Peyvəndlə Qarşısı Alına Bilən Xəstəliklərlə bağlı Məlumatların və Profilaktik Tədbirlərin əks olunduğu kitabça

Avropa İttifaqının (Aİ) maliyyələşdirdiyi və Ümumdünya Səhiyyə Təşkilatının (ÜST) həyata keçirdiyi “COVID-19 əleyhinə Vaksinasiyaya Dəstək” layihəsi çərçivəsində Azərbaycan Respublikası Səhiyyə Nazirliyi tərəfindən ÜST-nin texniki dəstəyi ilə peyvəndlə qarşısı alına bilən xəstəliklərlə bağlı məlumatların və profilaktik tədbirlərin əks olunduğu kitabça hazırlanıb. Kitabça epidemik parotit, məxmərək, difteriya, göyöskürək, tetanus, poliomielit, hepatit B, hemofiliya B infeksiyası (Hib), qızılca, pnevmokok infeksiyası və vərəm kimi təhlükəli xəstəliklər və onlardan effektiv müdafiəni təmin etmək üçün müvafiq yaşda tətbiq olunan peyvəndlər barədə ətraflı məlumatları ehtiva edir. Nəşr 20 min nüsxədə çap olunaraq tibb müəssisələrinə paylanılıb. Qeyd edək ki, peyvəndlə qarşısı alına bilən 11 xəstəlik haqqındakı kitabçada yenilənmiş profilaktik peyvəndlər təqvimi də təqdim edilib. 2022-ci ildə peyvəndlər təqviminə BCG, OPV və İPV peyvəndlərinə dair dəyişikliklər edilib.

Peyvəndlər hər il dünyada 3 milyonadək uşağın difteriya, tetanus, göyöskürək, qrip və qızılca kimi xəstəliklərdən ölüm hallarının qarşısını alır. Hər gün müxtəlif mikroblarla təmasda olan uşaqların immun sistemini gücləndirən peyvəndlər onları  təhlükəli  xəstəliklərdən qoruyur. Ümumdünya Səhiyyə Təşkilatı Avropa İttifaqının maliyyə dəstəyi ilə yerli tərəfdaşlarla birgə ölkə üzrə immunlaşdırma proqramlarının gücləndirilməsi istiqamətindəki səylərini davam etdirir.