BMT-nin Rezident əlaqələndiricisinin 2-ci DİM Dialoqunda çıxışı

Zati-aliləri, hörmətli iştirakçılar,

Xanımlar və cənablar:

Bu gün sizin hamınızı Dayanıqlı İnkişaf üzrə Milli Əlaqələndirmə Şurası və Azərbaycan Respublikasının İqtisadiyyat Nazirliyinin tərəfdaşlığı ilə təşkil olunmuş İkinci DİM Dialoqunda salamlamaqdan böyük məmnunluq duyuram.

Bu gün biz əsas maraqlı tərəflər, o cümlədən hökumət, BMT, özəl sektor, vətəndaş cəmiyyəti, Beynəlxalq Maliyyə İnstitutları və inkişaf tərəfdaşları üçün DİM öhdəlikləri və Azərbaycanın sosial-iqtisadi inkişafının milli prioritetlərinin həyata keçirilməsinə dəstək vermək və innovativ həlləri asanlaşdırmaq üçün birgə platforma olan “DİM Dialoqlarını” davam etdiririk.

Fürsətdən istifadə edərək, Baş nazirin müavini Əhmədova və Azərbaycan Respublikasının İqtisadiyyat Nazirliyinə bu işdə göstərdikləri liderliyə və tərəfdaşlığa görə təşəkkürümü bildirmək istəyirəm. Mən həmçinin Milli Koordinasiya Şurasının katibliyi ilə birlikdə dialoqa hazırlıqla bağlı analitik-tədqiqat işini görən UNICEF, UNFPA və ofisimdən olan həmkarlarıma təşəkkürümü bildirmək istərdim.

Xanımlar və cənablar,

Ötən ilin noyabrında keçirilmiş ilk DİM Dialoqunun tövsiyəsi əsasında 2-ci Dayanıqlı İnkişaf Dialoqu “Azərbaycanda sosial və iqtisadi inklüzivlik” mövzusuna həsr olunub.

Bu mövzunun seçimi olduqca yerinə düşdü:

“Azərbaycan 2030: Sosial-İqtisadi İnkişafın Milli Prioritetləri” və “2022-2026-cı illərdə Sosial-İqtisadi İnkişaf Strategiyası”nda sosial ədalətə əsaslanan dinamik və inklüziv cəmiyyət beş prioritet istiqamətindən biri kimi müəyyənləşdirilib.

Ən əsası Dayanıqlı İnkişaf üzrə 2030 Gündəliyinin “heç kəsi kənarda qoymamaq” prinsipi hər bir ölkənin sağlam və inkişaf edən planetdə hər kəsin hüquqlarını və rifahını təmin etmək yolunda ümumi vədidir. Lakin 2030-cu ilə gedən yolun yarısında bu vəd təhlükə altındadır. 

Onilliklər ərzində ilk dəfə olaraq iqlim dəyişikliyi, münaqişələr, iqtisadi tənəzzül və COVID-19 pandemiyasının qalıcı izlərinin birgə təsiri altında qlobal tərəqqi geriləyir.

Bu ilin sentyabr ayında ölkə rəhbərləri Nyu-Yorkda BMT-nin Baş Assambleyası zamanı keçiriləcək Qlobal DİM Sammitində bir araya gələcəklər. Bu, Dayanıqlı İnkişaf Məqsədlərini yoluna qoymaq və 2030-cu ilə qədər DİM-lərin sürətləndirilməsi ilə bağlı lazımi tədbirləri və öhdəlikləri təmin etmək üçün önəmli fürsətdir.

Hörmətli iştirakçılar,

Qlobal tendensiyalara baxmayaraq, son 20 ildə Azərbaycan ÜDM-ın 2004-2022-ci illər arasında adambaşına 3,4 dəfə artımı ilə güclü iqtisadi göstəricilər nümayiş etdirib. Ölkə ifrat yoxsulluğun aradan qaldırılması və milli yoxsulluq səviyyəsinin 2001-ci ildəki 50%-dən 2022-ci ildə 5,5%-ə enməsinə nail olub.

Azərbaycanın ümumi daxili məhsulun təxminən 3,1%-ni təşkil edən dəstək proqramı ilə COVID-19 pandemiyasına qarşı mübarizə və onun əhali və özəl sektora təsirini minimuma endirmək üzrə güclü strategiyasını xüsusi qeyd etmək istərdim.

Azərbaycan hökuməti minimum əməkhaqqının, pensiyaların və sosial müavinətlərin ardıcıl artırılması, eləcə də regionların sosial-iqtisadi inkişafına dair məqsədyönlü proqramların qəbul edilməsi yolu ilə gəlir bərabərsizliyinin azaldılması istiqamətində təqdirəlayiq işlər görüb.

Mən “2022-2026-cı illər üçün Sosial-İqtisadi İnkişaf Strategiyası”nda kişi və qadın maaşları arasındakı fərqin azaldılması üzrə xüsusi milli hədəfi görməkdən xüsusi məmnunluq duyuram. Xüsusilə də gender bərabərliyinin təşviqinin inklüziv və dayanıqlı inkişaf üçün əsas olduğunu təsdiqləyən əhəmiyyətli sübutlar toplusu olduğu üçün.

Hökumətin geri alınmış ərazilərin bərpası və yenidən qurulması istiqamətində atdığı addımlar məcburi köçkünlər və onların rifahı üçün dayanıqlı həll yollarının təmin edilməsində mühüm rol oynayır.

BMT ailəsi ölkədə sosial və iqtisadi inklüzivliyi artırmaq, o cümlədən DİM-in sürətləndirilməsi istiqamətində Azərbaycanın səylərini dəstəkləməyə tam sadiqdir.

Xanımlar və cənablar:

Azərbaycan DİM-lərə nail olmaq və inklüziv inkişafın təmin edilməsində əhəmiyyətli irəliləyiş əldə etsə də, çoxtərəfli əməkdaşlıq səylərini tələb edən bəzi problemlər qalmaqdadır.

Mən bu gün Azərbaycanda sosial və iqtisadi inklüzivliyin daha da artırılması üçün təklif olunan yollar və həll üsullarını müzakirə etməyi səbirsizliklə gözləyir və hamınızı müzakirələrdə fəal iştirak etməyə dəvət edirəm.

Ümid edirəm ki, bugünkü DİM Dialoqunun nəticəsi 2023-cü ilin sentyabrında keçiriləcək Qlobal DİM Sammitində DİM-in Transformasiyası üzrə Azərbaycanın Milli Öhdəliklərinə töhfə verəcək.

Təşəkkür edirəm!