Azərbaycanda miqrantların maliyyə ehtiyacları üzrə bacarıqların gücləndirilməsi

Beynəlxalq Miqrasiya Təşkilatının (BMqT) Azərbaycandakı Nümayəndəliyi 7-10 may tarixlərində miqrantlara ən çox xidmət göstərən bank filialları və poçt şöbələrindən 50-dən çox müştəri xidmətləri mütəxəssisi üçün potensialın gücləndirilməsi üzrə təlimlər təşkil etmişdir. Tədbir Dövlət Miqrasiya Xidməti ilə əməkdaşlıq çərçivəsində və BMqT-nin İnkişaf Fondunun maliyyə dəstəyi ilə həyata keçirilən “Azərbaycanda pul köçürmələrinin sosial-iqtisadi təsirlərinin artırılması” layihəsi çərçivəsində Miqrasiya üzrə Regional Təlim Mərkəzində keçirilib.

Təxminən 1 milyon Azərbaycan vətəndaşı xaricdə yaşayır və Azərbaycanda 100 min miqrant yaşayır  və onların hamısı müxtəlif maliyyə xidmətlərindən, o cümlədən pul köçürmələridən istifadə edir. 2023-cü ildə aparılmış qiymətləndirmə müəyyən etmişdir ki, Azərbaycanda pul köçürmələrinin xərci DİM 10.c-də nəzərdə tutulan 3%-dən aşağı olması və ölkədə miqrantların maliyyə inklüzivliyinin yüksək olmasına baxmayaraq, miqrantların maliyyə ehtiyaclarının daha yaxşı qarşılanması məqsədilə əlavə tədbirlər görülə bilər. Belə ki, Azərbaycanın altı aparıcı bankı (AFB Bank, Xalq Bank, Rabitəbank, ABB, Kapital Bank və Bank Respublika) və Azərpoçt (milli poçt xidməti) layihənin İşçi Qrupu tərəfindən təsdiq edilmiş yol xəritəsinə uyğun olaraq müştəri xidməti əməliyyatçılarının miqrantlar və həssas qrupların spesifik ehtiyacları barədə məlumatlılığının artırılması və bu ehtiyacların daha yaxşı qarşılanması üçün onların bacarıqlarının gücləndirilməsi məqsədilə keçirilmiş bir günlük təlimlərdə iştirak edib.

Tədbirin açılışında BMqT-nin Azərbaycandakı nümayəndəliyinin rəhbəri v.i.e. cənab Amr Taha və Dövlət Miqrasiya Xidmətinin Baş İdarəsinin rəisi cənab Vahid Qəhrəmanov çıxış ediblər. Təlimdə miqrantların, o cümlədən qaçqınların və sığınacaq axtaranların hüquqları, Azərbaycanda xarici rezidentlərə təqdim olunan müxtəlif vəsiqələri ilə onların maliyyə xidmətlərinə çıxışı və sənədlərin onlyan şəkildə yoxlanılmasından bəhs edilib. Həmçinin “müştərilərin lazımi yoxlanılması” və “öz müştərini tanı” qaydaları, miqrantların maliyyə ehtiyacları, müxtəlif mədəniyyətlərlə və həssas qruplarla işləmək bacarıqları mövzularında təlim keçirilmişdir. 

“INNOLAND” İnkubasiya və Akselerasiya Mərkəzinin direktoru cənab Nicat Əmiraslanovun moderatorluğu ilə keçirilən müsabiqədə iştirakçılar qruplara bölünərək miqrantların maliyyə ehtiyaclarını qarşılamaq üçün innovativ həllər təklif ediblər. İştirakçılar hökumət və bank portallarının daha yaxından inteqrasiyası, miqrantlar və vətəndaşlar üçün keşbek kartları və güzəştli məhsullar, xidmətlərin müxtəlif dillərdə göstərilməsi və digər bu kimi yaradıcı və innovativ ideyalar təklif ediblər.

Təlim böyük maraqla qarşılandı və iştirakçılardan biri qeyd etmişdir: “Bu təlim Azərbaycan cəmiyyətinin mühüm seqmenti olan miqrantların maliyyə ehtiyaclarını daha yaxşı başa düşməyə imkan verdi.  Onların Azərbaycanda yaşayışını mümkün qədər rahat etmək üçün bankımızın təklif etdiyi xidmətləri daim təkmilləşdirməsi bizi çox sevindirir”.

Tədqiqatlar göstərdi ki, hər əlavə 1% immiqrasiyanın təyinat ölkələrində ÜDM-i 2%-dək artıra bilər. Azərbaycanlı emiqrantlar müxtəlif ölkələrin iqtisadi inkişafına töhfə verdiyi kimi Azərbaycanın iqtisadiyyatın müxtəlif sahələrinin inkişafı davam etdikcə miqrantların rolu da artmağa davam edəcək.

Sözügedən təlimin dəyəri, həmçinin onun özəl sektor və hökumət arasında ikitərəfli öyrənmə vasitəsi olmasından irəli gəlir. Bu, miqrasiyanın bütün ölçüləri üzrə geniş çoxtərəfli tərəfdaşlığa çağıran Miqrasiya üzrə Qlobal Sazişin “bütün cəmiyyət” yanaşmasına uyğun gəlir. 

Bu təlim daha sürətli, təhlükəsiz və ucuz pul köçürmələrinin təşviqi və miqrantların maliyyə inklüzivliyinin təmin edilməsi ilə bağlı Miqrasiya üzrə Qlobal Paktın 20-ci məqsədini və Bərabərsizliyin Azaldılması  üzrə 10-cu DİM-i dəstəkləyir.