Məktəb müəlliməsi olan Təhminə xanım öz hobbisini quru meyvə təsərrüfatına çevirib

Təhmina İsayeva COVİD-19 pandemiyasından bir neçə ay öncə Azərbaycanın şimal-qərbində yerləşən Zaqatala rayonunda kiçik meyvə qurutma təsərrüfatı ilə məşğul olmağa başlayıb. Pandemiya onun işinə təsir etsə də, Təhminə xanım mövcud vəziyyətdən istehsal etdiyi məhsulların miqdarını artırmaqla bu çətin vəziyyəti fürsətə çevirməyə nail olub.

O kənd məktəbində müəllim işləyir, qalan vaxtı ev və həyət işləri ilə məşğul olur. 2019-cu ildə biznesin idarəedilməsi, mühasibat uçotu, kompüter və ingilis dili sessiyaları da daxil olmaqla, iş qurulması və inkişafına dair bir sıra təlimlərdə iştirak edib. 

 “Əvvəlcə meyvələri qurudaraq saxlamaq mənim üçün gündəlik məşğuliyyət idi. İlk öncə meyvələri açıq havada böyük bir qaba yerləşdiririk və sonra o qabı bir neçə gün günəşin altında saxlamalıyıq. Bu üsul illərdir istifadə olunan ənənəvi üsul hesab olunur, ancaq bu üsul həddindən artıq çox vaxt aparır”

Təhminə növbəti dəfələrdə meyvələri satmaq üçün qurutmağa qərar verir və 2019-cu ildə Zaqatalada Qadın Resurs Mərkəzinə müraciət edərək bu təşəbbüsünə görə o meyvə qurutma maşını ilə təmin olunur. “Fəaliyyətimiz olduqca məhsuldar başladı və ilk məhsulumu alanlar ətrafımdakı insanlar oldu. Bir il ərzində, təxminən, 300 kiloqram meyvə qurusu istehsal edə bildim. Bütün proseslə özüm məşğul olduğuma görə - bağçamızdan alma, gavalı, zoğal, əncir və digər meyvələri yığırdım və ya qışda bazardan banan, kivi və portağal kimi ekzotik meyvələr alırdım, bu heç də asan deyildi” - Təhminə öz sözlərində deyir.

Quru meyvə satışı əvvəllər Zaqatalada o qədər də geniş yayılmamışdı, ümumiyyətlə, Azərbaycanda insanlar daha çox baharın başlanğıcının xüsusi qeyd olunduğu Novruz Bayramı ərəfəsində quru meyvələr almağa üstünlük verirdilər. Qeyd etmək olar ki, bir neçə il olar ki insanların sağlam qidaya marağı artıb, vitamin və minerallarla zəngin olan bu dadlı çərəzləri almağa başlayıblar.

“COVID-19 pandemiyası zamanı bu məhsullara tələbat azaldığında satışlarım azaldı lakin, mən buna görə məyus olmadım, əksinə işimi yaxşılaşdırmaq üçün onlayn satış imkanlarını araşdırmağa başladım. Hazırda kəndimizdə yaşayan digr qadınlarla birgə öz təsərrüfat sahəmdə istehsal prosesini özümüz davam edirik.” – deyən Təhminə xanım daha geniş bazara çıxmaq və işi genişləndirmək məqsədilə Qida Təhlükəsizliyi Agentliyinə milli qida təhlükəsizliyi sertifikatı əldə etmək üçün də müraciət etməyi planlaşdırdığını bildirdi.

Təhminə öz təsərrüfatını və satışlarını inkişaf etdirmək üçün Avropa İttifaqının maliyyə dəstəyi, BMT-nin Ərzaq və Kənd Təsərrüfatı Təşkilatının (FAO) həyata keçirdiyi “Azərbaycanın Şimal-Qərb bölgəsində davamlı və inklüziv yerli qida sistemlərinin inkişafı” layihəsinə də müraciət edib.

Layihə seçilmiş aqro-ərzaq məhsulları üzrə yerli inkluziv və səmərəli kənd təsərrüfatı modelləri və qida sistemləri yaradılmasına, istehsalçılar və alıcılar arasında əlaqələrin gücləndirilməsi yolu ilə bazara çıxışın asanlaşdırılmasına, bölgədə aqriturizm potensialının genişləndirilməsinə yönəlib. Eyni zamanda, kiçik fermerlərə və emalçılara gəlirli və davamlı kənd təsərrüfatı müəssisələri yaratmaq üçün lazım olan bacarıq və bilikləri əldə etməyə imkanı verir.

“Bu cür layihələr olduqca faydalıdır və bizim kimi yeni yaranan təsərrüfat sahiblərinə bir çox imkanlar yaradır. Layihə kənd qadınları üçün yalnız gəlir gətirən imkanlar yaratmır, həm də onları güclü və özlərinə inamlı hiss etdirir; ailədəki və cəmiyyətdəki yerlərini daha da gücləndirir ” -  deyə Təhminə bildirir.