Qulam M. İshaqzainin statistika sahəsində yüksək səviyyəli seminarda çıxışı

Baş nazirin müavini, hörmətli cənab Əli Əhmədov!

Dövlət Statistika Komitəsinin sədri, hörmətli cənab Tahir Budaqov!

BMT-nin Asiya və Sakit okeanı ölkələri üzrə Statistika İnstitutunun (UN SIAP) direktoru, hörmətli cənab Aşiş Kumar!

Məni yüksək səviyyəli rəsmi statistiklər üçün Dayanıqlı İnkişaf Məqsədləri üzrə məlumat və statistikaya dair təşkil olunmuş bu sub-regional seminara dəvət etdiyiniz üçün sizə minnətdarlığımı bildirirəm (seminarda Azərbaycan, Qazaxıstan, Qırğızıstan, Monqolustan, Tacikistan, Türkmənistan və Özbəkistanın milli statistika qurumlarının rəhbərləri və nümayəndələri iştirak edirlər).

Bu seminar bizim hər birimiz –  statistiklər, siyasətçilər, inkişaf sahəsində fəaliyyət göstərən əməkdaşlar və beynəlxalq təşkilatların nümayəndələri üçün  Dayanıqlı İnkişaf Məqsədlərinin monitorinqi üzrə hərtərəfli və güclü bir sistemin yaradılması məqsədilə statistik imkanların gücləndirilməsi yollarının araşdırılması və təcrübə mübadiləsi üçün gözəl fürsətdir.

Keyfiyyətli məlumatların və statistika sisteminin olması cəmiyyətin bütün iştirakçıları tərəfindən düşünülmüş qərarların qəbulu üçün əvəzolunmaz komponentdir. Ölkələr və təşkilatlar “2030-cu ilədək dayanıqlı inkişaf sahəsində gündəliy”in icrasına başladığından, etibarlı və vaxtlı-vaxtında təqdim olunan statistik məlumat və göstəricilərin olması bu gün hər zamankından da vacibdir.

Lakin Dayanıqlı İnkişaf Məqsədlərinin monitorinqi üzrə tələblər hətta ən inkişaf etmiş ölkələr üçün də ciddi çətinliklər yaradır. Yeni texnologiyaların və alternativ məlumat mənbələrinin potensialından istifadə etmək tələb olunur. Cəmiyyətin bütün seqmentlərindən – hökumət, elmi icma, özəl sektor və vətəndaş cəmiyyətindən olan məlumat istehsalçıları və istifadəçilərinin dəstəyini və təcrübəsini səfərbər etmək tələb olunur. Bu, öz növbəsində, bütün maraqlı tərəflərin səylərinin əlaqələndirilməsi üçün güclü mexanizmin olmasını şərtləndirir.

Bu baxımdan, BMT zati-aliləri, cənab İlham Əliyev tərəfindən baş nazirinin müavini Əli Əhmədovun sədrliyi ilə Dayanıqlı İnkişaf üzrə Milli Əlaqələndirmə Şurasının  yaradılması barədə qərarını alqışlayır. Şura ölkənin 2017-ci ilin iyul ayında Yüksək Səviyyəli Siyasi Foruma təqdim olunacaq könüllü hesabatının hazırlanmasına rəhbərlik edir. Bu, hökumətin dayanıqlı inkişaf üzrə 2030-cu il gündəliyinə yüksək səviyyədə sadiqliyini nümayiş etdirir.

BMT DİM-lərin milliləşdirilməsi prosesini sürətləndirmək məqsədilə siyasətlərlə bağlı məsləhətlərin verilməsi, potensialın artırılması və texniki təcrübə vasitəsilə, hökumətin gördüyü işləri dəstəkləyir.  BMTİP həm də DİM-lər üzrə milli səviyyədə əldə olunan irəliləyişi izləmək üçün monitorinq aləti kimi DİM-lər üzrə portalın yaradılması istiqamətində Dövlət Statistika Komitəsi ilə tərəfdaşlıq edir.

Bu baxımdan, DİM-lər üzrə İcra Cədvəlinin hazırlanması DİMƏŞ üçün, eləcə də DİM-lərin vaxtlı-vaxtında və sürətli monitorinqinin təkmilləşdirilməsi, o cümlədən məlumatların adekvat dezaqreqasiyası üçün yeni məlumat mənbələrindən istifadə sahəsində Azərbaycanın öz statistik potensialından maksimum dərəcədə necə yararlandığını göstərən innovativ monitorinq aləti ola bilər.

Azərbaycan hökumətinin dayanıqlı inkişaf gündəliyinin icrasına diqqətinin artırılmasını nəzərə alaraq, hal-hazırda BMT-nin Ölkə üzrə İdarə Heyəti BMT-nin rəhbər vəzifəli əməkdaşları və texniki ekspertlərindən ibarət yüksək səviyyəli missiyanı -“MAPS” missiyasını Azərbaycana göndərib. Missiya DİM-lərin icrası üzrə yol xəritəsinin işlənib hazırlanması, o cümlədən DİM-lərin milli inkişaf strategiyası və planlarına, monitorinq çərçivələrinə və büdcə proseslərinə inteqrasiyası istiqamətində DİMƏŞ, müvafiq nazirliklər, millət vəkilləri, vətəndaş cəmiyyəti təşkilatları, elmi icma və özək sektor da daxil olmaqla bütün maraqlı tərəflərlə bu həftə məsləhətləşmələr aparacaq.

Bütün iştirakçılara məhsuldar müzakirələr və uğurlu seminar arzu edirəm!