Dayanıqlı İnkişaf Məqsədləri üzrə ilk dialoq Azərbaycanın yaşıl transformasiya istiqamətində irəliləyişini müzakirə edib

Azərbaycanın Dayanıqlı İnkişaf üzrə Milli Əlaqələndirmə Şurası, İqtisadiyyat Nazirliyi, BMT və Dünya Bankının birgə təşkilatçılığı ilə keçirilən tədbirin iştirakçıları Azərbaycanın yaşıl inkişaf göstəricilərinə nail olması istiqamətində əldə etdiyi irəliləyişləri nəzərdən keçirib və ölkədə yaşıl transformasiya və DİM-lərə doğru irəliləyişin sürətləndirilməsinə dair əlavə siyasət tədbirlərini müzakirə ediblər.

Onlar “Azərbaycan 2030: Sosial-iqtisadi inkişafın milli prioritetləri” və “2022-2026-cı illər üçün Sosial-iqtisadi inkişaf strategiyası”-da ətraf mühitin qorunması və “yaşıl inkişafın” beş prioritetdən biri kimi müəyyən edilməsini alqışlayıblar.

Tədbir həmçinin 2022-ci il noyabrın 6-dan 18-dək Misirin Şarm-əş-Şeyx şəhərində keçiriləcək UNFCCC-nin Tərəflər Konfransına (COP-27) ölkənin hazırlığı barədə məlumatlandırmaq imkanı verib. Azərbaycan 1990-cı illə müqayisədə 2030-cu ilə qədər emissiyaları 35% azaltmaq hədəfini seçib. Qlazqoda keçirilən COP-26-da isə Azərbaycan könüllü öhdəlik kimi 2050-ci ilə qədər emissiyaları 40% azaltmaq niyyətində olduğunu elan edib.

İştirakçılar həmçinin Azərbaycanda yaşıl inkişafın təşviqi üzrə birgə öhdəlikləri müzakirə ediblər, elədəcə də ölkədə yaşıl transformasiya və DİM-lər üzrə irəliləyişin daha da sürətləndirilməsi üçün əsas tövsiyələri vurğulayan qısa analitik yazının hazırlanmasına dair razılıq əldə ediblər.

DİM-lər üzrə ilk dialoqla Milli Əlaqələndirmə Şurasının təşəbbüsü və BMT-nin Rezident Əlaqələndiricisinin Ofisi, İqtisadiyyat Nazirliyi və Dünya Bankının dəstəyi ilə DİM-lər üzrə dialoq seriyası başlamış oldu. Birinci tədbirin iştirakçıları DİM-lər üzrə ikinci dialoqu Azərbaycanda inklüziv iqtisadi artıma həsr etmək qərarına gəliblər.