BMT-nin İnkişaf Proqramı, Ailə, Qadın və Uşaq Problemləri üzrə Dövlət Komitəsi və Britaniya Hökuməti Bərdədə Qadın Resurs Mərkəzinin açılışını edib

Tədbirdə AQUPDK-nın sədri Bahar Muradova, Böyük Britaniyanın Azərbaycandakı səfiri Ceyms Şarp, BMTİP-nin Azərbaycandakı Rezident Nümayəndəsinin səlahiyyətlərini icra edən Çaru Bista və Bərdə İcra Hakimiyyətinin başçısı Vidadi İsayev iştirak edib.

Bərdədə yerləşən Qadın Resurs Mərkəzi “İqtisadi və sosial iştirakın artmasına mane olan əngəlləri aradan qaldırmaq üçün Azərbaycanda münaqişədən təsirlənmiş həssas qruplara daxil olan qadınların səlahiyyətlərinin artırılması və onlar üçün bərabər imkanların yaradılması" layihəsi çərçivəsində istifadəyə verilib. Layihə BMTİP və AQUPDK tərəfindən Britaniya Hökumətinin dəstəyi ilə həyata keçirilir. Layihənin uzunmüddətli məqsədi münaqişələrdən zərər çəkmiş qadınların münaqişə və travmalara qarşı davamlılığını artırmaqdır. Layihənin hədəf kütləsinə məcburi köçkün qadınlar, ailə, uşaq və qadın məsələləri, qaçqın və məcburi köçkünlər və əmək və əhalinin sosial müdafiəsinə məsul dövlət qurumları, dövlət xidmətləri göstərən müəssisələr, yerli icra hakimiyyəti orqanları və bələdiyyələr, özəl şirkətlər və yerli icmalar daxildir.

“Beynəlxalq tərəfdaşlarımızla birgə layihə çərçivəsində yaradılmış bu Qadın Resurs Mərkəzi həssas təbəqədən olan, münaqişədən təsirlənmiş qadınlara yönəlik fəaliyyətlərin həyata keçirilməsinə, o cümlədən onların  məşulluğunun, bilik və bacarıqlarının artırılmasına dəstək verəcək. Biz bu sahədə fəaliyyətlərimizi bundan sonra da davam etdirəcəyik” - deyə AQUPDK-nın sədri Bahar Muradova qeyd edib.

“Biz inanırıq ki, Qadın Resurs Mərkəzləri dəyişim üçün platforma olub müxtəlif sahələrdən gələn qadınları bir araya gətirəcək. QRM-lərdə təklif olunan xidmətlər qadınların peşəkar bacarıqlarını artıracaq və qadın sahibkarlığlna öz töhfəsini verəcək” - Böyük Britaniyanın Azərbaycandakı səfiri Ceyms Şarp bildirib.

“Gender bərabərliyi Azərbaycanın nail olmağı hədəflədiyi ən önəmli Dayanıqlı İnkişaf Məqsədlərindən biridir. Ölkə Gender İnkişaf İndeksində xeyli irəliləyiş edib. Lakin bir sıra sahələrdə hələ də görüləcək işlər var: buna gender baxımından gəlir fərqi də daxildir. Qadın Resurs Mərkəzlərini qurmaqda əsas məqsəd qadınların öz ayaqları üzərində dayanmasına dəstək olaraq, onların stabil gəlir qazanmasını təmin etməkdir. Biz qadınların regionda sülh və təhlükəsizlik elçisi olmalarını və Heç Kəsin Kənarda Qalmamasını təmin etməliyik” – BMTİP-nin Azərbaycandakı Rezident Nümayəndəsinin səlahiyyətlərini icra edən Çaru Bista deyib.

2024-cü ilədək davam edəcək layihə çərçivəsində 360 qadının biznesin inkişafı təlimlərinə cəlb olunması, 540 qadının peşə təlimlərində iştirakı, 800 qadına psixoloji, 600 qadına isə hüquqi dəstək göstərilməsi gözlənilir.

Bərdədən başqa Ağcabədi və Tərtərdə də istifadəyə verilmiş Mərkəzlər sayəsində layihə fəaliyyətləri “Qadınlar, Sülh və Təhlükəsizlik” Gündəliyinə uyğun icra ediləcək və qadınların sülh proseslərində, sülhün bərqərar edilməsi və təhlükəsizliyin təmin edilməsi prosesində iştirakını təmin edəcək şəkildə həyata keçiriləcək.

Bərdədə istifadəyə verilən Mərkəz BMT-nin İnkişaf Proqramının və Dövlət Komitəsinin 2011-ci ildən bəri Azərbaycanın 15 regionunda açdığı QRM-lər modeli üzərinə qurulub. Bu Mərkəzlərin əsas məqsədi qadınların sahibkarlıq bacarıqlarını inkişaf etdirmək və onların əmək bazarında rəqabətliliyini artırmaq, habelə onları səlahiyyətləndirərək ucqar ərazilərdə qadınların qarşılaşdıqları sosial və iqtisadi çətinliklərin aradan qaldırılmasına dəstək olmaqdır.