BMT-nin rezident əlaqələndiricisi Qulam M. İshaqzainin Beynəlxalq Qadın Sahibkarlar Forumunda çıxışı

Hörmətli Azərbaycan Respublikası Baş nazirinin müavini, cənab Əli Əhmədov,

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova,

BMT həmkarları,

Zati-aliləri,

Xanımlar və cənablar!

Beynəlxalq Qadın Sahibkarlar Forumunda Birləşmiş Millətlər Təşkilatı adından  çıxış etmək mənim üçün böyük bir şərəfdir.

Bu tədbirin təşkilinə, eləcə də dəvətə görə Ailə, Qadın və Uşaq Problemləri üzrə Dövlət Komitəsinə təşəkkür edirəm.

Sizin aranızda ailə işləri ilə yanaşı, əlavə biznes məsuliyyətini götürməyə həvəsli, çox sayda qadın sahibkarları görmək məni çox sevindirir.

Sizi və milyonlarla digər qadın sahibkarları cəsarət və uğurları üçün təbrik etmək, eləcə də dəstəkləmək üçün buradayam.

Siz, sosial gözləntilərə və stereotiplərə meydan oxuyub çox zaman kişilərin üstünlük təşkil etdiyi çətin mühitdə fəaliyyət göstərdiniz.

Qadınların bərabərliyi və səlahiyyətlərinin gücləndirilməsi 17 dayanıqlı inkişaf məqsədlərindən biridir.

Bu, inklüziv və dayanıqlı inkişafın bütün aspektlərinin ayrılmaz bir hissəsidir.

Qadınların iqtisadi cəhətdən səlahiyyətləndirilməsi işi bir-biri ilə əlaqəli bir neçə elementə malikdir və hər bir element inkişafın tərkib hissəsidir.

Qadın sahibkarlığının genişləndirilməsi yalnız bərabərsizliyin aradan qaldırılması və yoxsulluğun azaldılması üçün deyil, eyni zamanda universal təhsil və keyfiyyətli səhiyyə kimi Qlobal Məqsədlərə nail olunmasına kömək üçün xüsusilə, vacib vasitədir.

Birləşmiş Millətlər Təşkilatının baş katibi Antonio Quterreş də iqtisadi səlahiyyətlərin gücləndirilməsi Dayanıqlı İnkişaf Məqsədlərinə nail olmaq üçün zəruri şərtdir, deyə vurğulayıb.

Araşdırmalar göstərir ki, qadınlar iqtisadiyyatda bərabər şəkildə iştirak edə bilsələr, ümumi daxili məhsul 2025-ci ilə qədər 26 faiz, yəni 12 trilyon dollar ekvivalentində arta bilər, lakin təəssüf ki, kişilərin 77 faizinə nisbətdə, işləyən yaşda olan qadınların yalnız 50 faizi dünya səviyyəsində işçi qüvvəsi kimi çalışır.

Bundan əlavə, qadınlar əsasən, qeyri-formal və sabit olmayan işlərdə daha çox çalışırlar. Qadınlara, kişilərə nisbətən orta hesabla 23 faiz az əmək haqqı verilir və onlar ən azı 2.5 dəfə daha çox ev işləri və başqalarına baxmaq kimi ödənişsiz işlər yerinə yetirirlər.

Hələ də bəzi ölkələrdə gender bərabərsizliyi hüquqi və sosial normaların bir hissəsidir. Belə ölkələrdə qadınların boşanma, varislik, torpağa sahib olma yaxud  kirayə götürmək və ya kreditə çıxış əldə etmək hüququ yoxdur. Belə hallar qadınların iqtisadi gücləndirilməsi üçün böyük məhdudiyyətlər yaradır.

Azərbaycan gender bərabərliyinə doğru müsbət irəliləyiş göstərib və bu irəliləyişlərdən bəziləri tarixi köklərə malikdir.

Milli qanunvericilik kişi və qadınların hər cür iqtisadi fəaliyyətlə məşğul olma, varislik, əmlaka sahib olma və satma, bank krediti alması, ölkə daxilində və xaricində səyahət etmələri üçün bərabər hüquqlara sahib olmasını təmin edir.

Azərbaycan, həmçinin qadınlara qarşı ayrı-seçkiliyin bütün formalarının aradan qaldırılması haqqında Konvensiya kimi əsas beynəlxalq konvensiyalara qoşulub.

Əhəmiyyətli tərəqqiyə baxmayaraq, problemlər hələ də qalır. Qadınlar qeyri-formal sektorda və aşağı ödənişli işlərdə qeyri-bərabər şəkildə təmsil olunur. Qadınlara qarşı zorakılığa gətirib çıxaran çox sayda gender stereotipləri və ayrı-seçkilik var.

BMT-nin Azərbaycandakı agentlikləri bu məsələləri həll etmək və qadınlara yeni imkanlar yaratmaq üçün hökumət və beynəlxalq donorlar ilə sıx əməkdaşlıq edir.

Kənd icmalarında biz qadınlara indiyə kimi onlar üçün əlçatmaz olan resurslara çıxış əldə etməyə köməklik göstəririk. Əvvəllər xəyalını belə edə bilmədikləri öz bizneslerini yaratmaq və bütün çətinliklərə baxmayaraq, maddi cəhətdən müstəqil olmağa imkan yaradırıq.

Birləşmiş Millətlər Təşkilatı, gender bərabərliyinə qarşı bütün maneələri aradan qaldırmaq üçün hökumət, vətəndaş cəmiyyəti və digər tərəfdaşlar ilə birgə fəaliyyətinə davam edəcək.

Hörmətli Qadın Sahibkarlar,

Siz, səylərinizlə fərq yaradır və başqaları üçün nümunə olursunuz. Elə bu cür də davam edin.

Bu gün dünyaya daha çox sahibkarlar lazımdır. Məsələ, daha çox insanı, sahibkarlığın onların cəmiyyətinin gələcəyi üçün çox əhəmiyyətli olduğunu anlamağa təşviq etməkdədir.

Sahibkarlar, xüsusilə də qadınlar, dəyişikliklər üçün həqiqi gücə çevrilə bilər və öz cəmiyyətinin problemlərini yeni üsullarla həll etməyə köməklik göstərə bilərlər.

Fürsətdən istifadə edərək mükafat qazanan qadın sahibkarları təbrik edirəm.

Hər kəsə uğurlu forum diləyirəm.

Çox sağ olun!