“Aqrar məsləhət xidmətində hesabatlılıq olmalıdır. Fermerin sahəsi təcrübə sahəsi deyil”

Rayon DAİM-lərinin (Dövlət Aqrar İnkişaf Mərkəzi), Aqrar Elm və İnnovasiya Mərkəzinin nümayəndələrinin, təchizatçı, aqrar məsləhətçi və fermerlərin iştirak etdiyi seminarda beynəlxalq ekspert Qurbanova dövlət, dövlət-özəl tərəfdaşlığı, fermer assosiasiyaları və özəl formatlarda idarə olunan aqrar məsləhət xidməti modelləri barədə məlumat verib. Avropa İttifaqı və eləcə də İqtisadi Əməkdaşlıq və İnkişaf Təşkilatı ölkələrinin uğurlu modelləri kimi, tamamilə özəl olan Danimarka və fermer assosiasiyaları tərəfindən idarə olunan Niderland nümunələri üzərində ətraflı dayanıb. Lakin hər hansı aqrar məsləhət xidməti modelini olduğu kimi ölkəyə “idxal” etməyin doğru olmadığını qeyd edib.

Aqrar elm və innovasiya mərkəzinin baş mütəxəssisi Yaqub Quliyev aqrar məsləhət xidməti göstərilərkən hesabatlılığın olmamasını başlıca problem kimi qeyd edib. “Fermerin sahəsi təcrübə sahəsi deyil. Verilən hər bir məsləhətin məhsuldarlığa necə təsir etdiyi aydınlaşdırılmalıdır” – AEİM nümayəndəsi bildirib. Bu halın xüsusilə zərərvericilərə qarşı mübarizə vasitələri satanların məsləhətindən faydalanan fermerlərə təsir göstərdiyini bildirən baş mütəxəssis daha bir problem kimi pestisidlərin keyfiyyətini qeyd edib.

Seminarda Azərbaycanda aqrar xidmətlərin göstərilməsi ilə bağlı qanun layihəsinin hazırlandığı iştirakçıların diqqətinə çatdırılıb.

Seminar iştirakçısı olan fermerlər aqrar məsləhət xidmətləri almaq istədikdə qarşılaşdıqları çətinliklərdən danışıblar.

Qeyd edək ki, “Aqrar məsləhət xidmətlərinin gücləndirilməsi” Layihəsi Avropa İttifaqının maliyyə dəstəyi ilə həyata keçirilir. 2 illik layihə pilot rayonlarda fermerlərə aqrar məsləhət xidmətlərinin göstərilməsi üzrə sub-layihələr reallaşdıracaq. Layihə çərçivəsində bu regionlarda fermerlərin ehtiyac duyduqları aqrar xidmətlər, həmin xidmətləri əldə etmək üçün münasib üsullar öyrəniləcək, dövlət-özəl tərəfdaşlığı imkanları tətbiq edilərək, Avropa ölkələrinin uyğun modelləri sınaqdan keçiriləcək. “Aqrar məsləhət xidmətlərinin gücləndirilməsi” Layihəsinin həyata keçirilməsində əsas məqsəd müvafiq aqrar xidmət strategiyası yaradaraq, aqrar xidmətlər sistemini gücləndirmək, kənd təsərrüfatının məhsuldarlığını artırmaq və kənd yerlərinin dayanıqlı inkişafına nail olmaqdır.