BMT-nin Azərbaycandakı rezident əlaqələndiricisinin ANAMA-nın 25 illiyinə həsr olunmuş mərasimdə çıxışı

Hörmətli qonaqlar,

Xanımlar və cənablar,

Bu əlamətdar gündə, Azərbaycan Respublikası Minatəmizləmə Agentliyi – ANAMA-nın yaradılmasının 25-ci ildönümündə sizin qarşınızda çıxış etməkdən böyük şərəf duyuram.

Mən, ANAMA-nı və onun cəsur istehkamçılarını göstərdikləri böyük fədakarlığa və əldə etdikləri nailiyyətlərə görə səmimi qəlbdən təbrik edirəm. Onların səyləri insanların həyatını xilas edib, çoxsaylı xəsarətlərin qarşısını alıb və bir çox ailənin həyatında əhəmiyyətli dəyişikliklər yaradıb.

BMT-nin Azərbaycandakı nümayəndəliyi son 25 il ərzində ANAMA ilə olan tərəfdaşlıqdan böyük qürur hissi keçirir. ANAMA Azərbaycan Hökuməti ilə BMTİP arasında 1999-cu il aprelin 2-də imzalanmış Azərbaycanda Mina Təhlükəsi ilə Mübarizə üzrə Birgə Proqram çərçivəsində fəaliyyətə başlayıb. Bu illər ərzində BMT ailəsi ANAMA-nın potensialının gücləndirilməsini dəstəkləyib, tərəfdaşlığımız daha da güclənib.

2020-ci il münaqişəsindən sonra BMT ANAMA-nın fəaliyyətini dəstəkləmək üçün 11 milyon ABŞ dollarından çox vəsait səfərbər edib. Avropa İttifaqı, Böyük Britaniya hökuməti, digər tərəfdaşların dəstəyi və BMT-nin daxili resursları hesabına təşkilatın üç agentliyi – BMTİP, UNICEF və BMT QAK institusional potensialın gücləndirilməsi, texniki məsləhətin təmin edilməsi və partlayıcı sursatların təhlükəsinə dair maarifləndirmə sahələrində ANAMA-nın səylərini dəstəkləyir.

Xanımlar və cənablar,

Təəssüflər olsun ki, Azərbaycanda təkcə son iki ildə mina partlayışları nəticəsində 303 nəfər həyatını itirib və ya xəsarət alıb. 1991-ci ildən indiyədək 358-i uşaq və 38-i qadın olmaqla, ümumilikdə 3377 nəfər minaların qurbanı olub.

Bu faktlar Azərbaycanda humanitar minatəmizləmə işlərinin sürətləndirilməsi üçün birgə səylər və resurslara ciddi ehtiyacın olduğunu göstərir. BMT-nin Azərbaycandakı ailəsi ANAMA-nın partlayıcı hərbi sursat təhlükəsinin aradan qaldırılması və mina riski ilə bağlı maarifləndirmə işinin gücləndirilməsi sahələrində davamlı səylərini dəstəkləməyə sadiqdir.

Fürsətdən istifadə edərək, Azərbaycanın minatəmizləmə üzrə 18-ci DİM-i təqdim etmək təşəbbüsünü alqışlamaq istərdim. Həqiqətən də, Azərbaycan da daxil olmaqla, minadan əziyyət çəkən ölkələr üçün ərazilərin minalardan təmizlənməsi dayanıqlı inkişaf və sülhə nail olmaq üçün ilkin şərtdir.

Dünyada son üç ildə baş verən çoxsaylı böhranlar Dayanıqlı İnkişaf Məqsədlərinə nail olmaq istiqamətindəki səylərimizə böyük zərbə vurub. BMT-nin Baş Katibi yoxsulluğun aradan qaldırılması, bərabərsizliyin azaldılması və ətraf mühitin mühafizəsi məqsədi daşıyan 2030-cu il Gündəliyində qeyd olunan əsas hədəflərdən yayınmamağımız üçün artan öhdəlik, həmrəylik və transformativ fəaliyyətə təcili ehtiyac olduğunu vurğulayıb.

Sentyabr ayında dünya liderləri BMT-nin Nyu-Yorkdakı baş qərargahında toplanaraq DİM-ləri “xilas etməyə” və kollektiv səylərimizi canlandırmağa çalışacaqlar. İlk günlərdən Azərbaycan 2030-cu il Gündəliyi və onun icrasına sadiqliyini nümayiş etdirib.

Ölkə DİM-lərə doğru sürətlənmiş tərəqqini davam etdirərkən, biz də öz növbəmizdə ərazilərin minalardan təmizlənməsi də daxil olmaqla, DİM-lər üzrə irəliləyişə nail olmaq üçün  əməkdaşlığımızı daha da gücləndirmək niyyətindəyik.

Bir daha ANAMA-nı bu 25 ildə göstərdiyi fədakarlıq və əldə etdiyi nailiyyətlər münasibətilə təbrik edirəm.

Qoy davamlı səyləriniz bizi hamı üçün daha təhlükəsiz və daha firavan gələcəyə yaxınlaşdırsın.

Təşəkkür edirəm!