BMT-nin Rezident Əlaqələndiricisi Qulam İshaqzainin İnsan Hüquqları gününə həsr olunmuş sərgidə çıxışı

Zati-aliləri,

Hörmətli həmkarlar və dostlar,

Sizləri, Birləşmiş Millətlər Təşkilatının Azərbaycandakı nümayəndəliyi adından Ümumdünya İnsan Hüquqları Bəyannaməsinin 70 illiyinə həsr olunmuş Mədəniyyət Nazirliyinin Muzey Mərkəzində baş tutan İnsan Hüquqları Sərgisində salamlayır və iştirakınız üçün təşəkkür edirəm.

Mədəniyyət Nazirliyinə və Muzey Mərkəzinə bu sərgiyə ev sahibliyi etdikləri üçün təşəkkür edirəm.

Əziz qonaqlar,

70 il əvvəl bu gün Parisdə Birləşmiş Millətlər Baş Assambleyası Ümumdünya İnsan Hüquqları Bəyannaməsini qəbul etdi.

İnsan hüquqları tarixinin əlamətdar hadisəsi olan bu sənəd ilk dəfə olaraq qlobal şəkildə qorunmalı olan fundamental insan hüquqlarını müəyyən edir, insanların azad doğulduğunu və  irq, gender, din, vətəndaşlıq və dinindən asılı olmadan bərabər münasibət və digər hüquqlara malik olduğunu bəyan edir.

Bu bəyannamə 500-dən artıq dilə tərcümə olunub.

Ötən 70 il ərzində Ümumdünya İnsan Hüquqları Bəyannaməsində əks olunan insan hüquqları anlayışının təsiri inqilabi səviyyədə olub.

Bəyannamə siyasi, mülki, sosial, mədəni və iqtisadi hüquqların və onların hökumətlər tərəfindən hörmət edilməsinin təməlini qoyub.

Bu sənəd siyasətə və konstitusiyalara nüfuz edib, beynəlxalq insan hüquqları qanunlarının və standartlarının təməlini qoyan 60-dan artıq insan hüquqları alətlərini stimullaşdırıb.

Bu  gələcək nəsillərə də ilham olan daim yaşar bir sənəddir.

Düşünürəm ki, bəyannaməni hazırlayanlara ehtiram göstərmək və onun əhəmiyyətini anlamaq üçün bəyannamənin preambulasından bir neçə cümləni xatırlamaq yerinə düşər. Həqiqətən də gözəl ifadə olunub:

Preambula

Bəşər ailəsinin bütün üzvlərinə xas olan ləyaqət hissinin və onların bərabər və ayrılmaz hüquqlarının tanınmasının azadlıq, ədalət və sülhün əsası olduğunu nəzərə alaraq,

İnsan hüquqlarına etinasızlıq və nifrətin, bəşəriyyəti dəhşətə gətirən barbar hərəkətlərə səbəb olduğunu və insanların söz və etiqad azadlığına malik, qorxuvə ehtiyacdan azad olduqları dünyanın yaradılmasının bəşər övladının  ən ali istəyi olduğunu nəzərə alaraq,

İnsanın son çarə kimi istibdad və zülmə qarşı qiyama qalxmağa məcbur olmamasını təmin etmək üçün insan hüquqlarının qanunlailə müdafiə olunmasının zəruriliyini nəzərə alaraq,

Xalqlar arasında mehriban münasibətlərin inkişafını dəstəkləməyin vacibliyini nəzərə alaraq,

Birləşmiş Millətlərin xalqlarının BMT Nizamnaməsində fundamental insan hüquqlarına, insan şəxsiyyətinin ləyaqət və dəyərinə, kişi və qadınların hüquq bərabərliyinə inamlarını təsdiq etdiklərini və daha azad şəraitdə sosial tərəqqi və həyat şəraitinin yaxşılaşdırılmasına yardım etməyi qət etdiklərini nəzərə alaraq,                                                                                                                                                  

Üzv dövlətlərin BMT ilə əməkdaşlıq şəraitində insan hüquqlarına və fundamental azadlıqlara universal hörmət və onlara əməl olunmasına yardım etməyi öhdələrinə götürdüklərini nəzərə alaraq,

Bu hüquq və azadlıqların  tam şəkildə dərk olunmasının həmin öhdəliyin hərtərəfli yerinə yetirilməsi üçün böyük əhəmiyyət kəsb etdiyini nəzərə alaraq,

BMT BAŞ ASSEMBLEYASI  İnsan hüquqları Haqqında Ümumi Bəyannaməni, hər bir kəsin və cəmiyyətin hər bir qurumunun bu Bəyannaməni rəhbər tutaraq maarifçilik və tədris yolu ilə həmin hüquq və azadlıqlara hörmət olunmasına yardım etməsi və milli və beynəlxalq səviyyədə tərəqqipərvər tədbirlər yolu ilə, həm təşkilatın üzvü olan xalqları, həm də onların yurisdiksiyası altında olan ərazilərin xalqları arasında ümumilikdə və effektiv tanınması və həyata keçirilməsinə səy göstərmələri məqsədilə bütün xalqlar və bütün dövlətlərin yerinə yeritməyə can atmalı olduqları vəzifə kimi bəyan edir.

Bəyannamənin, insanların gündəlik həyatlarındakı əhəmiyyətini işıqlandırmaq üçün BMT 10 dekabr 2017-ci ildə kampaniya başlatdı və bu gün İnsan Hüquqları Günündə həmin kampaniya başa çatır.

Birillik kampaniya müddətində dünya ictimaiyyəti Bəyannamənin hər birimiz üçün önəmini TƏŞVİQ ETMƏYƏ, əsas tərəflərin insan hüquqlarına olan öhdəliklərini ifadə etmək üçün prosesə CƏLB ETMƏYƏ və hər gün hər birimizin öz hüquqlarımızı müdafiə edə biləcəyimiz yollar barəsində müzakirə etməyə dəvət olundu.

Bu gün biz, Ümumdünya İnsan Hüquqları Bəyannaməsinin 70 illiyinə həsr olunmuş İnsan Hüquqları Günü sərgisini təşkil etməkdən şərəf duyuruq.

Sərgi eyni zamanda dünyadakı qadın və qızlara zorakılığa son qoymağa çağıran “Gender Əsaslı zorakılığa qarşı 16 günlük fəallıq” adlı beynəlxalq kampaniyanın  yekununu qeyd edir.

Növbəti üç gün ərzində dünyanın müxtəlif yerlərindənn olan karikaturistlərin Bəyannamənin 30 maddəsinə aid göndərdiyi  işlərlə tanış ola biləcəksiniz.

Siz, həmçinin 40 tanınmış qrafik dizaynerin insan hüquqlarına dair təxəyyüllərinin təsvir olunduğu və hər kəsi insan hüquqlarının müdafiəsinə çağıran posterləri görə biləcəksiniz.

Bütün qonaqları BMT agentliklərinin insan hüquqları barəsindəki dərc etdiyi müxtəlif nəşr və tədris materialları ilə ilə tanış olmağa dəvət edirik.

Uğurlu bir tədbir arzu edirəm.

Təşəkkürlər.