Azərbaycan və BMT-nin Avropa İqtisadi Komissiyası Dayanıqlı İnkişaf Məqsədlərinə dair əməkdaşlıq haqqında birgə bəyannamə imzalayıb

Sənədi Azərbaycan Respublikası Baş nazirinin müavini, Dayanıqlı İnkişaf üzrə Milli Əlaqələndirmə Şurasının sədri Əli Əhmədov və UNECE-nin icraçı katibi Olga Algayerova imzalayıblar.

Azərbaycan və UNECE, DİM-lərə nail olunması yolunda addımların icrası və dayanıqlı inkişafın milli prioritetlərini və onların göstəricilərini müəyyənləşdirmək üçün sıx əməkdaşlıq etmək niyyətlərini bildirib. İqtisadi sahələri əhatə edən milli proqramlar və strategiyaların uyğunlaşdırılması əməkdaşlığın başqa bir sahəsi olacaq.

Birgə bəyannamə ticari potensialın yaradılması və ticarətin asanlaşdırılması sahələri; bərpa olunan enerji və enerji səmərəliliyi; yatırımlar, texnologiya və innovasiya; yaşıl iqtisadiyyat; yaşıl texnologiyaların tətbiqi; ətraf mühitin monitorinqi sistemi; su ehtiyatlarının qorunması; hava və ətraf mühitin çirklənməsi ilə mübarizə; meşələr; və kənd təsərrüfatında keyfiyyət standartları məsələlərində sıx əməkdaşlığın təşviqini nəzərdə tutur.

Üç ildən sonra Azərbaycan və UNECE sənədin icrasını qiymətləndirəcək və əməkdaşlığı genişləndirmək üçün gələcək tədbirlər barədə qərar qəbul edəcəklər.