"Reabilitasiyaya dəstək: COVID-19 ilə bağlı xəstəlikdən sonra özünü idarəetmə” bələdçisi

Avropa İttifaqının (Aİ) və Ümumdünya Səhiyyə Təşkilatının (ÜST) birgə icra etdikləri Sağlamlıq üçün Həmrəylik Təşəbbüsü çərçivəsində “Reabilitasiyaya dəstək: COVID-19 ilə bağlı xəstəlikdən sonra özünü idarəetmə” bələdçisinin təqdimatı olub. Yenilənən bölmələrdən ibarət təlimat kitabçası 2020-ci ildə jurnalistlər üçün məsləhətləri özündə ehtiva edən “COVID-19 informasiya bələdçisi”nin dərc edilməsindən sonra sözügedən Aİ-ÜST layihələri çərçivəsində işıq üzü görmüş ikinci nəşrdir.

COVID-19-dan sağalan yetkin şəxslərə dəstək və məsləhətlər üçün nəzərdə tutulmuş bələdçidən hospitalizasiyadan sonra evə yazılmış pasiyentlər, habelə hospitalizasiyaya ehtiyacı olmayan əhali qrupu istifadə edə bilər. Bəzi hallarda 12 həftədən artıq davam edə bilən əlamətlər COVID-19-dan sonrakı vəziyyət adlanır, eləcə də uzunmüddətli COVID-19 və ya COVID-19-dan sonrakı sindrom olaraq da tanınır. Ümumilikdə, bu əlamətlər zamanla aradan qalxır, təlimat kitabçası isə ümumi əlamətlərin öhdəsindən gəlmək üçün bəzi praktik təkliflər verir. Bələdçidəki tövsiyələr hər hansı fərdi reabilitasiya proqramını və ya həkimlər tərəfindən verilən məsləhətləri əvəz etməməlidir.