BMT-nin Rezident Əlaqələndiricisi, Vladanka Andreevanın gənc qadin peşəkarlar üçün vasitəçilik təlimində açılış nitqi

Hörmətli dostlar, həmkarlar və tərəfdaşlar.

İcazənizlə nitqimi sizi Gənc Qadın Peşəkarlar üçün Vasitəçilik Təlimində salamlamaqla başlayım.

Azərbaycanda fəaliyyət göstərən BMT ailəsi BMT Qadınlar qurumunun texniki və Latviya Səfirliyinin təşkilati dəstəyi ilə qadın sülh qurucuları, sosial işçilər və inkişaf mütəxəssisləri üçün bu ikigünlük vasitəçilik təlimini təşkil edir.

Bu təşəbbüsün əsas məqsədi vətəndaş cəmiyyətinin rolu və qadınların sosial birlik, sülh danışıqları, eləcə də dayanıqlı sülh və inkişafa yönəlmiş səylərə necə töhfə verə biləcəyinə dair ümumi anlayışı artırmaqdan ibarətdir.

Bu gün bizə qoşulan bir çox motivasiyalı qadınları görməkdən qürur hissi duyuram. Qrupun təxminən üçdə biri Azərbaycanın regionlarında fəaliyyət göstərir. Bu gün burada Şuşa, Cəbrayıl, Tərtər, Zəngilan, Qubadlı, Kəlbəcər, Mingəçevir, Sumqayıt və Bakıdan nümayəndələr iştirak edirlər.

20 iştirakçıdan 7-si münaqişə səbəbindən məcburi köçkün olmuş və vasitəçilik bacarıqlarını inkişaf etdirməyə, habelə öz icmalarını dəstəkləməyə həvəsli olan qadınlardır.

Amma uzun sürən köçkünlükdən sonra bu ilin iyul ayında salınmış Ağalı kəndinə qayıtmış qadınlar da bu gün yanımızdadır.

Fəallar, sülh qurucuları, sosial işçilər, müəllimlər və təlimçilər, eləcə də Qaçqınların və Məcburi Köçkünlərin İşləri üzrə Dövlət Komitəsi, Xüsusi Nümayəndələrin ofisləri və digər yerli idarəetmə strukturlarının nümayəndələri, Qadınlar, Sülh və Təhlükəsizlik milli gündəliyinin Milli Məsləhət Şurası üzvləri – istedad və həvəslə dolu bir otaqdayıq.

Əziz dostlar,

BMT Təhlükəsizlik Şurasının Qadınlar, Sülh və Təhlükəsizlik haqqında 1325 saylı Qətnaməsinin qəbul edilməsindən 22 il keçir.

Bu sahədə hələ çox iş görülməlidir.

BMT Baş katibinin 2021-ci il hesabatı göstərir ki, biz Qadınlar, Sülh və Təhlükəsizlik gündəliyinin həyata keçirilməsində məhdud irəliləyiş əldə etmişik. 2020-ci ildə qadınlar BMT-nin rəhbərlik və ya birgə rəhbərlik etdiyi sülh proseslərində nümayəndələrin yalnız 23 faizini təmsil edirdi.

2018-2020-ci illər arasında əldə edilən atəşkəs sazişlərinin heç birində cinsi zorakılığın qadağan edilməsi nəzərdə tutulmayıb və gender məsələlərini əks edən sülh sazişləri 28,6 faiz təşkil edir.

31 dekabr 2020-ci il tarixinə sülh əməliyyatlarında iştirak edən hərbi qoşunların yalnız 5,2 faizini qadınlar təşkil edib, bu BMT-nin 2020-ci il üçün müəyyən etdiyi 6,5 faiz hədəfindən aşağıdır.

Beləliklə, qadınları dayanıqlı sülh və inkişafı təşviq etmək üçün səylərimizin mərkəzində yerləşdirməyi davam etdirməliyik.

2022-ci il ərzində BMT ailəsi və tərəfdaşları BMT Təhlükəsizlik Şurasının Qadınlar, Sülh və Təhlükəsizlik haqqında 1325 saylı Qətnaməsini təşviq edən, Milli Fəaliyyət Planının yekunlaşdırılması və qəbul olunmasını dəstəkləyən bir sıra tədbirlər təşkil ediblər.

Dünən Latviya səfirliyi və Xarici İşlər Nazirliyinin birgə təşkilatçılığı, BMT-nin Azərbaycandakı nümayəndəliyi və Böyük Britaniya səfirliyinin dəstəyi ilə keçirilən konfransda post-münaqişə və bərpa prosesində qadınların rolu müzakirə olunub.

Hökumət, parlament, vətəndaş cəmiyyəti, beynəlxalq təşkilatlar və medianı təmsil edən müxtəlif maraqlı tərəfləri sülh və təhlükəsizliyin qurulması və təmin edilməsi üçün müxtəlifliyi və inklüzivliyi dəstəkləmək məqsədilə bir araya gəldiyini görmək məni çox sevindirdi.

Müxtəliflik güc, inklüzivlik sarsıntılara qarşı dayanıqlılıq yaradır.

Bugünkü dünyada hər ikisinə ehtiyacımız var.

Əziz dostlar,

Fikirlərimi yekunlaşdırmazdan əvvəl fürsətdən istifadə edərək, BMT Təhlükəsizlik Şurasının 1325 saylı Qətnaməsinin yerinə yetirilməsi və qadınların sülh proseslərində və həyatın bütün aspektlərində bərabər və mənalı iştirakını artırmaq üçün BMT-nin Azərbaycandakı nümayəndəliyinin Azərbaycana dəstək olmaq üzrə davamlı öhdəliklərini bir daha təsdiqləmək istərdim.

Ümidvaram ki, bu ikigünlük vasitəçilik təlimi sizə yerli icmalarınızı daha da dəstəkləmək üçün bacarıq və inam verəcək, sülhü qorumaq üçün lazımi güc və dayanıqlığının təmininə kömək edəcək və qadın inkişafı üzrə peşəkarlar, həmkarlar və qadınlar şəbəkəsini yaradaraq özünüz kimi dəyişiklik etməyə çalışan dostlarla üzləşdirəcək.

Diqqətinizə görə təşəkkür edirəm!