Beynəlxalq Miqrasiya Təşkilatının Azərbaycan nümayəndəliyi “Azərbaycanda pul köçürülmələrinin sosial-iqtisadi faydalarının artırılması” layihəsinin bağlanış mərasimini keçirdi

Miqrasiyadan əldə edilən pul köçürmələri iqtisadi inkişafda mühüm rol oynayır və  2023-cü ildə  pul köçürmələri axınının 840 milyard ABŞ dollarına çatması gözlənilirdi. Azərbaycana gəldikdə, ölkə xaricində yaşayan bir milliondan çox azərbaycanlı var və onların bir çoxu xaricdən ailələrinə maliyə dəstəyi göstərir.

Azərbaycana göndərilən və Azərbaycandan göndərilən pul köçürmələrinin sosial-iqtisadi faydaları mövcud pul köçürmə xidmətləri infrastrukturu və həm pul köçürməsini göndərənlərin, həm də pul köçürməsini alanların maliyyə davranışlarından təsirlənir.

Bu baxımdan, ödəniş xidmətlərinin, o cümlədən pul köçürmələri ilə bağlı xidmətlərin rəqəmsallaşdırılması maliyyə inklüzivliyinin artırılması, maliyyə savadlılığının yüksəldilməsi və nəhayət, yığıma və investisiya yönümlü maliyyə davranışının təşviqi məqsədini daşıyan proqramın diqqət mərkəzində olub. 

Tədbirdə Beynəlxalq Miqrasiya Təşkilatı (BMqT), Dövlət Miqrasiya Xidməti (DMX) Mərkəzi Bank və digər dövlət hüquqi şəxslərinin, özəl sektorun, qeyri-hökümət və beynəlxalq təşkilatların nümayəndələri iştirak etdilər. 

BMqT-dən layihə köməkçisi Məhəmməd İbrahimov və Dövlət Miqrasiya Xidmətinin baş idarəsinin rəisi Vahid Qəhrəmanov açılış nitqləri ilə çıxış etdilər. 

Məhəmməd İbrahimov öz çıxışında layihə fəaliyyətlərinin təqdimatını keçirdi və 8-10 iyul tarixlərində keçirilmiş seminara və layihə çərçivəsində həyata keçirilmiş ictimai və özəl qurumlara edilən səfərə dair qısa məlumat verdi. Tədbirdə pul köçürmələrinin iqtisadi faydalarını artırmaq üçün rəqəmsal pul köçürmələri haqqında maarifləndirmənin inkişaf etdirilməsinin vacibliyi qeyd olundu. 

Layihənin məsləhətçisi Sərdar Hüseynov, Beynəlxalq Miqrasiya Təşkilatı tərəfindən hazırlanmış MigApp tətbiqi üzrə qiymətləndirməni təqdim etdi və o, miqrantlar üçün bu tətbiqdən istifadə qaydaları, onun üstünlükləri və faydaları haqqında ətraflı məlumat verdi. MigApp-ın Azərbaycan səhifəsi, Azərbaycandan və Azərbaycana pul köçürülməsi həyata keçirilən əsas 10 ölkənin seçimləri haqqında məlumatla yenilənmişdir. Tətbiq məlumatları əlçatan edəcək,   rəqəmsal maliyyə savadlılığına töhfə verəcək və miqrantlara və onların ailələrinə pul köçürmələrini göndərmək/almaq üçün ən səmərəli yolu seçməyə kömək edəcəkdir.

Bundan əlavə, layihə çərçivəsində Azərbaycanda rəqəmsal pul köçürmələri ilə bağlı vəziyyətin təhlili aparılmış və rəqəmsal pul köçürmə xidmətlərinin və digər əlaqəli maliyyə məhsullarının əlçatanlığını və tətbiqini yaxşılaşdırmaq üçün 29 tövsiyə müəyyən edilmişdir. 

Bu tövsiyələr Mərkəzi Bank tərəfindən hazırlanan Maliyyə İnklüzivliyi Strategiyasına  daxil edilib və Dövlət Miqrasiya Xidməti tərəfindən hazırlanan Miqrantların İnteqrasiyası Strategiyası Konsepsiyasına əlavə olunacaqdır.

Layihənin əsas tərəfdaşları bunlardır: Dövlət Miqrasiya Xidməti, Azərbaycan Respublikasının Diasporla İş üzrə Dövlət Komitəsi, Mərkəzi Bank, Maliyyə Monitorinqi Xidməti və Azərbaycan Banklar Assosiasiyası.

 Nəticə olaraq, inkişaf etmiş rəqəmsal infrastruktura malik və əlverişli iqtisadi mühitin mövcud olduğu bir ölkənin inkişafında pul köçürmələri faktoru mühüm rol oynayır.

 Səmərəli və aşağı qiymətli köçürmələr daxil olmaqla, sağlam hüquqi baza, müvafiq maliyyə sistemi və hərtərəfli pul köçürmələri siyasəti də, rəsmi maliyyə kanalları vasitəsilə pul köçürmələrinin axınını artırmaq üçün vacibdir.

Əlavə məlumat üçün BMqT-nin Azərbaycan nümayəndəliyi ilə əlaqə saxlaya bilərsiniz: iomazerbaijan@iom.int