BMT-nin Rezident Əlaqələndiricisi Vladanka Andreevanın "Gənclər üçün Dayanıqlı İnkişaf Məqsədləri və Maliyyə Akademiyası” proqramının bağlanış mərasimində video müraciəti

Hökumət və akademik dairələrdən olan dəyərli tərəfdaşlar,

BMT-dən olan həmkarlarım,

Xanımlar və cənablar,

Gənclər üçün Dayanıqlı İnkişaf Məqsədləri (DİM) və Maliyyə Akademiyası proqramının bağlanış mərasimində çıxış etməkdən məmnunluq duyuram.

İcazə verin, inkişafın maliyyələşdirilməsi sahəsində gələcək nəsillərə lazımı bilik və bacarıqların verilməsi işinə əvəzsiz töhfə verən

Azərbaycan hökuməti və universitet rəhbərlərinə səmimi təşəkkürümü çatdırım.

BMT Baş katibinin də vurğuladığı kimi, DİM-ə və Paris Sazişində qeyd olunan öhdəliklərə nail olmağa tam dəstək verəcək ardıcıl, əlaqələndirilmiş və inklüziv qlobal maliyyə sisteminə ehtiyacımız var.

İnkişafın maliyyələşdirilməsində irəliləyiş bir neçə vacib faktordan asılıdır: yaxşı tərtib olunmuş strategiyalar, siyasi iradə və maraqlı tərəflərin geniş dairəsinin əməkdaşlığı.

Gələcəyin aparıcı qüvvəsi kimi, akademik dairələr və gənclər onlar arasında mühüm yer tutur.

Gənclər üçün DİM və Maliyyə Akademiyası bu iki vacib iştirakçını bir araya gətirən dinamik platforma rolunu oynayır və DİM-lərə doğru irəliləyişi sürətləndirə biləcək həlləri araşdırmaq və ideyaları təklif etmək üçün şərait yaradır.

İnanıram ki, iştirakçılar yüksək səviyyədə təşkil olunmuş və intensiv keçən təlim proqramından zövq alıblar.

Əldə etdikləri bilik və bacarıqlarla onlar artıq DİM-in maliyyələşdirilməsi üzrə səfirləri olmağa hazırdırlar.

Gənclər üçün DİM və Maliyyə Akademiyasının bütün iştirakçılarına parlaq və dolğun gələcək, işlərində müvəffəqiyyətlər arzulayıram.

Bir daha Gənclər üçün DİM və Maliyyə Akademiyasının uğur qazanmasında əməyi olan hər kəsə öz dərin minnətdarlığımı bildirirəm.

Gəlin gələcək nəsillərə bərabər və dayanıqlı dünya qurmaq üçün birgə səylərimizi davam etdirək.

Təşəkkür edirəm