BMT-nin Rezident Əlaqələndiricisi xanım Vladanka Andreevanın Humanitar Minatəmizləmə və DİM-lər üzrə Beynəlxalq Konfransda çıxışı

Hörmətli cənablar, 

Əziz həmkarlar və tərəfdaşlar,

Xanımlar və cənablar,

Bu gün humanitar minatəmizləmə və Dayanıqlı İnkişaf Məqsədlərinə dair bu mühüm beynəlxalq konfransda sizinlə birlikdə olmaqdan böyük məmnunluq duyuram.

Bu konfrans Beynəlxalq Mina Xəbərdarlığı və Mina Fəaliyyətinə Yardım Gününə bir neçə gün qalmış bu ilki  – "Təhlükəsiz yer, təhlükəsiz addım, təhlükəsiz ev" şuarı altında keçirilir.

Bu şuar münaqişədən sonrakı şəraitdə fərdlərin və icmaların şəxsi təhlükəsizliyinin bərpasının vacibliyini vurğulayır. 

Çünki həqiqətən evdən daha yaxşı yer yoxdur - lakin təhlükəsizlik və ya icma olmadan özünü evdə hiss etmək çətindir.

Bütün dünyada minatəmizləmə mütəxəssisləri partlayıcı sursat təhlükəsini aradan qaldırmaq üçün gərgin şərtlərdə fəaliyyət göstərirlər.  

Bu səylərə baxmayaraq, davamlı olaraq hər gün mülki insanlar minalardan həlak olur və şikəst qalırlar. 

BMT-nin minalarla mübarizə qrupu təkcə 2020-ci ildə minalar və müharibənin partlayıcı qalıqları nəticəsində 7000-dən çox insanın öldüyünü və ya yaralandığını bildirib. 

Bu dəhşətli təhlükə məktəbə gedən uşaqları, işə gedən qadınları, bazara gedən ailələri və patrulda olan sülhməramlıları təhdid edir. 

Aydındır ki, biz mütləq prioritet olaraq daha çox işlər görməliyik.

Minasız dünya hədəfinə sadiqliyimizi bir daha təsdiq edərək, biz səylərimizi üç əsas sahəyə yönəltməliyik.

Bu əsas sahələrdən birincisi potensialın və imkanların genişləndirilməsidir.                                                                                                                                 

Partlayıcı təhlükələrin sürətlə dəyişən xarakteri o deməkdir ki, ön cəbhə xəttində olanların partlayıcı sursat təhlükəsi olan ərazilərdə fəaliyyət göstərmək üçün kifayət qədər təcrübəyə, resurslara və avadanlıqlara malik olmasını təmin etmək çox vacibdir. 

İkinci əsas sahə tərəfdaşlığın qurulmasıdır.                                             

Milli və beynəlxalq maraqlı tərəflər arasında güclü tərəfdaşlıq bütün humanitar minalarla mübarizə proqramlarının uğuru üçün kritik rol oynamağa davam edəcək və ümid edirəm ki, bu konfrans həmin əməkdaşlıq yanaşmasını gücləndirməyə zəmin yaradacaq.  

Üçüncü əsas sahə minatəmizləmə fəaliyyəti ilə inkişafın inteqrasiyasıdır.               

İnsanların həyatını xilas etmək üçün birbaşa səylərimiz partlamadan artıq zərər çəkmiş insanlara kömək etmək tədbirləri ilə müşayiət olunmalıdır. Buraya qurbanlara adekvat xidmətlərin göstərilməsinin təmin edilməsi və əlilliyi olan şəxslərin hüquqlarının təşviqi daxildir.

Xanımlar və cənablar,

Bu il biz iki mühüm mərhələni qeyd edirik: Azərbaycanın BMT-yə üzvlüyünün 30 illiyi və BMT-nin Azərbaycanda fəaliyyətinin 30 illiyi.

Bu üç onillikdə biz kollektiv şəkildə çoxlu müsbət nəticələr əldə etmişik. Bu müddətdə əldə olunmuş xüsusilə fəxr etdiyim nailiyyət BMT ilə ANAMA arasında uzunmüddətli tərəfdaşlıqdır.

BMTİP 1999-cu ildən ANAMA-ya dəstək verir və çoxsaylı donorların səxavətli maliyyəsi sayəsində 33 milyon kvadratmetrdən çox ərazi minalardan təmizlənib.

Paralel olaraq, UNICEF də çirklənmiş ərazilərdə yerli əhalinin təhlükəsizliyinin əsas elementi olan partlayıcı sursat riski ilə bağlı maarifləndirmə işində ANAMA-ya dəstək verir. Onlar artıq 100000-dən çox insana, o cümlədən 35.000-dən çox uşağa yardım edib.

Dayanıqlı İnkişaf üçün 2030 Proqramının həyata keçiriləməsinə aparan yol minalardan və müharibənin partlayıcı qalıqlarından təmizlənməlidir. Minatəmizləmə fəaliyyəti insanların həyatını xilas etmək və xəsarətlərin qarşısını almaqdan əlavə infrastrukturun, təhsilin və kənd təsərrüfatının yenidən qurulması üçün həyati əhəmiyyət kəsb edir. O, həmçinin, xüsusilə qadınların və əlilliyi olan insanların inkluzivliyi üçün güclü təkan ola bilər.

BMT hər bir qadının, kişinin və uşağın öz evində təhlükəsiz yaşamasını təmin etmək üçün Azərbaycan hökuməti ilə çiyin-çiyinə dayanmağa davam edəcək. 

Bu mühüm tədbirin təşkilinə görə Azərbaycan hökumətinə, ANAMA-ya və BMTİP-ə çox təşəkkür etmək istərdim.

Mən həmçinin ANAMA komandasına - hər gün bu partlayıcı təhlükələrlə böyük şəxsi risklə mübarizə aparan bütün cəsur insanlara təşəkkür etmək istərdim.

Məhz sizin səyləriniz sayəsində biz təhlükəsiz torpaqda, təhlükəsiz evlərdə təhlükəsiz yaşamağa davam edirik.

Təşəkkür edirəm!