Bölgələrdə yerli qida istehsalçılarının praktiki təlimləri davam edir.

Təlimlər layihə çərçivəsində dəyər zənciri üzrə seçilmiş məhsulların 3 müxtəlif istehsal sahəsini əhatə edir. Təlimlər zamanı iştirakçılar qaxac qurudulması, xirnik bəkməzi, xirnik qurudulması və qoz-fındıq əzmələrindən şirniyyatların hazırlanması üzrə praktiki biliklər əldə ediblər. Təlimlərin həyata keçirilməsində əsas məqsəd yerli istehsalçıların istehsal potensialını artırmaq və layihə iştirakçılarının istehsal sahəsi üzrə bacarıqlarını təkmilləşdirməkdir. Həmçinin təsərrüfat sahələrində istehsal prosesinin qida təhlükəsizlik qaydalarına uyğunlaşdırması və yerli məhsulların bazara çıxışına dəstək verilməsi təlimlərin əsas məqsədlərindən biridir.

Təlimlər zamanı qaxac ətin qurudulması prosesinin bütün mərhələləri fasilitatorlar (mütəxəssislər) tərəfindən layihə iştirakçılarına əyani şəkildə nümayiş olunub. Daha sonra qaxac üçün seçiləcək heyvanın kəsimdən öncə peyvəndlənməsinin vaxtında həyata keçirilməsinin və kəsimə 3 ay qalmış rasionlu yemlərlə bəslənməsinin əhəmiyyəti vurğulanıb.

Xirnik bəkməzinin hazırlanması, xirnik qurudulması və qoz-fındıq əzmələrindən şirniyyatların hazırlanması üzrə baş tutan praktiki təlimdə məhsulların hazırlanması, çeşidlənməsi, yuyulması, soyulması, soyudulması, həmçinin qablaşdırılması və paketlənməsi prosesi ardıcıl şəkildə həyata keçirilib.

Təlimlər “Azərbaycanın şimal-qərb bölgəsində dayanıqlı və inklüziv aqro-ərzaq sistemlərinin inkişaf etdirilməsi layihəsi” çərçivəsində Qax, Zaqatala və Balakən rayonlarında həyata keçirilib.