BMT-nin Azərbaycandakı Rezident Əlaqələndiricisi Qulam İshaqzainin Beynəlxalq Əmək Təşkilatının 100 illik yubileyinə həsr olunmuş “İşin gələcəyi” mövzusunda inşa müsabiqəsi qaliblərinin mükafatlandırma mərasimində çıxışı

Hörmətli Əmək və Əhalinin Sosial Müdafiəsi Nazirinin müavini Mətin Kərimli,

Əziz tələbələr,

Xanımlar və cənablar,

Bu gün Beynəlxalq Əmək Təşkilatının 100 illik yubileyinə həsr olunmuş “İşin Gələcəyi” mövzusunda inşa müsabiqəsinin mükafatlandırma mərasimində iştirak etmək və çıxış etmək, mənim üçün böyük bir zövqdür. Beynəlxalq Əmək Təşkilatı (BƏT), Birləşmiş Millətlər Təşkilatının tarix boyunca ictimai inkişaf mübarizəsində mərkəzi rol oynayan ən qocaman təşkilatıdır.

BƏT, Birinci Dünya Müharibəsində qan tökülməsindən yaranan, daha yaxşı bir sabah qurmağı hədəfləyən və dünyanın iş yerlərində “ədalətsizliyə, çətinliklərə və məhrumiyyətə” son qoymaq kimi sadə, lakin həyati bir məqsəddən ilhamlanan təşkilatdır.

Bu gün Beynəlxalq Əmək Təşkilatı bir əsr boyu usanmadan işəgötürənlər, ticarət birlikləri və hökumətlərlə birgə çalışdığı və əldə etdiyi nəticələrə, qürurla baxa bilər.

Daha təhlükəsiz iş yerləri.

Daha ədalətli şərtlər.

Daha yaxşı əmək haqqı.

Lakin iş dünyası bu gün böyük bir dəyişmə prosesi keçirir. Bu proses, işin gələcəyi ilə bağlı Beynəlxalq Əmək Təşkilatı Qlobal Komissiyasının 2019-cu ilin yanvar hesabatında öz əksini tapır.

Hesabatda süni intellekt, avtomatlaşdırma və robot texnologiyası kimi texnoloji inkişafların yeni iş yerləri yaratması, lakin yeni imkanlardan yararlanmaq üçün hazır olmayanların isə keçid dövründə işlərini itirəcəkləri vurğulanır.

Hesabata görə, “bugünkü bacarıqlar sabahın işinə uyğun gəlməyəcək və yeni əldə edilmiş bacarıqlar, tez bir zamanda köhnəlmiş olacaq”.

“Biz dayanıqlı üsullar və təmiz texnologiyalar qəbul etdikcə,  yaşıl iqtisadiyyata keçid milyonlarla iş yerləri meydana gətirə bilər, lakin ölkələr karbon və resurs ağırlıqlı sənayelərini məhdudlaşdırdığı zaman, digər iş yerləri yox olacaq” və “ demoqrafik dəyişikliklər ciddi olacaq”.

Dünyanın bəzi yerlərində gənc əhalinin çoxalması və digər ölkələrdə əhalinin yaşlanması, əmək bazarlarına və sosial təhlükəsizlik sistemlərinə təzyiq göstərə bilər, lakin bu dəyişikliklər qayğıkeş, inklüziv və fəal cəmiyyətlərin yaradılması üçün yeni imkanlar açır.

Hesabatlar, Beynəlxalq Əmək Təşkilatı Təsisçilərini bu əsaslı dəyişikliklər nəticəsində yaranan imkanlardan istifadə etməyə dəvət edir. Bu imkanlara daha parlaq bir gələcək yaratmaq, iqtisadi təhlükəsizlik, bərabər imkanlar və sosial ədaləti təmin etmək və nəticədə, cəmiyyətlərin strukturunu gücləndirmək aid edilir.

Gənclər iqtisadiyyatda baş verən dəyişikliklərə xüsusilə, həssasdırlar. İndi səsləndirəcəyim rəqəmlər gənclərin məşğulluğunun əsas qlobal problemlərdən biri olduğunu göstərir:

15-24 yaşlarında olan 621 milyon gənc təhsil, iş və ya təlim almır.

75 milyon təhsilli gəncin işi yoxdur.

Növbəti onillikdə bir milyard gənc əmək bazarına daxil olacaq və çox sayda gənc nizamsız və qeyri-formal məşğulluğun olduğu bir gələcəklə qarşılaşacaq.

Hal-hazırda dünyada işləyən gənclərin 23%-i gündə 1,25 ABŞ dollarından az gəlir əldə edir, yəni kəskin yoxsulluq şəraitində yaşayırlar. Məşhur hesabata əsasən, ibtidai məktəbə daxil olan uşaqların 65%-i hələ mövcud olmayan tamamilə yeni iş növləri üzrə işləyəcək.

Belə sürətlə inkişaf edən məşğulluq sahəsində, dəyişikliklərin gətirdiyi imkanlardan yararlanmaq və arzuolunmaz nəticələrin qarşısını almaq məqsədilə, gələcəyin bacarıqlarına dair tələbləri, işlərin məzmunu və potensial təsirinə hazır olmaq biznes, hökumət və şəxslər üçün getdikcə vacibləşir.

Gənclər arasında işsizliyin qarşısını almaq üçün ömürlük öyrənməyə sərmayə qoymalı və təhsil sistemini əmək bazarının ehtiyaclarına uyğunlaşdırmalıyıq.

Gənc qadınlar və kişilərə iş yerləri yaratmaq üçün effektiv iqtisadi və əmək bazarı siyasətləri təmin etməliyik.

Sahibkarlıq təhsilinə yatırım etmək, , gələcəkdə, əmək haqqı və özünü məşğulluq imkanları ilə gənclərin yaradıcılıq və innovasiyalarını ortaya çıxarmaq üçün əsas ola bilər.

Hesab edirəm ki, inşa müsabiqəsi sizləri gələcək işlərə böyük maraq göstərməyə, mövcud problemlər haqda düşünməyə və yazmağa , eləcə də mümkün həll yolları araşdırmağa təşviq edib.

Biz sizin yardımınız və iştirakınız olmadan, bacara bilmərik. Siz bizə tərəfdaş və liderlər kimi lazımsınız. Dinc və daha dayanıqlı bir dünya qurarkən sizə ehtiyacımız var.

Müsabiqənin qalibləri və iştirakçılarını təbrik edir, həyatınızda uğurlar arzulayıram!

Təşəkkür edirəm!