Azərbaycan və BMT arasında gələcək əməkdaşlığın strateji prioritetləri müzakirə edildi

Hökumət, BMT-niin ölkə komandası, vətəndaş cəmiyyəti, gənclər, akademiya, özəl sektor, inkişaf tərəfdaşları və digər qurumlardan 150-dən çox nümayəndənin iştirakı ilə keçirilən seminarda iştirakçılar BMT-nin Azərbaycanın milli inkişaf prioritetlərinə və Dayanıqlı İnkişaf Məqsədlərinə (DİM) doğru sürətləndirilmiş irəliləyişə dəstək verə biləcəyi sahələr üzrə interaktiv dialoq apardılar.

Seminar Azərbaycan Respublikasının iqtisadiyyat nazirinin müavini cənab Səməd Bəşirli, Azərbaycan Respublikasının xarici işlər nazirinin müavini cənab Yalçın Rəfiyev və BMT-nin Azərbaycandakı Rezident Əlaqələndiricisi Vladanka Andreevanın çıxışları ilə açıldı.

Cənab Bəşirli Azərbaycanın DİM-lərə güclü sadiqliyini vurğulayaraq ölkənin BMT ilə sıx əməkdaşlıq etdiyini və qlobal təşəbbüsləri fəal şəkildə dəstəklədiyini bildirdi. O, Azərbaycanın COP29 tədbirinə ev sahibliyi etməsinin münasibətləri yeni səviyyəyə yüksəltdiyini qeyd etdi.

Yeni Əməkdaşlıq Çərçivə Sənədinin uğurla həyata keçirilməsi üçün ölkənin əməkdaşlığa hazır olduğunu qeyd edən cənab Rəfiyev, Azərbaycanın davamlı inkişafı üçün Milli DİM 18-in (Minalardan Təmizləmə) irəliləyişinin vacibliyini vurğuladı.

Cari Əməkdaşlıq Çərçivə Sənədi(2021-2025) və COP29 kontekstində hökumət və müxtəlif tərəfdaşlarla sıx əməkdaşlığı yüksək qiymətləndirən xanım Andreeva qeyd etdi: "BMT-nin ölkə komandası Azərbaycan hökuməti və xalqının davamlı inkişafa doğru yolunda dəstək üçün buradadır. Bu gün müzakirə edəcəyimiz strateji prioritet sahələr yalnız BMT üçün deyil, Azərbaycanın DİM-lərə, o cümlədən Minalardan Təmizləmə üzrə Milli DİM 18-ə nail olması üçün dəstəyi təmsil edir."

Günboyu davam edən seminar, Azərbaycanın milli inkişaf prioritetlərinə və DİM-lərə doğru irəliləyişinə dəstək məqsədilə heç kimin kənarda qalmaması üçün kollektiv vəd əsasında strateji prioritet sahələr üzrə geniş konsensusla yekunlaşdı.