Baş katibin müraciəti - Nifrət nitqinə qarşı beynəlxalq mübarizə günü

Nifrət nitqi çox vaxt siyasi mənfəət naminə qorxu və parçalanmanı alovlandırmaq məqsədilə istifadə olunur, bu isəicmalar və cəmiyyətlərə baha başa gəlir. O, zorakılığa təhrik edir, gərginliyi artırır, habelə vasitəçilik və dialoqu təşviq etmək səylərinə maneələr yaradır. Bu, soyqırım və digər amansızcinayətlərinin xəbərdarlıq işarələrindən biridir.

Nifrət nitqi adətən həssas qrupları hədəfləməklə ayrı-seçkiliyi, stiqmanı və marginallaşmanı gücləndirir. Azlıqlar, qadınlar, qaçqınlar, miqrantlar və müxtəlif cinsi oriyentasiya və kimliyə malik insanlar tez-tez hədəfə çevrilirlər. Sosial media platformaları nifrət nitqini ildırım sürəti ilə yaya bilər.

Nifrət nitqinə qarşı yanlış və qeyri-müəyyən cavab tədbirləri, o cümlədən ümumi qadağalar və internetin qadağası söz və ifadə azadlığını məhdudlaşdırmaqla insan hüquqlarını poza bilər.Onlar hətta nifrət dolu mesajların yayılmasına qarşı effektiv mübarizə apara bilən hüquq müdafiəçiləri və jurnalistləri də susdura bilərlər.

Amma biz nifrət nitqi qarşısında aciz deyilik. Biz onun təhlükələri haqqında məlumatlılığı artıra bilərik və bunu etməliyik. Həmçinin nifrət nitqinin bütün formalarının qarşısını almaq və ona son qoymaq üçün çalışmalıyıq.

BMT-nin nifrət nitqinə dair strategiyası və fəaliyyət planı beynəlxalq insan hüquqları standartlarına uyğun olaraq nifrət nitqinin səbəbləri və təsirləri ilə mübarizədə bizim üçün hərtərəfli fəaliyyət çərçivəsidir.

Dünyanın müxtəlif yerlərində fəaliyyət göstərən ofislərimiz və komandalarımız bu strategiyaya əsaslanan fəaliyyət planlarını icra edərək nifrət nitqinə qarşı mübarizə aparırlar.

Təhsil təşəbbüsləri, pozitiv kommunikasiya kampaniyaları, nifrət nitqinin səbəblərini anlamaq və aradan qaldırmaq üçün aparılan tədqiqatlar, inklüzivlik və bərabər hüquqların təşviqi bu sahədə mühüm rol oynayırlar. Dini, icma və biznes liderləri də bu işdə mühüm rol oynaya bilər.

BMT rəqəmsal platformalarda informasiya bütövlüyünə dair könüllü davranış kodeksi ilə bağlı hökumətlər, texnologiya şirkətləri və başqa qruplarla məsləhətləşmələr aparır. Məqsəd -ifadə azadlığını qorumaqla yanaşı, misinformasiya, dezinformasiya və nifrət nitqinin yayılmasının azaldılmasınanail olmaqdır.

Gəlin Nifrət nitqinə qarşı beynəlxalq mübarizə günündə inklüziv, ədalətli, sülhsevər icmalar və cəmiyyətləri təşviq etməklə və hər kəsin hüquq və ləyaqətini qorumaqla bu zərərli və dağıdıcı fenomenin qarşısını almaq və dayandırmaq üçün səylərimizi artıraq.