Avropa İttifaqı və BMTİP müxtəlif peşə istiqamətləri üzrə “Dual Təhsil/ İş yerində öyrənmə” yanaşmasını tətbiq edir

Aİ-nin maliyyələşdirdiyi "Gələcək üçün peşə təhsili və təlimi" layihəsi çərçivəsində tətbiq edilən dual təhsil proqramı tələbələrin real iş mühitində öyrənməsinə, bilavasitə peşə təhsilinin kefiyyətinin yüksəldilməsinə və müasirləşdirilməsinə xidmət edir.

Hazırda layihənin dəstəyi ilə turizm, mebel, tekstil və xidmət sahələri üzrə Şəki, Lənkəran, Cəlilabad və Bakı şəhərlərində aparıcı işəgötürən müəsissələr ilə əməkdaşlıqlar qurulub və fəaliyyətlərə başlanılıb.

“Mehmanxana inzibatçısı” ixtisası üzrə Şəki Dövlət Peşə Təhsili Mərkəzi ilə “Marxal Resort & Spa” və “Sheki  Palace” mehmanxanaları; “mebel ustası”, “dülgər”, “üzlükçü dizayner” və “tikiş avadanlıqların operatoru” ixtisasları üzrə Cəlilabad Dövlət Peşə Təhsil Mərkəzi ilə “Woodpecker” mebel fabriki  arasında; “təmirçi-çilingər” ixtisası üzrə isə Lənkəran Peşə Liseyi ilə “Lənkəran Avtoservis” şirkəti arasında dual proqramın icrası üçün razılaşmalar əldə edilib. Hazırda tələbələr adıçəkilən müəssisələrdə praktiki təlimlərdə iştirak edirlər.

Həmçinin Mədəniyyət və Sənətkarlıq üzrə Bakı Dövlət Peşə Təhsil Mərkəzinin tələbələri “aşpaz” ixtisası üzrə “Saffron” Restoranlar qrupunun “Amburan” istirahət mərkəzində, “ərzaq və qeyri ərzaq mallarının satıcısı, nəzarətçi-xəzinədar” ixtisası üzrə “ARAZ” supermarketləri şəbəkəsində, eyni mərkəzin “tikiş operatoru, tikişçi” ixtisası üzrə təhsil alan tələbələri isə “Barama Tekstil Fabriki” MMC şirkətində dual proqrama qoşulublar.

Ənənəvi peşə təhsilindən fərqli olaraq, dual təhsil proqramında tələbələr əldə etdikləri nəzəri bilikləri sahələrinə uyğun müəssisələrdə, real iş şəraitində praktiki olaraq tətbiq edə və öyrənə bilirlər. Proses paralel şəkildə və təhsil ili boyunca icra edilir. Bu eyni zamanda, təhsil müəssisələrinə bazarın tələblərindən birbaşa xəbərdar olmaq və müvafiq qaydada təhsil məzmununu dəyişmək imkanı verir.

Dual təhsil yanaşmanın icrası üçün layihənin fəaliyyət göstərdiyi peşə təhsil müəssisələri (PTM) ilə bir sıra işəgötürən qurumlar arasında razılaşmalar əldə edilib. Qarşılıqlı fəaliyyət razılaşmasına əsasən, proqram müddətində tələbələr həmin müəssisələrin xüsusi geyimləri, nəqliyyat, sığorta və qida ilə təmin edilirlər.

Qeyd edilməlidir ki, “iş yerində öyrənmə” yanaşmasının icrasına ön hazırlıq mərhələsi olaraq, layihə tərəfindən prosesə cəlb edilən tərəflərlə qabaqcıl təcrübələrin paylaşılması və qarşılıqlı gözlənti və öhdəliklərin müəyyən edilməsi üçün görüşlər keçirilib, o cümlədən proses iştirakçılarına dual təhsilin aparılmasında  və bu mövzuların işıqlandırılması üzrə kommunikasiya təlimləri təşkil edilib.

Layihə tərəfindən “dual təhsil/ iş yerində öyrənmə” proqramı çərçivəsində gender bərabərliyi qorunmaqla 130 nəfərə yaxın qadın və kişi tələbə layihənin əhatə etdiyi regionlarda prosesə cəlb edilib. Proqramın sonunda müvafiq olaraq, 4 kurrikulumun və tədris materiallarının yenilənməsi planlaşdırılır. Gələcəkdə isə bu yanaşmanın daha geniş tətbiqi üçün baza konsepsiyanın yazılması da nəzərdə tutulur.

“İş yerində öyrənmə” yanaşması istiqamətində baş tutan fəaliyyətlər – tələbələrə peşə ixtisasları üzrə bazarın tələblərinə cavab verən bilik və bacarıqları əldə etməsinə birbaşa dəstək olacaq, onların məşğulluq imkanlarının artmasına, dövlət-özəl sektor əməkdaşlığına, eləcə də peşə təhsilli səriştəli kadrların hazırlanmasına töhfə verəcək.