BMT-nin “29 İqlim söhbəti” təşəbbüsü çərçivəsində iqlim dəyişikliyi və miqrasiya mövzusu müzakirə olunub

Beynəlxalq Miqrasiya Təşkilatı (BMqT) və Azərbaycan Respublikası Dövlət Miqrasiya Xidməti tərəfindən təşkil edilən tədbir iqlim dəyişmələri və əhali yerdəyişməsi arasındakı mürəkkəb əlaqələri araşdırmaq üçün ekspertləri, dövlət rəsmilərini və beynəlxalq təşkilatları bir araya gətirib.

Tədbirdə açılış nitqləri ilə Azərbaycan Respublikası Dövlət Miqrasiya Xidmətinin rəisi Vüsal Hüseynov və BMT-nin Azərbaycandakı Rezident Əlaqələndiricisi Vladanka Andreeva çıxış ediblər. Onlar, Azərbaycanın COP29-a ev sahibliyi etməyə hazırlaşdığı bir dövrdə, iqlim dəyişmələrinin miqrasiyaya artan təsirinin vacibliyini vurğulayıblar.

Azərbaycan Respublikası Xarici İşlər Nazirliyinin Xüsusi tapşırıqlar üzrə səfiri Elşad İsgəndərov da tədbirdə çıxış edərək, Azərbaycanın iqlim dəyişikliyi ilə bağlı qlobal müzakirələrin canlandırılmasında və iqlim dəyişikliyi kontekstində əhali yerdəyişmələri ilə bağlı məsələlərin həllindəki rolunu diqqətə çatdırıb.

Tədbir zamanı, BMqT-nin Miqrasiya Araşdırmaları və Nəşrləri Bölməsinin tədqiqatçısı Adrian Kitimbo və BMqT-nin İqlim Dəyişikliklərinə Qarşı Fəaliyyət Bölməsinin regional iqlim dəyişikliyi üzrə mütəxəssisi Sumyadip Banerji kimi ekspertlər tərəfindən qlobal miqrasiya meylləri və iqlim dəyişikliyi kontekstində əhali yerdəyişmələri ilə bağlı çağırışlar və imkanlar barədə fikir mübadiləsi aparılıb. Bu müzakirələrdə miqrasiyanın iqlimə uyğunlaşma tədbiri kimi milli və beynəlxalq siyasət çərçivələrinə inteqrasiyasının zəruriliyi bir daha vurğulanıb. 

BMqT-nin Azərbaycandakı missiyasının rəhbəri Troy Dulinin moderatorluğu ilə keçirilən panel müzakirələrində Dövlət Miqrasiya Xidmətinin, BMqT-nin, Ərzaq və Kənd Təsərrüfatı təşkilatının və Rezident Əlaqələndiricinin Ofisinin nümayəndələri iştirak edərək, iqlim təsirlərinə qarşı miqrasiyanın necə idarə oluna biləcəyi ilə bağlı müxtəlif perspektivlər təklif ediblər.

“29 İqlim söhbəti: COP29-a gedən yol” tədbirlər silsiləsi Azərbaycanın 2024-cü ilin noyabr ayında BMT-nin İqlim Dəyişikliyi Konfransına (COP29) ev sahibliyi etməyə hazırlaşdığı bir vaxtda ölkədə iqlim fəaliyyəti ilə bağlı genişmiqyaslı dialoqu təşviq etmək üçün BMT-nin həyata keçirdiyi təşəbbüsdür. Bu tədbirlər müxtəlif sektorlar arasında əməkdaşlığı və qlobal iqlim böhranına qarşı mübarizədə birgə məsuliyyəti və fəaliyyəti təşviq etməyə yönəlib.