BMT Baş Assambleyasının prezidenti Azərbaycana səfərini başa vurub

Sammitdəki çıxışında cənab Muhammed-Bande BMT və Qoşulmama Hərəkatının beynəlxalq sülh və təhlükəsizliyə nail olmaq üçün ortaq məqsədinin olduğunu bildirib.

O əlavə edib ki, iki təşkilat arasında ortaq ideallar fundamental insan hüquqlarına, bütün millətlərin suverenliyinə və ərazi bütövlüyünə hörməti ehtiva edir.

Onun sözlərinə görə, Qoşulmama Hərəkatı məntiq və tarazlığın səsi olmağa davam etməli və çətin görünsə də, sülh, sabitlik, insan inkişafı və ədalət naminə, BMT nizamnaməsi çərçivəsində işləməkdən heç vaxt imtina etməməlidir.

Səfər çərçivəsində Baş Assambleyanın prezidenti Azərbaycan Prezidenti İlham Əliyevlə görüşüb. Tərəflər, Qoşulmama Hərəkatının zirvə toplantısında qaldırılan məsələləri, o cümlədən BMT ilə hərəkat arasındakı əməkdaşlıq və ortaq dəyərlərin təbliğində Azərbaycanın oynadığı rolu müzakirə ediblər.

Cənab Muhammed-Bande Azərbaycanın Dayanıqlı İnkişaf Məqsədlərinin həyata keçirilməsi istiqamətində səylərini yüksək qiymətləndirib.

Baş Assambleyanın prezidenti Pakistan və Venesuela prezidentləri və Kuba xarici işlər naziri ilə də ikitərəfli görüşlər keçirib.

Çoxtərəflilik, dayanıqlı inkişaf, sülh və təhlükəsizlik də daxil olmaqla qarşılıqlı maraq kəsb edən məsələlər əsas müzakirə mövzusu olub.

Sammit ərəfəsində Baş Assambleyanın prezidenti BMT-nin Azərbaycandakı nümayəndəliyinin ADA Universitetində (Azərbaycan Diplomatik Akademiyası) BMT Günü ilə bağlı tədbirə qatılaraq çıxış edib.

Çıxışında cənab Muhammad-Bande “qlobal çətinliklərin artması səbəbindən BMT və çoxtərəfli əlaqələrə hər zamankından daha çox ehtiyac duyuruq”, deyib.

O, bütün maraqlı tərəfləri BMT-yə qarşı artan hücumlarla sinə gəlmək üçün səyləri birləşdirməyə, çoxtərəflilik və BMT dəyərləri ətrafında səfərbər olmağa çağırıb.

Oktyabrın 23-də başlayan səfər zamanı cənab Muhammed-Bande Azərbaycan hökuməti, BMTİP və BMT Gender Bərabərliyi və Qadınların Səlahiyyətlərinin Artırılması Qurumu ilə birgə təşəbbüs olan Xəzər qadınlar resurs mərkəzində olub.

O, təcrübələri və uğur hekayələri, eləcə də mərkəzin dəstəyindən necə faydalandıqları haqqında danışan qadın sahibkarlarla görüşüb.

O, bütün Azərbaycan üzrə Qadın Resurs Mərkəzlərinin işini yüksək qiymətləndirib və qeyd edib ki, qadınlara dəstəyin təsiri hədəf çərçivəsindən də kənara çıxır və bütün cəmiyyətə təsir göstərir.

Baş Assambleyanın prezidenti “ASAN” Dövlət xidmət mərkəzi və Sumqayıt Sənaye Parkına səfəri zamanı, vətəndaşlara innovativ üsullarla sosial xidmət göstərilməsi istiqamətində həyata keçirilən səyləri, həmçinin Azərbaycan iqtisadiyyatının şaxələndirilməsi, yoxsulluğun aradan qaldırılması və Dayanıqlı İnkişaf Məqsədlərinin icrası yolunda atılan addımları yüksək qiymətləndirib.