Yüksək risk qrupu üçün COVID-19 peyvəndi haqqında məlumat kitabçası

Avropa İttifaqının (Aİ) maliyyələşdirdiyi və Ümumdünya Səhiyyə Təşkilatının (ÜST) həyata keçirdiyi “COVID-19 əleyhinə Vaksinasiyaya Dəstək” layihəsi çərçivəsində yüksək risk qrupu hesab edilən yaşlılar və yanaşı xəstəliyi (diabet, hipertoniya və s.) olan əhali üçün COVID-19 peyvəndi haqqında məlumat kitabçası hazırlanıb. Yaşlı insanların COVID-19 xəstəliyini ağır formada keçirmək riski yüksəkdir. Belə ki, yaşlılar bu xəstəliyə yoluxduqda xəstəxanaya yerləşdirilə və süni tənəffüs aparatına qoşula bilər. Bununla yanaşı, yaşlılarda müxtəlif xroniki xəstəliklərin olması xəstəliyin ağır formada keçməsi riskini daha da artırır. Yaşlı şəxslərə və xroniki xəstəliyi olanlara COVID-19 peyvəndinin iki dozasını, eləcə də 3-cü və 4-cü buster dozaları vurdurmaq tövsiyə olunur.

Kitabçada COVID-19 əleyhinə peyvənd olunduqdan sonra da özünü qorumaq və xəstəliyə qalib gəlmək üçün bir sıra profilaktik tədbirlər əks olunub. Burada maska taxmaq, məsafə saxlamaq, asqırarkən və ya öskürərkən ağzı və burnu dirsək büküyü ilə örtmək, qapalı məkanları havalandırmaq, əlləri tez-tez yumaq və dezinfeksiya etmək kimi profilaktik tədbirlərin insanların sağlamlığı baxımından əhəmiyyəti vurğulanıb.

Ümumdünya Səhiyyə Təşkilatı Avropa İttifaqının maliyyə dəstəyi ilə yerli tərəfdaşlarla birgə ölkə üzrə COVID-19 pandemiyasına qarşı mübarizə və rutin immunlaşdırma proqramlarının gücləndirilməsi istiqamətindəki səylərini davam etdirir.