BMT-nin Azərbaycandakı Nümayəndəliyi “BMT Günü”nü “Gələcəyin sədaları: İqlim fəaliyyəti və qlobal məqsədlərə yönələn səylərin əlaqələndirilməsi” mövzusunda təşkil olunan 5-ci Dayanıqlı İnkişaf Məqsədləri Dialoqu ilə qeyd edir

Tədbir, Azərbaycanın dayanıqlı və iqlimə davamlı gələcəyə olan yolunu müzakirə etmək üçün hökumət rəsmilərini, BMT Azərbaycandakı qurumlarının, vətəndaş cəmiyyəti, özəl sektor, inkişaf tərəfdaşları və diplomatik korpus nümayəndələrini bir araya gətirib. Noyabr ayında Bakıda keçiriləcək 29-cu BMT-nin İqlim Dəyişikliyi Konfransı ərəfəsində keçirilən bu Dialoq, Azərbaycanın milli iqlim fəaliyyət planının uğurla həyata keçirilməsinə və Dayanıqlı İnkişaf Məqsədlərinin (DİM) irəliyə aparılmasına dəstək üçün iqlim maliyyəsinin miqyasını artırmaq məsələsinə diqqət yetirib. 

BMT-nin 2022-ci ildə başlanan və davam edən DİM Dialoq seriyalarından biri olan bu tədbir, iqlim maliyyəsinin inkişaf ilə gətirdiyi üstünlükləri maksimum dərəcədə artırmaq üçün yüksək səviyyəli dialoq və bilik mübadiləsi platforması yaradıb.

Xarici işlər nazirinin müavini və COP29-un baş danışıqçısı Yalçın Rəfiyev ölkəmizin beynəlxalq qurumlar, o cümlədən, BMT ilə çoxtərəfli münasibətləri, BMT-nin çoxvektorlu qlobal missiyasının əhəmiyyəti barədə danışıb.

BMT-nin Azərbaycandakı Rezident Əlaqələndiricisi xanım Vladanka Andreeva, qlobal problemlərin həlli üçün çoxtərəfli əməkdaşlıq və tərəfdaşlığın vacibliyini vurğuladı: “2050-ci ilədək sıfır karbon hədəfinə çatmaq və qlobal istiləşməni 1,5°C-də saxlamaq üçün fürsət pəncərəsi sürətlə bağlanır. Qarşıdan gələn COP29 iqlim gündəliyi və 2030-cu il Dayanıqlı İnkişaf Gündəliyi üçün həlledici məqam olacaq. Bütün tərəfdaşlarla birlikdə və hökumətin dəstəyi ilə Azərbaycanın iqlim ambisiyasını dəstəkləmək üçün səylərimizi genişləndirəcəyik.”

İqtisadiyyat nazirinin müavini Səməd Bəşirli Azərbaycanda iqlim dəyişmələri və onların mənfi təsirlərinə qarşı effektiv işlər görüldüyünü, yaşıl keçid istiqamətində məqsədyönlü tədbirlər gerçəkləşdirildiyini vurğulayıb. “BMT-nin nüfuzlu tədbiri olan COP29-a ev sahibliyinin ölkəmizə həvalə edilməsi, beynəlxalq aləmdə Azərbaycana olan etimadın növbəti göstəricisidir və bu hadisə BMT ilə əməkdaşlığımızda yeni səhifə açır. Bugünkü tədbir isə eyni zamanda, COP29 çərçivəsində müzakirələrə töhfə verəcək”, deyə o qeyd edib.

İki əsas məruzə Azərbaycanın yeni müəyyən edilmiş milli töhfələrində (NDC 3.0) və Uzunmüddətli İqlim Strategiyasında ifadə olunan iqlim ambisiyası üzrə təqdim olunub. Birinci məruzə, COP29-un icraçı direktoru və energetika nazirinin müavini Elnur Soltanov tərəfindən “Azərbaycanın Milli Səviyyədə Müəyyən Edilmiş Töhfələrinin  əsas xüsusiyyətləri və uzunmüddətli iqlim strategiyasının inkişafa əlavə faydaları” mövzusunda təqdim olunub; ikinci isə, ekologiya və təbii sərvətlər nazirinin müavini Vüqar Kərimov tərəfindən “Qlobal iqlim dəyişikliklərinə qarşı mübarizədə Azərbaycanın uzunmüddətli iqlim strategiyası” mövzusunda təqdim edilib. Bundan sonra, “Azərbaycanda iqlim fəaliyyətinin genişləndirilməsi” adlı yüksək səviyyəli panel müzakirəsi, Azərbaycanın milli iqlim fəaliyyət planının həyata keçirilməsi və dayanıqlı inkişafın təmin edilməsi üçün lazım olan yollar və tərəfdaşlıqları əhatə edib. 

COP29-un son geri sayımı başladıqca, bu DİM Dialoqu Azərbaycanın həm iqlim fəaliyyətinə, həm də dayanıqlı inkişafa sadiqliyinin daha bir göstəricisi olub. Tərəfdaşlarla aparılan müzakirələr sayəsində genişləndirilə bilən maliyyə həllərinin və sektorlararası əməkdaşlığın vacibliyi vurğulanıb. Dialoqdan əldə olunan əsas tövsiyələr Azərbaycanın milli iqlim fəaliyyət planının həyata keçirilməsinə töhfə verəcək.