Beynəlxalq Miqrasiya Təşkilatı məcburi köçkün icmaları üçün kənd yerlərinin kompleks inkişafı layihəsini təqdim edir

Dörd illik layihə ənənəvi və dayanıqlı su təchizatı sistemi olan 40 kəhrizin bərpası vasitəsilə təxminən 8 mindən çox ailəyə təhlükəsiz və davamlı su təminatı məqsədini daşıyır. BMqT-nin bu sahədəki müvəffəqiyyətli keçmiş təcrübəsi və xüsusi səriştəsinə əsaslanan bu layihə  kəhrizlərin bərpası ilə məhdudlaşmır. Layihə eyni zamanda Azərbaycan Hökumətinə kəhrizlərin bərpası ilə əlaqədar baş planın hazırlanmasına töhfə verəcək; yerlərdə kəhriz mühəndisləri və kankanların potensialını gücləndirəcək; mikro və kiçik sahibkarlığın yaradılmasına yardım vasitəsilə məcburi köçkünlərin, xüsusilə də qadınların kiçik sahibkarlıq fəaliyyətinə dəstək verəcək. BMqT-nin layihədə nəzərdə tutduğu strategiya qadınları əsas benefisiar və su təminatının idarəediciləri olaraq görür.

BMqT-nin Azərbaycandakı nümayəndəliyinin rəhbəri Serhan Aktoprak: “Ətraf mühit insan yerdəyişməsi və insanların cəmləşməsinə hər zaman öz təsirini göstərsə də, biz ətraf mühit, iqlim dəyişikliyi və miqrasiya arasında olan bu mürəkkəb əlaqəni yeni anlamağa başlayırıq. Azərbaycanda kəhrizlərin bərpasının öncüsü olaraq BMqT kənd ərazilərində yaşayan minlərlə ailəyə faydalı olacaq bu sahədə işini davam etdirmək imkanını yüksək dəyərləndirirəm.”

KOICA Azərbaycan nümayəndəliyinin rəhbəri Kumok Park: “Bizim inkişaf fəaliyyətimizin mərkəzində insan dayanmalıdır. İqtisadi və sosial inkişaf insanlığın rifahı naminə əldə olunmalıdır. Sülhün təmini və möhkəmləndirilməsinə bu rifahın davamlılığı ilə nail olunmalıdır. Kəhriz layihəsi KOICA-nın 3P prinsipi (ingiliscə People - insanlar, Prosperity – rifah, Peace - sülh) ilə tam üst-üstə düşür və mən KOICA-nın BMqT ilə birgə çalışaraq bu layihəni dəstəkləyə bilməsindən məmnunam.”

Bununla yanaşı layihə Azərbaycanın qarşıdan gələn Miqrasiya üzrə Qlobal Kompakt və BMT-nin Dayanıqlı İnkişaf Məqsədlərinin (DİM) prinsiplərini həyata keçirmə səylərinə aşağıdakı formada öz töhfəsini verəcəkdir:

• Yoxsulluğa son qoyulması və qida təhlükəsizliyinin təmin edilməsinə birbaşa təsiri olan ev təsərrüfatlarının daxili ehtiyacı və suvarma suyu ilə təmin edilməsi – Məqsəd 1
• Qadınların imkanlarının artırılması və qərar vermə proseslərində iştirakının təmin edilməsi, aid olduqları icmalarda liderlik rollarının artırılması – Məqsəd 5
• Ekoloji cəhətdən təmiz və dayanıqlı su təchizatı sistemlərinin bərpası, kəhrizlər və təhlükəsiz içməli suya əlçatanlığın gücləndirilməsi –Məqsəd 6

Layihə ilə bağlı əlavə məlumat üçün BMqT-nin əməkdaşı Hwahyun Kim ilə (012) 465 90 71/72 (daxili nömrə: 28) nömrələri və ya hwakim@iom.int e-poçt ünvanı vasitəsilə əlaqə saxlaya bilərsiniz.