BMT Azərbaycanda “Xəzər günü” ilə əlaqədar çimərliklərin təmizlənməsi aksiyasını dəstəkləyib

Tədbir BMT-nin Azərbaycandakı nümayəndəliyi, Azərbaycan Respublikası Ekologiya və Təbii Sərvətlər Nazirliyi, Təhsil Nazirliyi Respublika Uşaq-Gənclər İnkişaf Mərkəzi, Balaxanı Sənaye Parkının rezident şirkəti “AzEkol” MMC və “EkoSfera” İctimai Birliyi tərəfindən təşkil edilib. Tədbirdə tərəfdaş qurumların rəsmiləri ilə yanaşı media təmsilçiləri və ictimaiyyət nümayəndələri iştirak edib.

Tədbirin keçirilməsində məqsəd Xəzər dənizinin və sahil zonasının ekoloji vəziyyətinin yaxşılaşdırılmasında ictimaiyyətin rolunu vurğulamaq və bu sahədə ictimaiyyətlə əməkdaşlığı gücləndirməkdir.

Bu təşəbbüs, “Xəzər günü” ilə bərabər, BMT-nin 12-ci, 14-cü və 15-ci Dayanıqlı İnkişaf Məqsədlərinin Azərbaycanda həyata keçirilməsinə də xidmət edir. Təşkilatçılar dayanıqlı istehlak, dənizlərin qorunması, ekosistemin mühafizəsi və ətraf mühitin müdafiəsinə həsr olunmuş bu cür maarifləndirici ortaq təşəbbüslərin gələcəkdə də təşkil olunacağını bildiriblər.

Keçirilən aksiya zamanı 5 hektar ərazi tullantılardan təmizlənib, 10 m3 tullantı çeşidlənərək aidiyyəti üzrə daşınıb.

Qeyd edək ki, 12 avqust 2006-cı il tarixindən Xəzər dənizinin dəniz ətraf mühitinin mühafizəsi haqqında Çərçivə Konvensiyası qüvvəyə mindikdən sonra hər il 12 avqust “Xəzər günü” kimi qeyd olunur.