BMT-nin Əhali Fondu və ƏƏSMN fəal yaşlanmanı təşviq edən məlumatlandırma kampaniyasına başlayıb

Tədbirdə BMT-nin Əhali Fondunun, Əmək və Əhalinin Sosial Müdafiəsi Nazirliyinin və nazirliyin tabeliyindəki DOST (Dayanıqlı və Operativ Sosial Təminat) Agentliyi, Dövlət Statistika Komitəsi, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN) və “Üçüncü Bahar” Təşəbbüs Qrupunun nümayəndələri, eləcə də yaşı 65-dən yuxarı olan vətəndaşlar iştirak edib.

BMT-nin Əhali Fondunun Azərbaycan nümayəndəliyinin rəhbəri Fərid Babayev, Fondun Azərbaycan hökuməti ilə əhalinin bütün təbəqələrinin rifahının təmin edilməsi sahəsində uzunmüddətli və səmərəli əməkdaşlığından bəhs edib. Hazırkı layihə yaşlıların rifah halının yaxşılaşdırılmasına töhfə verməklə hökumətin fəal yaşlanma konsepsiyasının təşviqi istiqamətində göstərdiyi səyləri dəstəkləmək məqsədi daşıyır, o əlavə edib.

Əmək və Əhalinin Sosial Müdafiəsi Nazirliyinin sosial təminat siyasəti şöbəsinin müdiri Babək Hüseynov yaşlılara sosial qayğının artırılması və ölkədə pensiya təminatının yaxşılaşdırılması sahəsində atılan mühüm addımları qeyd edib.

Tədbir əsnasında “Üçüncü Bahar” Təşəbbüs Qrupunun rəhbəri Nərmin Qəniyeva məlumatlandırma kampaniyasına dair təqdimat edib. Qrupun təsis etdiyi “YAŞA” Mərkəzinin üzvləri öz uğur hekayələrini bölüşüblər. Sonda asudə vaxtlarını bu mərkəzdə keçirən pensiyaçıların əl işlərindən ibarət sərgiyə baxış keçirilib.

Tədbir BMT-nin Əhali Fondu və ƏƏSMN-nin birgə həyata keçirdiyi “Bütün yaşlar üçün cəmiyyətin qurulması: fəal yaşlanma yolu ilə Azərbaycanda yaşlıların rifahının təşviq edilməsi” layihəsi çərçivəsində təşkil edilib.