Azərbaycanda Balıqçılıq və Akvakultura üzrə görüşlərə başlanıldı

19 oktyabr tarixindən etibarən bir neçə gün davam edən və hər ay keçirilməsi nəzərdə tutulan Balıqçılıq və Balıq Məhsulları Sənayesi vebinar seriyası öz işinə başlayıb. Vebinarda BMT-nin Ərzaq və Kənd Təsərrüfatı Təşkilatı nümayəndələri, Türkiyə Cümhuriyyəti Kənd Təsərrüfatı və Meşəçilik Nazirliyi, Azərbaycan Ekologiya və Təbii Sərvətlər Nazirliyi və özəl sektorun nümayəndələri iştirak edib. Azərbaycanda balıqçılıq və balıqçılıq sənayesində maraqlı tərəflərin nümayəndələrinin iştiakı ilə keçirilən vebinarda sektordakı imkanlar və problemlər və şəbəkələrin qurulmasına dair müzakirələr baş tutdu.

Mərkəzi Asiyada Dayanıqlı Balıqçılıq və Balıq Məhsullarının İdarə edilməsinin (FISHCap) inkişafı layihəsi çərçivəsində təşkil olunan vebinarda iştirakçıkar bu sahədə əməkdaşlıq imkanlarını və Azərbaycanda bu sənayenin səmərəli idarə olunmasını müzakirə etdilər. Bütün iştirakçılar balıqçılıq sənayesində həm milli, həm də regiondaxili əməkdaşlıq və birgə fəaliyyətin sektorun inkişafı üçün ilkin şərt olduğu qənaətinə gəldilər.

Tədbir FAO-nun balıqçılıq üzrə baş mütəxəssisi Haydar Fersoyun aylıq vebinar seriyasının əsas məqsəd və vəzifələrini təqdim edən qısa bir məlumatlandırması ilə başladı. BMT-nin Ərzaq və kənd Təsərrüfatı Təşkilatının (FAO) Azərbaycandakı nümayəndəsi Mələk Çakmak açılış nitqində balıqçılıq və balıq məhsulları yetişdirmə sənayesinin potensialına diqqəti yönəltdi və ətraf mühitə təsirlərini nəzərə alaraq sənayenin düzgün idarə edilməsinin vacibliyini vurğuladı. Xanım Çakmak, balıqçılıq və balıq məhsullarının dünyanın ən sağlam qidalarından biri olduğunu, aclıq və qidalanmanın aradan qaldırılmasında xüsusi bir rol oynaya biləcəyini xatırlatdı. Özəl sektorla tərəfdaşlığın vacibliyini vurğulayan xanım Çakmak, Azərbaycanın balıqçılıq və kənd təsərrüfatı sektorunda əhəmiyyətli bir irəliləyiş olduğunu dilə gətirdi.

Vebinar FAO-nun Mərkəzi Asiya üzrə sub-regional kordinatoru və FAO-nun Türkiyədəki Nümayəndəsi Viorel Gutunun çıxışı ilə davam etdi. O, balıqçılıq və su məhsulları sənayesinin vəziyyəti ilə bağlı brifinq seriyalarının iştirakçılara əməkdaşlıqlar qurmaq, məlumat və təcrübə mübadiləsi etmək, sahələrarası iş birliyini və maraqlı tərəflərin iştirakını gücləndirmək üçün münbit bir mühit yaratmasından məmnun olduğunu bildirdi. Effektiv balıqçılıq və balıq məhsulları idarəçiliyi üçün bunların lazımlı olduğunu əlavə etdi.

Gutunun çıxışından sonra FAO-nun Avropa və Mərkəzi Asiya üzrə Regional Proqramının Rəhbəri Raimund Jehle müzakirələrə qoşuldu. O, sektorda beynəlxalq standartlara vurğu edərək, standartlara uyğun gəlmədiyi üçün balıqçılıq və balıq məhsulları yetişdirmə sahəsindəki təhlükəsizlik problemlərinin davam etdiyini söylədi.

Türkiyə Cümhuriyyəti Kənd Təsərrüfatı və Meşəçilik Nazirliyi - Balıqçılıq və Balıqçılıq Məhsulları üzrə baş direktor Mustafa Altuğ Atalay, qısa məlumatda Türkiyənin balıqçılıq və balıq məhsulları sənayesindəki təcrübələrini bölgədəki həmkarları ilə bölüşməkdən məmnun olduğunu bildirdi.

Tədbir Mehman Axundovun təqdimatı ilə davam etdi. FAO-nun Azərbaycan ilə əməkdaşlığının vacibliyini qeyd edən Azərbaycan Ekologiya və Təbii Sərvətlər Nazirliyinin Biomüxtəliflik üzrə Tədqiqat Mərkəzinin direktoru Mehman Axundov, ölkədə balıq təsərrüfatlarının fəaliyyəti barədə ətraflı məlumat verərək Azərbaycanda bu məhsulların yetişdirilmə perspektivlərini izah etdi. O, eyni zamanda, Azərbaycanın balıqçılıq və balıq məhsulları yetişdirmə sektorundakı çətinliklərini təsvir etdi və bu çətinliklərin öhdəsindən gəlmək üçün təkliflərini irəli sürdü.

Vebinar özəl sektor nümayəndələrinin mütəxəssislərə yönəltdikləri sual-cavab sessiyası ilə başa çatdı.