Avropa İttifaqı, BMT-nin İnkişaf Proqramı və Peşə Təhsili üzrə Dövlət Agentliyinin dəstəyi ilə tekstil sahəsində tədris aparan müəllimlər üçün təlimlər təşkil olunub

Təlim sessiyaları Sənaye və Texnologiyalar üzrə Gəncə Dövlət Peşə Təhsil Mərkəzinin yeni tikiş emalatxanasında baş tutub.

Azərbaycanda əmək bazarının son qiymətləndirməsinə görə, tekstil sənayesi ölkənin ən perspektivli sahələrindən biridir və Gəncə Dövlət Peşə Təhsil Mərkəzi mövcud resursları ilə bu sahədə texnoloji irəliləyişlər əldə edə bilər.

Təlimlər, dizayner və geyim istehsalı üzrə mütəxəssis tərəfindən aparılıb. Proqram tekstil sektorunda mövcud tendensiyalar və sahənin tələbləri, bazaryönümlü məhsulların istehsalı, eləcə də müasir avadanlıqlar və elektron simulyasiya proqramlarının istifadəsi ilə bağlı sessiyaları əhatə edib.

İştirakçılar, ideyadan başlayaraq geyim istehsalının formalaşdırılmağına qədər, uğurlu tekstil işinin qurulması üçün təməl biliklərə yiyələniblər.

Proqramda iştirak edən istehsal təlimi ustaları yeni qazandıqları bilikləri peşə təhsil mərkəzinin tələbələri və digər müəllimlərlə bölüşəcəklər. Məlumatlandırılan bütün şəxslər yaxın gələcəkdə peşə təhsil mərkəzinin əlavə gəlir əldə etməsi fəaliyyətlərinə cəlb olunacaq. 

Peşəkar təlim proqramı Avropa İttifaqının maliyyələşdirdiyi, BMT-nin İnkişaf Proqramı və Peşə Təhsili üzrə Dövlət Agentliyinin 2017-2020-ci illərdə birgə həyata keçirdiyi “Gəncədə Sənaye üzrə Regional Peşə Kompetensiya Mərkəzinin Yaradılmasına dəstək” layihəsi çərçivəsində təşkil edilib. 

Layihənin əsas məqsədi Azərbaycanın peşə təhsili və təlimi sisteminin daha da gücləndirilməsinə və müasirləşdirilməsinə kömək etməyə istiqamətlənirdi. Qeyd edək ki, infrastruktur imkanlarının və fəaliyyətinin yaxşılaşdırılması üçün layihə, ötən il Gəncədəki peşə təhsil mərkəzinin tekstil emalatxanasını müvafiq avadanlıqlarla təmin edib.