim dəyişikliyi ilə mübarizə; və qadın və qızların səlahiyyətlərini artıran və gender bərabərliyinə əsaslanan cəmiyyət.

İmzalanma mərasimində çıxış edən sənb Cabbarov Azərbaycanın BMT-nin müxtəlif ixtisaslaşmış qurumları ilə səmərəli əməkdaşlıq etdiyini, əməkdaşlıq çərçivəsində bir sıra sənədlərin imzalandığını və birgə layihələrin həyata keçirildiyini qeyd edib. O vurğulayıb ki, Çərçivə Sənədinin icrası Dayanıqlı İnkişaf Məqsədlərinin icrasına, aparılan islahatlara və “Azərbaycan 2030: sosial-iqtisadi inkişafa dair Milli Prioritetlər”in reallaşdırılması istiqamətində layihələrin həyata keçirilməsinə, insan kapitalının inkişafına töhfə verəcək. Nazir işğaldan azad olunmuş ərazilərə böyük qayıdışın reallaşdırılmasında BMT-nin ixtisaslaşmış qurumları ilə  əməkdaşlığın önəmli olduğunu, artıq bu istiqamətdə müvafiq addımların atıldığını qeyd edib.

Cənab İshaqzai Azərbaycanın COVID-19 pandemiyası və son münaqişənin fəsadlarını aradan qaldırdığı bir vaxtda əməkdaşlığa insan mərkəzli yanaşmanın əhəmiyyətini vurğulayıb.

“Bu çərçivə sənədinin təməli dayanıqlığın artırılmasına və iqtisadiyyatın transformasiyasına qoyulan sərmayədir. Bu sənəd insanlari bu hadisələrin təsirlərindən qorumağa, insan kapitalını gücləndirməyə və institutları cəmiyyətin ən həssas təbəqələrinin ehtiyaclarına daha çox cavab verməyə yönəltməyə çalışır”.

BMT-nin Ölkə üzrə idarə heyəti pandemiyanın sosial-iqtisadi inkişafa təsirini aradan qaldırmaq və münaqişənin təsirinə məruz qalmış bölgələrdə bərpa ehtiyaclarını aradan qaldırmaq üçün Azərbaycan Hökuməti ilə sıx əməkdaşlığı davam etdirir.

"Heç kimin kənarda qalmaması və hüquqlara əsaslanan yanaşmanın tətbiqi bərpa prosesi və daha yaxşı gələcəyə nail olmaq üçün ortaq strategiyamızın əsas şərtləridir", cənab İshaqzai əlavə edib.

UNSDCF BMT ilə Azərbaycan arasında beşinci əməkdaşlıq çərçivəsidir və Azərbaycanın 2030-cu ilədək dayanıqlı inkişaf gündəliyinə doğru tərəqqisinin təhlilinə əsaslanır. Əməkdaşlığa dair Çərçivə sənədinin tətbiqi BMT inkişaf sistemi islahatını təcrübədə nümayiş etdirir, bütün inkişaf nəticələrinin çatdırılmasında şəffaflığı, hesabatlılığı və birgə fəaliyyətin əhəmiyyətini vurğulayır.