FAO Dayanıqlı İnkişaf Məqsədlərinin icrasının sürətləndirilməsində Azərbaycan hökümətini yerli səviyyədə dəstəkləyir

Tədbir BMT-nin Ərzaq və Kənd Təsərrüfatı Təşkilatı (FAO), Kənd Təsərrüfatı Nazirliyi və İqtisadiyyat Nazirliyinin birgə təşəbbüsü ilə keçirilib.  Seminar ərzaq, kənd təsərrüfatı, meşəçilik, balıqçılıq və kənd yerlərinin inkişafı sahələrinə xüsusi diqqət yetirməklə, DİM-lərin icrasında regional və yerli maraqlı tərəflərin məlumatlılığını artırmaq məqsədi daşıyıb.

Seminarda əlaqədar nazirliklərin nümayəndələri, vətəndaş cəmiyyətləri təmsilçiləri və ərzaq və kənd təsərrüfatı məhsullarının yerli istehsalçıları iştirak edib.

Öz açılış nitqlərində, Kənd Təsərrüfatı nazirinin müavini, İqtisadiyyat nazirinin müavini, İsmayıllı rayonunun İcra Hakimiyyətinin başçısı və FAO-nun Tərəfdaşlıq və Əlaqələndirmə Ofisinin rəhbəri iştirakçıları salamlayaraq dayanıqlı inkişafda dövlət-özəl-fərdi şəxslər arasında  əməkdaşlığın önəmini vurğulayıblar.

Həmçinin, iştirakçılar FAO layihəsi çərçivəsində hazırlanmış DİM 12 (məsuliyyətli istehlak və istehsal) ilə bağlı ərzaq israfı mövzusunda qısa filmə baxıblar.

Bu seminar, FAO-nun Azərbaycanda DİM-lərin həyata keçirilməsində potensialların artırılmasına dəstək layihəsi çərçivəsində həyata keçirilən təlimlərdən biridir. Layihə Vyana Təbii Sərvətlər və Həyat Elmləri Universitetinin (BOKU) texniki və elmi dəstəyi ilə icra edilir. Növbəti oxşar seminar Şamaxı rayonunda keçiriləcək.