İkinci DİM dialoqu Azərbaycanın sosial və iqtisadi inklüzivliyə doğru irəliləyişini nəzərdən keçirir

BAKI, 14 iyun 2023-cü il – 2030-cu ilə qədər Azərbaycanda sosial və iqtisadi inklüzivliyə həsr olunmuş İkinci DİM dialoqu dövlət qurumları, Birləşmiş Millətlər Təşkilatı (BMT), beynəlxalq maliyyə institutları (BMİ), diplomatik korpus, özəl sektor, vətəndaş cəmiyyəti və akademik dairələrdən olan 100-dən çox iştirakçını bir araya gətirib.

Azərbaycanın Dayanıqlı İnkişaf üzrə Milli Əlaqələndirmə Şurası, İqtisadiyyat Nazirliyi və BMT-nin təşkil etdiyi tədbirdə BMT-nin Ticarət və İnkişaf Konfransının (UNCTAD)hazırladığı İnklüziv İnkişaf İndeksinə uyğun olaraq Azərbaycanın inklüziv artım göstəriciləri üzrə irəliləyişinə dair təhlilin nəticələri müzakirə olunub.

İştirakçılar həmçinin işsiz gənclər, qadınlar, məcburi köçkünlər, miqrantlar, kənd əhalisi, yaşlı insanlar, əlilliyi olan şəxslərin də daxil olduğu həssas qrupların sosial inklüzivliyinin daha da gücləndirilməsi, eləcə də onların sosial-iqtisadi proseslərdə mənalı və səmərəli iştirakının təminatı ilə bağlı strategiyalara dair fikir mübadiləsi aparıblar.

Onlar “Azərbaycan 2030: Sosial-iqtisadi inkişafa dair Milli Prioritetlər” və “2022-2026-cı illərdə Sosial-İqtisadi İnkişaf Strategiyası”nda sosial ədalətə əsaslanan dinamik, inklüziv cəmiyyətin Azərbaycanın 2030-cu ilədək inkişafının beş prioritet istiqamətindən biri kimi müəyyən edilməsi faktını alqışlayıblar.

İştirakçılar vurğulayıb ki, inklüziv artım və sosial inklüzivlik Dayanıqlı İnkişaf Məqsədlərinin (DİM) əsasında dayanır və 2030-cu ilədək Dayanıqlı İnkişaf Gündəliyinin əsas prinsipi olan heç kəsi kənarda qoymamaq prinsipinə uyğundur.

Bundan əlavə, tədbir 2023-cü ilin sentyabrında Nyu-Yorkda BMT Baş Assambleyası zamanı keçiriləcək DİM Sammitinə qlobal səviyyədə hazırlığın müzakirəsi üçün platformanı təminedib. Sammitdə DİM-lərin transformasiyası üzrə milli və qlobal öhdəliklərin qəbul edilməsi gözlənilir.

İştirakçılar həmçinin Azərbaycanda inklüziv artımın və sosial inklüzivliyin gücləndirilməsi üzrə birgə öhdəlikləri müzakirə ediblər və bu öhdəliklərin 2023-cü ilin sentyabrında keçiriləcək qlobal DİM Sammitində Azərbaycanın DİM-lərin Transformasiyası üzrə Milli Öhdəliklərinə töhfəsi olmasını təklif ediblər. 

İkinci DİM Dialoqu BMT-nin Rezident Əlaqələndirici Ofisi və İqtisadiyyat Nazirliyinin dəstəyi ilə Dayanıqlı İnkişaf üzrə Milli Əlaqələndirmə Şurasının rəhbərliyi ilə başlanmış DİM Dialoqu silsiləsi çərçivəsində təşkil olunub.