BMTİP Azərbaycanda İqlim Dəyişikliyinə Uyğunlaşma üzrə təhsil turu məqsədilə Özbəkistan nümayəndə heyətini qəbul edib

Bakı, 30 aprel 2024-cü il: Birləşmiş Millətlər Təşkilatının İnkişaf Proqramının Azərbaycan Ölkə Ofisi Özbəkistan Respublikasının İqlim Dəyişikliyinə Uyğunlaşma üzrə nümayəndə heyətini təhsil turu çərçivəsində qəbul edib. Səfər ərzində Özbəkistan Respublikasından olan müxtəlif aidiyyatı dövlət qurumlarının və beynəlxalq təşkilatların nümayəndələri Yaşıl İqlim Fondu tərəfindən maliyyələşdirilən və BMTİP-nin icra etdiyi Milli Uyğunlaşma Planı (NAP) layihəsi çərçivəsində iqlimə uyğunlaşma tədbirləri ilə bağlı anlayışları təkmilləşdirmək və Azərbaycan kontekstində müvafiq təcrübələri öyrənmək məqsədilə görüşlər keçirib. Turun birinci hissəsi iki ölkə arasında təcrübə mübadiləsini və əməkdaşlığı gücləndirmək üçün müvafiq dövlət qurumları ilə bir sıra görüşləri əhatə edib.

BMTİP-nin Azərbaycandakı Rezident Nümayəndəsinin səlahiyyətlərini icra edən xanım Alessandra Roccasalvo iqlim dəyişikliyi ilə bağlı ümumi problemlərin həllində Azərbaycan və Özbəkistan arasında əməkdaşlığın genişləndirilməsinin əhəmiyyətini vurğulayaraq qeyd edib ki, bu təhsil turu iqlimə uyğunlaşma strategiyaları üzrə regional əməkdaşlıqda mühüm mərhələdir. Qeyd olunmuş tur ərzində nümayəndə heyəti Ekologiya və Təbii Sərvətlər Nazirliyi, Kənd Təsərrüfatı Nazirliyi, Maliyyə Nazirliyi, Milli Hidrometeorologiya Xidməti, İqtisadi İslahatların Təhlili və Kommunikasiya Mərkəzinin nümayəndələri ilə görüşlər keçirib. Görüşlərdə Azərbaycanda uyğunlaşma üzrə görülmüş və planlaşdırılan işlər, COP29 tədbirinin ölkəmizdə keçirilməsinin əhəmiyyəti və Özbəkistan Respublikası ilə sıx əməkdaşlığın vacibliyi qeyd olunub, aparılan təcrübə mübadiləsinin Azərbaycan və Özbəkistanın iqlimə davamlılıq və dayanıqlı inkişafa yanaşmasında vacib rol oynayacağı bildirilib.

Səfərin ikinci günündə nümayəndə heyəti Suraxanı Neft Əməliyyat Şirkətinin yatağına baş çəkmək imkanı əldə edib. Səfər zamanı şirkətin ətraf mühitin mühafizəsi və iqlimə uyğunlaşması ilə bağlı innovativ yanaşmalarını müşahidə etmək şansı əldə edilib. Müzakirələr su idarəçiliyinin mahiyyətini əhatə edərək neft sənayesi daxilində davamlılıq təcrübələrinin inteqrasiyasına yönəldilib.

Özbəkistan nümayəndə heyətinin səfəri iqlimə davamlılıq üzrə regional əməkdaşlığı gücləndirmək məqsədilə davam edən səylər üçün mühüm mərhələdir. Hər iki ölkə Dayanıqlı İnkişaf Məqsədlərinə (DİM) nail olmaq yolunda irəlilədikcə, bu kimi təşəbbüslər vasitəsilə qurulan tərəfdaşlıqlar hamı üçün daha dayanıqlı gələcəyin formalaşdırılmasında mühüm rol oynayacaq.