ÜST Azərbaycanın dəstəyi ilə Şamaxı Təqaüd Proqramı çərçivəsində ATU tələbələri ilə ilk görüş keçirilib

Tədbirə Şamaxı Şəhər İcra Hakimiyyətinin Başçısı Tahir Məmmədov, ÜST-nin Azərbaycandakı Nümayəndəsi və Ölkə Ofisinin Rəhbəri Dr Hande Harmancı (onlayn şəkildə), Azərbaycan Tibb Universitetinin (ATU) Rektoru Dr Gəray Gəraybəyli, Azərbaycan Dövlət Həkimləri Təkmilləşdirmə İnstitutunun (ADHTİ) rektoru Dr Nazim Qasımov, Azərbaycan Respublikası Təhsil Nazirliyinin Elm, ali və orta ixtisas təhsili şöbəsinin müdiri Nicat Məmmədli, Səhiyyə Nazirliyinin, İcbari Tibbi Sığorta üzrə Dövlət Agentliyinin və Tibbi Ərazi Bölmələrini İdarəetmə Birliyinin (TƏBİB) nümayəndələri, habelə Türkiyənin Ondokuz Mayıs, Hacettepe, Ege və Dokuz Eylül universitetlərinin ekspertləri və yerli tibb mütəxəssisləri iştirak ediblər.

Tədbir zamanı tibb ekspertləri və gənc həkimlər tərəfindən Şamaxı Təqaüd Proqramı çərçivəsində keçirilmiş təlimlərin praktik nəticələrindən söhbət açılıb. Çıxış edən türkiyəli mütəxəssislər və 6-cı kurs tələbəsi olan üç intern-həkim Şamaxı Təqaüd Proqramının məqsəd və fəaliyyətləri barədə danışaraq Proqramın ilk tələbə iştirakçılarının təcrübələrini müzakirə ediblər.

Tibb təhsili və tibb bacısı ixtisası üzrə təhsil proqramları modellərinə həsr edilmiş digər sessiyada isə bu istiqamətdəki təhsilin Azərbaycan üçün əhəmiyyətindən bəhs edilən mini-simpozium təşkil edilib. Sual-cavab formatında təşkil edilmiş sessiyada tibb fakültələrində tədris mühiti və onun yaxşılaşdırılması perspektivləri, tibb təhsili və tibb bacısı ixtisası üzrə təhsil proqramlarında mövcud modellər və yanaşmalar, tədrisin optimallaşdırılması metodları, Azərbaycanda tibb təhsili kurikulumu, onun keçmişi, bu günü və gələcəyi, həmçinin klinik tədris və müvafiq yanaşmalar mövzularında müzakirələr aparılıb.