FAO Azərbaycandakı Ofisi su ehtiyatlarının idarə edilməsinin müzakirəsi üçün tərəfdaşların görüşünü təşkil edib

BMT-nin Ərzaq və Kənd Təsərrüfatı Təşkilatının Azərbaycandakı Tərəfdaşlıq və Əlaqəndirmə Ofisi (FAO) “Təkmilləşdirilmiş Kənd Təsərrüfatı Su Ehtiyatlarının idarə Edilməsi: davamlı kənd təsərrüfatının inkişafına doğru” layihəsi çərçivəsində ölkə ərazisində qabaqcıl suvarma sistemlərinin geniş tətbiqi məsələsini müzakirə etmək üçün tərəfdaşların görüşünü təşkil edib.

Tədbirdə çıxış edən FAO-nun Azərbaycandakı nümayəndəsinin müavini Bariz Mehdiyev FAO- nun mandatı və ölkədəki fəaliyyətlərindən məlumat verərək tədbirin mövzusu barəsəində müzakirələrin əhəmiyyətini vurğulayaraq, icra olunan layihələr çərçivəsində bu istiqəmətdə dəstək göstərildiyini və gələcəkdə bu dəstəyin davam etdiriləcəyini bildirib. Azərbaycan Respublikası Kənd Təsərrüfatı Nazirliyində Torpaqdan İstifadə Şöbəsinin müdiri Firidun Tağıyev öz növbəsində bu kimi tədbirlərdə iştirakçıların açıq platformada iştirakını alqışlayaraq problemləri müzakirə etməkdən çəkinməmələrini qeyd edib. Bundan əlavə, tədbir sırasında müasir suvarma sistemlərinin mənimsənilməsinin dəstəklənməsi və stimullaşdırılması sahəsində dövlət subsidiya proqramı haqda Aqrar Kredit və İnkişaf Agentliyində  Kredit Şöbəsinin müdiri, Rövşən Məmmədli təqdimatla çıxış edib. Eyni mövzu ilə bağlı tədbir iştirakçısı, Arizona Universitetinin Professoru Olcay Ünver Türkiyə təcrübəsi haqda danışaraq iştirakçıları məlumatlandırıb.

Tədbirdə iştirak edən fermerlər, kənd təsərrüfatı birlikləri, dövlət qurumları və özəl sektor nümayəndələri tədbir boyu suvarma suyunun idarəolunmasındakı çatışmazlıqları bölüşərək hər region üzrə olan problemləri müzakirə edib. Müzakirələrin ayrılmaz tərkib hissəsi kənd təsərrüfatı təcrübələrinin, xüsusən də suvarmanın inkişaf etdirilməsi kontekstində özəl sektorun çoxşaxəli rolunun tədqiqi olub. Eləcə də tədbirdə vahid yanaşmanı sürətləndirmək məqsədi ilə kənd təsərrüfatının su ehtiyatlarının idarə edilməsi ilə bağlı mürəkkəb məsələlərin həlli üçün həm dövlət, həm də özəl sektorun qarşılıqlı şəkildə fəaliyyət göstərməsi müzakirə olunub.

Qeyd edək ki, FAO-nun Azərbaycanda təşkil etdiyi “Maraqlı Tərəflərin Gürüşü” tədbiri dayanıqlı və möhkəm gələcəyə doğru müasir suvarmada tərəfdaşlığın təşviqi və təcrübə mübadiləsini təmin etmək üçün dinamik forum rolunu oynayıb.