ÜST Azərbaycanda təcili tibbi yardım sisteminin gücləndirilməsinə dəstək verməyə davam edir

Səhiyyə sisteminin təkmilləşdirilməsi istiqamətində prioritetləri müəyyənləşdirmək və sübutlara əsaslanan inkişaf xəritələrini təqdim etmək məqsədilə keçirilən bu simpoziuma 80-dən çox iştirakçı qatılıb.

Simpoziumu giriş sözü ilə açan Azərbaycan Tibb Universitetinin rektoru, professor Gəray Gəraybəyli bütün iştirakçıları salamlayıb. Səhiyyə nazirinin müavini Nadir Zeynalov səhiyyə sistemində təcili tibbi yardım xidmətlərinin əhəmiyyətini vurğulayıb. ÜST-nin Azərbaycandakı Nümayəndəsi Dr Hande Harmancı qeyd edib ki, ÜST səhiyyə sistemini, xüsusən də təcili yardım sistemini gücləndirmək səylərində Azərbaycana dəstək olmaqdan qürur duyur. İcbari Tibbi Sığorta üzrə Dövlət Agentliyinin təmsilçisi Araz Nəsirov təcili tibbi yardım sistemində görülən islahatlardan danışıb. 

Simpoziumda həmçinin Tibbi Ərazi Bölmələrinin İdarəetmə Birliyi (TƏBİB) və Türkiyə Səhiyyə Nazirliyi, Kliniki Tibbi Mərkəzin nümayəndələri, ölkə üzrə xəstəxanaların direktorları və əməkdaşları, habelə təcili yardım üzrə beynəlxalq ekspertlər iştirak ediblər.

07 fevral tarixindən başlayaraq 5 gün müddətində “Xəstəlik hallarının idarə olunması” və “Təcili Yardım Şöbəsinin İdarə Olunması” kurslarının tədrisinə start veriləcək. Həftə ərzində baş tutacaq ən mühüm tədbirlərdən biri bütün maraqlı tərəflərin iştirakı ilə Azərbaycanda növbəti illər üçün təcili tibbi yardım xidmətlərinin gücləndirilməsi üzrə yol xəritəsi haqqında razılaşma olacaq.