Press reliz

BMT QAK Avropa İttifaqının Azərbaycanda münaqişədən ziyan çəkmiş ailələrə yardımını alqışlayır

21 dekabr 2021

  • BMT-nin Qaçqın Agentliyi olan BMT QAK Azərbaycanda münaqişədən ziyan çəkmiş insanlara zəruri yardım əşyaları paylanışının uğurla başa çatması barədə məlumat yayıb. Təşkilat yardımın ərsəyə gəlməsi üçün beynəlxalq ictimaiyyətin, o cümlədən Avropa İttifaqının (Aİ) maliyyə dəstəyinə, eləcə də, Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin uğurlu əməkdaşlığına görə təşəkkürünü ifadə edib.

Avropa İttifaqının Humanitar Yardım Ofisinin və digər donorların davamlı dəstəyi sayəsində BMT QAK odeyal, plastik örtük, günəş lampası, mətbəx dəsti və gigiyenik dəstlər kimi həyati əhəmiyyətli yardım əşyalarının Ağdam, Ağcabədi, Beyləqan, Bərdə, Tərtər, Füzuli, Cəbrayıl, Goranboy, Naftalan, Gəncə, Mingəçevir şəhər və rayonlarında yaşayan və 2020-ci ildə baş vermis münaqişə, eləcə də Covid-19 pandemiyası üzündən ziyan çəkmiş 19 min insan arasında paylanışına nail olub. Ötən ay başlayan paylanış qış mövsümünün daxil olduğu kritik bir zamanda başa çatıb.

Avropa İttifaqının Azərbaycandakı Nümayəndəliyinin rəhbəri, səfir Peter Miçalko deyib: “Müharibədən bir ildən çox vaxt keçməsinə baxmayaraq, biz hələ də insanların onun nəticələri ilə mübarizə apardıqlarını görürük. COVID-19 pandemiyası həssas ailələrin vəziyyətini daha da ağırlaşdırıb və regiondakı humanitar vəziyyət diqqətimizi cəlb etməkdə davam edir. Aİ tərəfindən maliyyələşdirilən humanitar fəaliyyətlər, BMT QAK ilə birgə bu gün bəyan edildiyi kimi, həssas ailələrə bu qışı keçirməyə kömək edəcək.”

Avropa İttifaqı Azərbaycanda və dünyada BMT QAK-ın əsas tərəfdaşı olaraq qalır və xüsusilə münaqişədən ziyan çəkmiş ərazilərdə ən ehtiyaclı insanlar üçün həyati əhəmiyyətli humanitar yardımların çatdırılmasında təşkilata dəstək olur.

“BMT QAK Avropa İttifaqının səxavətlə ayırdığı bu töhfəyə görə təşəkkür edir, belə ki, həmin vəsait hesabına xüsusilə ötən il münaqişə üzündən ziyan görmüş ən həssas durumda olanlara, o cümlədən  uşaqlara dəstək göstərilib ki, onların bir çoxu hələ də didərginlikdə yaşayır və yardıma ehtiyacları var” deyə BMT QAK-ın Azərbaycandakı Nümayəndəsi Guido Ambroso bildirib.

BMT QAK Avropa İttifaqının Azərbaycanda münaqişədən ziyan çəkmiş ailələrə yardımını alqışlayır

Elsevar Aghayev

Elsevər Ağayev

BMTQAK
Xarici əlaqələr üzrə müşavir

Bu təşəbbüsdə iştirak edən BMT qurumları

BMTQAK
BMT-nin Qaçqınlar üzrə Ali Komissarlığı

Bu təşəbbüs vasitəsilə dəstəklədiyimiz məqsədlər