Şamaxıda ilkin səhiyyə xidmətinin güclənləndirilməsi üçün səyyar klinikalar fəaliyyətə başlayır

Səyyar klinikar vasitəsilə bu ərazilərdə qeyri-infeksiyon xəstəliklərin vaxtında diaqnozu və nəzarətdə saxlanılması, daha yaxşı ana və uşaq sağlamlığı və infeksiyaların profilaktikası və nəzarəti xidmətlərinin göstərilməsi mümkün olacaq. 

Qeyd edək ki, ABŞ-ın Beynəlxalq İnkişaf Agentliyi, Böyük Britaniyanın Bakıdakı Səfirliyi və UHC-Əməkdaşlıq Təşəbbüsünün (ÜST-nin tərəfdaşları ilə ortaq layihəsi) maliyyə dəstəyi ilə icra olunan layihənin məqsədi Şamaxı rayonunda əlçatan, keyfiyyətli, hərtərəfli ilkin səhiyyə xidməti modeli yaratmaqdır. Layihə, eyni zamanda, icmaların daha sağlam həyat sürmələrini və öz sağlamlıqlarına qayğı göstərmələrini dəstəkləyəcək. ÜST-nin Azərbaycandakı Nümayəndəliyi layihənin icra olunmasında Şamaxı Rayon İcra Hakimiyyəti, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, Heydər Əliyev Fondu və UNICEF-lə tərəfdaşlıq edir. 

Şamaxının  Dəmirçi kəndində baş tutan təhvil-təslim mərasimində çıxış edən Şamaxı Rayon İcra Hakimiyyətinin başçısı Tahir Məmmədov son illər ölkədə səhiyyə sahəsində aparılan islahatlardan söhbət açaraq bütün bölgələrlə yanaşı Şamaxıda da bu istiqamətdə bir çox işlərin görüldüyünü qeyd edib. Görülmüş işlərlə yanaşı, bu layihənin həyata keçirilməsi nəticəsində rayonda, xüsusilə ucqar kəndlərdə yaşayan sakinlərə göstəriləcək ilkin səhiyyə xidmətinin keyfiyyətinin yaxşılaşdırılacağının vacibliyini qeyd edib.

Layihənin əhəmiyyətini vurğulayan ABŞ-ın Azərbaycandakı səfiri Li Litzenberqer bildirib ki, hamımızın qarşılaşdığımız bu çətin dövrdə Amerika Birləşmiş Ştatları Azərbaycana dəstəyini davam etdirəcəkdir. Biz yalnız birlikdə,  əl-ələ verib COVID-19-u məğlub edə bilərik, deyə o qeyd edib. 

Böyük Britaniyanın Azərbaycandakı səfiri Ceyms Şarp qeyd edib ki, Birləşmiş Krallıq Azərbaycanda səhiyyə sektorunu dəstəkləməyə davam edəcək. O əminliyini ifadə edib ki, səyyar klinikalar səhiyyə xidmətinin ən çətin olduğu kənd yerlərində yaşayanlar üçün səhiyyənin əlçatanlığına əhəmiyyətli dərəcədə müsbət təsir göstərəcəkdir. Səyyar klinikalar COVID 19-a daha yaxşı cavab vermək üçün ilkin səhiyyə xidmətini gücləndirməklə yanaşı, kənd yerlərində yenidoğulmuş, ana və uşaq sağlamlığı da daxil olmaqla digər vacib səhiyyə xidmətlərinin çatdırılmasını təmin edəcək.

Pandemiya dövründə beynəlxalq əməkdaşlığın, informasiya mübadiləsi və yardımların əhəmiyyətini vurğulyan Səhiyyə Nazirinin müavini Dr. Rəhim Əliyev bildirib ki, ilkin səhiyyə xidmətinin inkişafı həm qeyri-infeksiyon xroniki xəstəliklər, həm də infeksiyon xəstəliklərlə mübarizədə dövlətin işini asanlaşdıracaq, həm də əhalinin sağlamlığının gücləndirilməsinə yardımçı olacaq. 

TƏBİB-in sədri Dr. Ramin Bayramlı bildirib ki, pandemiya dövründəki təcrübəyə əsasən məhz ilkin səhiyyə xidməti güclü olan ölkələr COVID-19 pandemiyasının öhdəsindən daha uğurla gəliblər. Bu baxımdan layihənin çox əhəmiyyətli olduğunu söyləyən TƏBIB sədri layihə məqsədlərinin Azərbaycanda aparılan səhiyyə islahatları ilə uyğun gəldiyini qeyd edib. 

İlkin səhiyyə sisteminin inkişafının zəruriliyi vurğulayan Milli Məclisin Səhiyyə Komitəsinin üzvü və Heydər Əliyev Fondunun Beynəlxalq Əlaqələr Departamentinin rəhbəri Soltan Məmmədov təmsil etdiyi qurumun “PROACT-Care” layihəsinə davamlı dəstəyə hazır olduğunu bildirib. 

ÜST-nin Azərbaycandakı Nümayəndəsi Dr. Hande Harmancı  vurğulayıb ki, “PROACT-Care” layihəsi ÜST-nin Azərbaycan Namyəndəliyinin yerli və beynəlxalq tərəfdaşları və donarları ilə birgə hərtərəfli komanda işinin nəticəsidir. Onun sözlərinə görə, səyyar klinikalar dayanıqlı səhiyyə sisteminin əsas komponentlərindən olan ilkin səhiyyənin güclənləndirilməsinə xidmət etməklə bərabər, həm də Şamaxıda COVID-19-a qarşı mübarizədə yardımçı olacaq.

Təhvil-təslim mərasimindən sonra ÜST-nin Şamaxı şəhərində fəaliyyət göstərən təlim mərkəzini ziyarət edən iştirakçılara layihə çərçivəsində həyata keçirilməkdə olan və planlaşdırılan digər tədbirlər barədə məlumat verilib.  Qeyd edək ki, layihə çərçivəsində Şamaxıda yaradılacaq ilkin səhiyyə xidməti modeli gələcəkdə genişləndirilərək bütün ölkədə tətbiq edilmə potensialına malik olacaq.